YASUA 7 - Kalate Zambe Nnomo a Mfefe Mfefé Nkôñelan

Abé Akan a * melep ma tôñe nye

¹ Ve bone b'Israél be nga tyam atiñe Nti a nga ve be na, be bo te nnambe jôm é ne ntiñetane na ja yiane jañ e Yérikô été amu Akan, mona Karmi, ndaé Zabdi, ndile Zérak ya ayoñe Yuda, a nga nyoñ biôm biziñ ya bi bi nga yiane jañ: ajô te ayaa Nti e nga yôñ ane nduan e nyôle bone b'Israél.

² Nde a zu bo na, Yasua ve lôme bôt Ayi, be kôlô'ô e Yérikô. Ayi a mbe bebé a Bét-Avén, mfa'a jôp da tôô, e Bétél. Ane a nga jô bôte bete na: Betan a looé si. Nde be nga bet a looé Ayi.

³ Be nga bulan be Yasua a jô nye na: Bôte bese be nji ke yiane bet, be ne ke ve bôte toyini ébaé nge éla a dañe tisone Ayi! Te jalé bôt bese nju'u nyôl e zesé, amu besiñ bebien be nji ke bo abui.

⁴ Nalé bôte bebé toyini éla be nga ke a mate asu bôte ya Ayi.

⁵ Bôte ya Ayi be nga wôé ba ya Israél bôte bebé mewôm mela a besaman. Be nga titane be mvus ataté anyiine *mbé ya tison a kui Sébarim: be nga wôé be asiliki nkô: ajô te bôt be nga bo te fe minlem mebum a bo ane mendim.

⁶ Ajô te Yasua a nga nyab mengômesan mé, a ku asu e butu si ôsu éwolo Nti akekui mamengô'é, émien a bemvendé y'Israél. Be nga kute mbuluk minlô miap.

⁷ Ane Yasua a nga jô na: A Nti, Nyô a too nnôm éto, amu jé ô nga bo bôte bana na be dañe Yordan, y'amu na ô ve be mo Beamorééñ a bo na be jañ? Ngo'é nge bi nga jibi ke tabe Yordan yat!

⁸ A Nti, me jô ñhe aya éyoñe ji! Eyoñ Israél a lumeya besiñ bé mvus'

⁹ Amu bôte ya Kanaan a ba bese be too si éte, ba ye kôme wô'ô ajô di, éyoñe te ba ye bômane bia ne kpwok, a bo na jôé dangan e jañ e si nyôna été: nde ñhe wo ye bo jôé dôé é ne anen aya'

¹⁰ Ajô te Nti a nga jô Yasua na: Kôlô'ô si, jé ja lôt! Wo ku asu e butu si amu jé'

¹¹ Israél a semeya, amu na, be tyameya élate jam me nga tiñeti be; be nyoñeya ngab éziñ ya jôm ja yiane jañ, be wubeya je, be soléya je, a kui fe vôme ya futi je mimbe'e miab été.

¹² Bone b'Israél be se ngule ya tebe asu besiñe bap. Ba ye lume besiñe babe mvus, amu bebien be ntoo jôm ya njañ. Ma ye bo te beta wulu a mia nge mi nji tyam jôm ja yiane jañ é ne ézezañe jenan.

¹³ Kôlô'ô si, a tun ayoñ. Wo ye jô bôte na: Tunane miabebien asu ya akiti, amu avale di nde Nti, Nyô a ne Zambe ya Israél a jô na: Jôm ja yiane jañ é ne ézezañ jôé, a Israél! Ajô te ô se ngule ya tebe asu besiñ bôé, nté mi ngenan te vaa jôm ja yiane jañ é ne ézezañ jenan.

¹⁴ Mametyé, *meyoñ mese awôm a mebaé ma ye subu bebé; wôna ayoñ Nti a ye liti ônyu da ye subu aval'ane mebume mé me né a abume bôt Nti a ye liti ônyu, da ye subu aval'ane menda me bôte mé me né, a *nda bôt Nti a ye liti ônyu ja ye subu aval'ane beteb'ôsu y'été be né.

¹⁵ A ye bo na, nyô a ye be'e ayeme ya jôm ja yiane jañ a ye di'iban nduan, émien a jôm ése a bili: amu a tyameya élate Nti, a a boya jam é ne ôson a ôsame Israél été.

¹⁶ Nalé Yasua a nga kôlô si ndibe tyé, a bo na Israél a subu nye bebé aval'ane *meyoñ mé me né. Ane ayoñe Yuda e nga litiban ônyu.

¹⁷ Nde a nga loone mebum me bôt ya Yuda, ane di Zéra e nga litiban ônyu. A nga loon abume bôte Zéra aval'ane beteb'ôsu bap be né, ane Zabdi a nga litiban ônyu.

¹⁸ A nga loone minlô ya *nda bôte Zabdi, nde Akan, mona Karmi, ndaé Zabdi, ndile Zéra ya ayoñ Yuda a nga litiban ônyu.

¹⁹ Ajô te Yasua a nga sili Akan na: A mone wom, va'a Nti duma a akéva. Nyô a ne Zambe ya Israél; nalé fe na kate ma jam ô nga bo a te solé ma de!

²⁰ Nde Akan a nga yalane Yasua na: E ne fo'o bebela na ma me boya nsem e mise me Nti, Zambe ya Israél. Jam ese me nga bo nde di:

²¹ me nga yen, e biôm ya nsa été, étua mbamba alô'ô ya Sinéar nalé besikel be argent mintete mibaé a beta ébabe or adit tañ besikel mewôm metan; ane me nga nyamete bie a nyoñe bie; biôm bite bi ne *nda éndelé jam, nsolan si été, argent nye a ne mfa'a ya si.

²² Nde Yasua a nga lôme bôte mbil *nda éndelé. A be nga koone fo'o bi ntoo mbamba nsolan *nda éndelé Akan été, argent a too mfa'a ya si.

²³ Ane be nga vaa bie *nda éndelé a zuu bie be Yasua a Israél ase a bôé bie asu be Nti.

²⁴ Wôna Yasua a nga nyoñe Akan, mona Zéra, nalé fe argent, alô'ô a ébabe or, bobefame bé, bobebinga bé, a benya'a bé, bijakase bié, mone mbame wé, *nda éndelé jé a jôm ése é mbe énjé. Israél ase a nga fulan a Yasua, ane be nga kee be mbi'ili Akor.

²⁵ Nde Yasua a nga jô na: Amu jé ô litiya bia abime nju'u di! Nti fe a liti wo njuk e môse wu. Ane Israél ase a nga lume nye *mekok. Be nga di'i be nduan a lume be *mekok.

²⁶ Be nga bo beta avis *mekok Akane yôp; avise meko'o te e ne a zu kui e môse wu, a Nti a nga jô'é mbia ayaa wé. A mbi'ili wu wo loban a zu kui e môse wuna na mbi'ili Akor.