Yb 10 - Kalate Zambe Nnomo a Mfefe Mfefé Nkôñelan

Etétéa é ne jôme ya biasé

¹ Enyiñ é vindaneya ma *nlem! Ajô te me tame jô'é ñyône wom ô kui amu ajô y'asu'ulane dam, ma ye kobô éyôé ya nleme wom été.

² Ma jô Zambe na: Te ve ma mekua! Bo'o me na me yeme jam wo wô'ô ma de ôlun!

³ Ye wo yene de mvaé na ô bo nyô a kpwe'ele, a na ô biasé ésaé ya mo môé a faé éfufube jôé ékôane bebo *abé'

⁴ Ye ô be'e mise minsôn, a ye wo yen ane môt'

⁵ Ye melu môé me ne ane ma me môt nge mimbu miôé ane mimôs mi môt,

⁶ ane ô ne nguleya jeñ ékobe jam, ane ô ne kômbô yem *abé dam,

⁷ ô yeme fe na me nji yiane mekua, a na teke môt a ne nyii môt e mo môé été'

⁸ Mo môé mme me nga mé ma, mme me nga kôme ma ngumba. Ye ô ne kôme bele jiane ma'

⁹ O simesa'ane na ô nga kôme ma a metek; ye wo kômbô bulane ma e mbulu'u été'

¹⁰ Ye ô nji sôé ma ane menyañ' Ye ô nji bo na me lik an'avoñ'

¹¹ O nga jalé ma ékôp a minsôn, a late ma a bives a minsis;

¹² ô nga ve ma ényiñ a *mvam, nju'u ô nga nyoñe be ma, ñwô ô nga ba'ale ényiñe jam.

¹³ Ve tame yene jam ô mbe ô ba'ale'e nleme wôé été, ma yeme jam e mbe ôsimesane viôé été;

¹⁴ Nge ma bo *abé, ô lôô ma, a ô nji yene ma ane nyô a ne te mekua y'ékobe jé.

¹⁵ Nge ma yiane mekua, ngo'o ma! Nge me ne *zôsôô, me nji bo ayo'o ya bete nlô, amu ébiasé é kuliya m'abume *nlem, a éngôngol é mineya ma.

¹⁶ A nge ma bo ayo'o ya beta kôlô si, wo tôñesane ma ane ngbwengbwem, a beta bibi ma a bitua bi mam,

¹⁷ wo telé ma mimfefé bengaa e ngame yat, ôlune wo wô'ô ma ve nenenen, nkane bita wo tebe señe jôé asu ya wosane ma.

Yob a sili Zambe ajô ya Abialé dé

¹⁸ Amu jé ô nga soo ma abume nyia wom' Me nga yiane wu a dis éziñ e nji ye yene ma.

¹⁹ Me nga ye bo ane nge me nji tame nyiñ, akôlô y'abume nyia wom, me nga ye ke ve soñ.

²⁰ Ye melu mam me nji bo tyôtyoé' A tame jô'é ma! A kôlô'ô be ma, me beta nyoñ ôbe ngu,

²¹ nté me ngenane te ke mekemeke e si dibi a nsisiñ y'awu,

²² e si édo'o dibi ja funane dibi ndim, nsisiñ y'awu, vôme nzameta'an a jôô, a e vôm éfufub é ne ane dibi!