Yb 13 - Kalate Zambe Nnomo a Mfefe Mfefé Nkôñelan

Yob a kômbô na ba Zambe be tame fetane bifia

¹ Yaa! Mise mam me yeneya mam mete mese. Alo dam e wô'ôya a yeme fe de,

² ma fe ma yem e jam mia yem, me nji bo si a mia.

³ Ve ma ma zu kobô Nyô a ne Ngul ése, ma zu kaman ajô dam asu Zambe,

⁴ amu mia mia fôlô minsos, mia bese mi ne bedokita ya momo.

⁵ Amu jé mi nji tabe bivô' Nalé a nga ye bo fek be mia.

⁶ Ma ye'elane mia na mi vô'ôlô nkate wom, ke'ane melo a wôk ane biyaé biam bia suñ ajô dam,

⁷ ye mia ye kobô ékotekot mi kele Zambe ngam, ye mia ye laa minsos asu ya kamane nye'

⁸ Ye mia ke nye ngam' Ye mia kômbô kamane Zambe'

⁹ Eyoñ a ye yemelane mia ye a ye koone *mvo'é' Nge na ye mia du'u nye ane ba du'u môta binam'

¹⁰ A ye fo'o ve mia bijô nge mia bo mboone wu asoé v'amu mia ke nye ngam.

¹¹ Ye nyô a n'éjijin a ye bo te ve mia woñ' Ye angôndô wé a ye bo te ku mia yôp'

¹² Jam mia ba'alane na me yem e ne ve medu'an, nkamane wônan ô ne ve wu étek.

Jôka'ane ma me kobô

¹³ Taba'ane bivô! Jôka'ane ma! Ma ma zu kobô! Jam ese da ye kui be ma e kui.

¹⁴ Amu jé ma ye kô'é minsône miam mesôñ, a futi ényiñe jam e wo wom été'

¹⁵ To'o Zambe a kômbô wôé ma, me nji beta bi jôm éziñ ya dimili yaa ma ye kaman ajô ya ntabane wom asu dé.

¹⁶ Nalé émien a ne bo mfi mfa'a wom; amu mbia môt a se nguleya tebe nkat asu dé.

¹⁷ Vô'ôla'an, vô'ôla'ane jam ma jô; éfufup ma liti é tame nja'a kui melo menan.

¹⁸ Ma kômesane ke *nda mejô, a ma yeme na ma me bili mekabe.

¹⁹ Za a kômbô somane ma' Ataté éyoñe ji ma ye tab? évô a wu.

Yob a sili e Zambe a solô jam

²⁰ Ve da kañese'e ma mam mebaé a ma ye bo te sobô ôyab a asu dôé:

²¹ e wo wôé ô dañe me yôp, nalé fe na angôndô wôé a bo'o te beta ve me woñ,

²² wôna lo'on a ma ye nyoñe nkobô, nge na ma ye kobô a wo ye yalane ma,

²³ minkobane miam a *abé dam bi ne tañ aya' Bo'o na me yem mbia jame wom a *abé dam.

²⁴ Amu jé wo solé asu dôé' A nyoñe ma ane nsiñe wôé'

²⁵ Ye wo kômbô bo na ôkaé ô fô'ôban' Ye wo kômbô tôñesan ôsôé ô maneya kôt'

²⁶ Amu wo tili bifia bi n'ayô, bi bia wosane ma, wo bo na me be'e mbe'e ya minkobane y'éyoñ me mbe ésoé.

²⁷ Wo kômbô futi mebo mam ébom été, a fombô mam mese ma bo, a ve medaa mebo mame nné.

²⁸ Eyoñe te nyôle jam ja ku é ntoo ébo, ane ngômesane si'ibem ja di.