Yb 14 - Kalate Zambe Nnomo a Mfefe Mfefé Nkôñelan

Môt a se nguleya Sa'al'awu

¹ Môt a ne mbialan be minga ényiñe jé é n'étun, njalan a mam ma fô'é nye.

² A nga faa ane Sam a a tyi'ibaneya a mate ane nsisiñ teke tebe.

³ Wo kôme kui dise dôé be nye! A wo kôme bo na bia wo bi ke aba mejô!

⁴ Za a ye soo jôm é ne mfuban e jôm é ne mvin été? Teke môt.

⁵ Nge wo wo telé melu mé, tañe bengone bé, nge ô maneya telé nné y'été, nye a se nguleya dañ,

⁶ va'a ñhe nye mise nyô, a tame wo'on. Nalé a ye bi ja'ane ve mevak, e ma me môt a saé moné a bili, éyoñe *môs ô maneya.

⁷ Elé é bili ndi na: Nge be ba'é je, ja ye beta faa, ja ye bo te jembane bifa'alé.

⁸ Nge nkañe wé wo bo nnôm e si été, nge nku'u wé wo wu e mbulu'u été,

⁹ ja ye beta faa nge é wô'ô mendim, ja ye beta kpwaé metak ane élé é ndôme bééban.

¹⁰ Ve môt a wu a dimili ngule jé; môta binam a wu: v'a ne ñhe vé'

¹¹ Mendime ya mañ me ne nguleya tinekan, beta b'asôé ba vele a kôt;

¹² Avale te môt a bômbô si, v'a ye bo te beta kôlô si, a ye bo te vee te na yôp e jañ, a ye bo te kôlô ôyo wé été.

¹³ Ngo'é nge ô nga ye kômbô solé ma e vôme miñwuan mi né, ô ba'ale'e me wé asoé, akekui ayaa dôé e je'ebeya, a telé ngum éyoñ ya beta simesane ma!

¹⁴ Nge môt a too ye beta nyiñ éyoñ a wuya, e mimôs mise ma saé, me nga ye bo ve yange, akekui môt a tyendé ma a soya.

¹⁵ Eyoñe te ñhe ô nga ye loon, a ma me nga ye yalane wo, ô nga ye kômbô yen e ma me n'ésaé ya mo môé.

¹⁶ V'éyoñe ji wo lañe medaa mebo mam. Y'ô nji yen *abé dam'

¹⁷ Mbia mboone wom a ne ndutan e nkuta été, a wo beta vumelane nkobane wom,

¹⁸ ve nkôl wo ku a su'ulane momo, nalé fe akôm da kôlô vôm e né,

¹⁹ mendim ma bo meko'o na me sibi, a ngul ya mendim ma lôt ja mane kee tyia; avale te wo wôé ndi nleme ya be môt.

²⁰ Awolo ese wo kui nye bita, a a lôt. Wo tyendé asu dé a mvus éte, wo bo na a kôlô.

²¹ A nji yem nge bone bé be bili ésemé; nge be ne nsilibane si, a nji yene jame te.

²² Mintaé mi ne e minsône mié été, a nsisime wé ñwô wo wô'ôlun.