YASUA 9 - Kalate Zambe Nnomo a Mfefe Mfefé Nkôñelan

Elat a bôte ya Gabaoñ

¹ Eyoñ be nga wô'ôtan mam mete mese, bejô bôt bese ya Yordan yat, ba be nga too si minkô, e ba ya nje'ese si, a ba ya éwome beta mañ, éfase Libañ, e ne na Beétieñ, Beamorééñ, Bekananééñ, Beférézieñ, Beévieñ a Beyébuzieñ,

² be nga bo akôna ya wosane Yasua a Israél.

³ Bôte ya Gabaoñ fe be nga wô'ôtan avale Yasua a nga bo Yérikô a Ayi.

⁴ Nde be fe be nga bôndé fe'e mvô: be nga téé nsamba minlôman, a koé na be nyoñeya minkuta mi ntoo mintuk asu bijakase biap, a mende'e bikôp me ntoo nyaban bifus bifus, me bili woon a maneya ndaman;

⁵ be nga jaé mintu'u besilefas mebo, be jaéya fe kôme be; be nga jaé fe mintu'u biyé mfa'a ya mvus; belet be nga nyoñ ane nga'aban é mbe ayet a menyuñ menyuñ.

⁶ Ane be nga ke yene Yasua e minkan Gilgal a jô nye a bôte bese ya Israél na: Bia so si é ne ôyap. Eyoñ ji, bo'on élat a bia.

⁷ Ve bôte ya Israél be nga sôane mbi *ntum beévieñ ate a jô na: Ndô'ôtô bia be mia bi too bebé, nne bi ne bo élat a wo aya'

⁸ Nde be nga jô Yasua na: Bi ne bebo bisaé bôé; ane Yasua ke a nga sili be na: Mi ne beza? Mia so ke vé'

⁹ Nde be nga yalane nye na: Bebo bisaé bôé ba so si ja dañ ôyap, amu duma ya jôé Nti, Zambe wôé, amu bi nga wô'ô be kobô'ô ajô dé, mam mese a nga bo Ejipte,

¹⁰ a avale ese a nga bo bejô bôte Beamorééñ bebaé be too Yordan yat, Sioñ njô bôte ya Hesboñ a Og, njô bôte ya Basañ a nga too Astarôt.

¹¹ Bemvendé bangan a bôte bese ya si jañgan be nga jô bia na: Nyoñane nga'aban asu dulu ya zenezen, a kela tôbane be. Mia ye jô be na: Bi ne bebo bisaé bôé! Eyoñe ji bo'on élat a bia!

¹² Tame yene belet jangan, é mbe ayôñ éyoñ bi nga nyoñe je menda mangan ane nga'aban ya zenezene na bia zu be mia, mi lôô na é maneya kpwem a nyumelan.

¹³ Mende'e bikôp bi woon mana, bi nga jalé me me too mimfefé, mi lôô me maneya nyabé. Yenane fe mengômesane mangan a besilefase bangan, bi maneya bo mintuk amu ayabe dulu.

¹⁴ Nde be nga nyoñ ngab'éziñ ya nga'abane jap teke taté sili Nti.

¹⁵ Nalé fe na Yasua a nga bo élat a be, a ve be ndi ése na ba ye nyiñ, bivet bise ya ayoñ bi nga kane be mengana mfa'a ôte.

¹⁶ Eyoñ melu mela me lôteya, a koone na Israél a maneya bo élat a be, ane bôte ya Israél be nga wô'ô na be mbe bôt baa be be be ne ngoto, a na be too too ézezañe jap.

¹⁷ Nalé bone b'Israél be nga ke a kui bitisone biap môse lale. Bitison bite bi ne na: Gabaoñ, Kéfira, Bérôt, Kiryat-Yéarim.

¹⁸ Ve bone b'Israél be nji ke be wôé amu ngana bivet ya ayoñ bi nga kane be a jôé Nti, e Zambe Israél. Ve bôt bese ya ayoñ be nga kobô bivet menyiñ.

¹⁹ Ane bivet bise bi nga jô ékôane bôt ése na: Bia bi nga kane be ngana a jôé Nti e Zamba Israél; ajô te éyoñe ji bi se fe ngule ya beta nnambe be.

²⁰ V'avale di nde bia ye belane be: bia ye jô'é be na be nyiñ, éyoñe te bia ye sa'ale ayaa Nti, amu ngana bi nga kane be.

²¹ Ane bivet bi nga jô be na be nyiñik! Ve be nga belane be mfa'a ya tyaé nja'a a laé mendim asu ékôane bôt ése aval'ane bivet bi nga jô.

²² Nde Yasua a nga loone be a jô be na: Amu jé mi nga du'u bia na mi ne bia ôyap éyoñ mi too too ézezañe jangan'

²³ Ajô te mi ne biyo'é éyoñe ji! Eto *ôlo ja ye bo te kôlô be môt éziñ ya be mia; mia ye tyaé nja'a a laé mendim asu *nda e Zambe wongan.

²⁴ Nde be nga yalane Yasua na: Nalé a ne na be nga kañete bebo bisaé bôé mam mese Nti, e Zambe wôé, a nga bendé Môze mbo ésaé wé na a ve mia *si nyô ése a jiane bôt bese be too été ôsu vienan. Ajô te nsoone wônan ô nga dutu bia beta wôñ, amu binyiñe biangan, nde bi nga bo avale bi nga bo.

²⁵ Eyoñe ji bi ne e mo môé été. Bo'o bia ane ô lôô mvaé a *zôsôô ya bo bia.

²⁶ Avale te nde a nga bo be, a vaa be mo bone b'Israél na be bo teke be wôé.

²⁷ Ataté *môs ôte, Yasua a nga ve be ésaé ya tyaé nja'a a laé mendim asu ékôane bôt a asu ata'a metuna'a Nti, e vôm Emien a nga top a zu kui môse wu.