Yb 11 - Kalate Zambe Nnomo a Mfefe Mfefé Nkôñelan

Sôfar a kobô Yob

¹ Ane Sôfar ya Nama a nga nyoñe nkobô a jô na:

² Ye abui nkobô di da ye bo te yen éyalan, asu ya bi mekabe, ye da sili ve na môt a kobô abui'

³ Ye zô'é nkobô jôé nje ja ye toé bôte bivô' Ye wo kpwe'ele bôt te môt a ve w'ôsone nyô'

⁴ Wo jô na: Ñyemane wom ô ne teke bijô, a me ne *mfuban e mise môé.

⁵ Ngo'o nge Zambe a too ye kômbô kobô, nge a too ye dii anyu asu dôé,

⁶ a nge a too ye kate wo minsolane mi mame ya fe'e jé, nje ja dañe bebela, éyoñe te ñhe ô nga ye yeme na, mfa'a wôé Zambe a vuane ngab éziñe y'ékobe jôé.

⁷ Ye ô ne kulane yeme bido'o bi Zambe, nge kulane yeme jam da nnambe ntute *mvo'é ya nyô a ne ngul ése'

⁸ Ntute *mvo'é te ô ne f'ôyabe yôp, ane yôp: wo ye bo jé' O ne f'édok ane vôma miñwuan: wo ye yeme jé'

⁹ Ove'e y'été ô n'ayab a dañe si, a ndam a dañe mañ.

¹⁰ Nge Zambe a lôt nge futi e mimbôk, nge a loone môt aba mejô dé, za a ne nguleya tebe nye ngame yat'

¹¹ Amu a yeme bôt be ne medu'an, a yen ékotekote ntyi'ane mejô teke kômbô nyoñe ngab été.

¹² Ve môt a bili fe'e ya nlô ô yoo, môta binam a nga bialé ane mone ngal éjakase ya fé.

Mfefé ényiñ

¹³ Mfa'a wôé, nge wo tyendé ntaban, a nge wo same mo môé be Zambe,

¹⁴ Ng'ékotekote ntyi'ane mejô ja ke wo wôé ôyap, a bo te jô'é *abé é kôm éto e menda bindelé môé si,

¹⁵ éyoñe te wo ye bete asu dôé yôp tek'ayeñ, wo ye bo ngu, teke woñ éziñ;

¹⁶ amu wo ye vuane nju'u wôé, wo ye simesane wô ane mendim me maneya lôt.

¹⁷ E nyiñan wo nyiñ wo ye faé a dañe zañe *môs, dibi da ye bo ane mametyé,

¹⁸ wo ye bo njalan a ndi *nlem, amu jame ya tabe de ndi da ye bo; wo ye fombô mevôm ma bômane wo, a wo ye bômbô si teke jame ya ko woñ;

¹⁹ wo ye same nyôle si, teke môt a ndeñele wo; abui bôt da wone wo,

²⁰ ve mise bebo *abé ma ye di'iban; ba ye bo te vôme ya sobô; Ndi minleme jap ja ye bo ve na be jibi wu.