YASUA 6 - Kalate Zambe Nnomo a Mfefe Mfefé Nkôñelan

¹ Yérikô a mbe ndiban a mfetan: teke môt a mbe ngule ya kui atan nge nyiin e tison été.

² Ane Nti a nga jô Yasua na: Tame yen, me veya Yérikô e mo môé, nalé fe njô bôte wé a biwôlô bi bôte ya mewosan.

³ Wo a bôte mewosan bese, mia ye tyiñelane tison tañe mimôse misaman, *môs ôse éyoñe jia.

⁴ Betuni zamgbwa ba ye tebe ôsu éwolo élat, be be'e metoñ minla'a mi ntômba zamgbwa. Môse zamgbwale, mia ye tyiñelane tison biyoñ zamgbwa a betuni ba ye loñe toñ.

⁵ Eyoñe minla'a mi ntômba mia ye kobô, a éyoñ mia ye wô'ô tyiñe toñ, bôte bese ba ye yôtane metyiñe mabe ngu. Nalé ate beta aka'a ya tison a ye ku ébiene yôp, a bôte bese ba ye bet, môt ase a kele ôsu vié.

⁶ Ane Yasua, mona Nun, a nga loone betuni a jô be na: Beka'an éwolo élat, a bôte ya be mia zamgbwa be tebe'e je ôsu, be be'e metoñ minla'a mi ntômba zamgbwa.

⁷ Wôna a nga jô bôte bevo'o na: Lôtan a tyiñelane tison éyoñ jia, asuzo'o nkan bita a tele ôsu éwolo élat.

⁸ Nde bôt be nga bo avale Yasua a nga jô: betuni zamgbwa be nga be'e metoñ minla'a mi ntômba zamgbwa ôsu éwolo élat, be nga lôt a loñe metoñ, éwolo élate Nti é nga tôñe be mvus.

⁹ Asuzo'o nkan bita a nga wulu ôsu betuni be mbe be loñe metoñ, nkan bita ôvok ô nga zu mvus éwolo élat. Be nga wulu a tyiñe toñ.

¹⁰ Yasua a nga ve bôt atiñe na: Mia ye bo te yôtan nge bo na *tyiñ jenan é wô'é, a mia ye bo te kobô akekui *môs ma ye jô mia na: Beta'an metyiñ! Eyoñe te nje mia ye yôtan.

¹¹ Ane éwolo élat é nga tyiñelane tison éyoñe jia, a beta bulane minkan, a lôt alu valé.

¹² Ndibe tyé, Yasua a nga kôlô si, a betuni be nga be'e éwolo élat.

¹³ Betuni zamgbwa be nga be'e metoñ minla'a mi ntômba zamgbwa ôsu éwolo élate Nti, be nga beta taté dulu a loñe toñ, ngap bezimbi jia é too be ôsu, nyô fok é za'a be mvus. Be wulu'u a tyiñe toñ.

¹⁴ E môse baa, be nga tyiñelane tison éyoñ jia, nde be nga beta bulane minkan. Be nga bo avale da tañe *môs misaman.

¹⁵ Môse zamgbwale, be nga kune kôlô si a tyiñelane tison biyoñ zamgbwa, nsamba ô too nta'an avale da. Môs ôte étam ñwô be nga tyiñelane tison Yérikô biyoñ zamgbwa.

¹⁶ Eyoñ zamgbwale, betuni be nga loñe metoñ, a Yasua a nga jô be na: Beta'an metyiñe yôp, amu Nti a veya mia tison!

¹⁷ Tison ébien a biôm bise bi ne été, bia ye mane jañ a vebane ngumba e be Nti. Rahab, minga ébamba, nye étam a ye nyiiban, émien a jôm ése é ne *nda jé été, amu a nga solé belooé si bi nga lôm.

¹⁸ Ve taba'an ntyele ya nyoñ jôm ése ja yiane jañ, amu nge mia nyoñe je, mia ye soo njuk a njañ e minkan y'Israél été.

¹⁹ Argent, or a biôm bi ne mboon a mvot nge a étyé, bi ne asu Nti: bia ye nyiin akume dé été.

²⁰ Ane bôte bese be nga bete metyiñe yôp, a toñ é nga kobô. Eyoñ bôt be nga wô'ô tyiñe toñ, be nga bete metyiñ yôp a mfin meko'o ya Yérikô ô nga ku ôbiene yôp, a bôt be nga nyiine tison été, môt ase a kele ôsu vié. Ane be nga nyoñe tisone Yérikô.

²¹ Be nga jiane jôm ése é mbe tison été a nkpwaté mekôn: befam a binga, bongô a minnôm, benyak, mintômba a bijakas.

²² Yasua a nga jô bôte bebaé be nga looé si na: Kelan be minga ébamba a kuli nye atan nalé fe jôm ése é ne énjé, amu mi nga kane nye ngana.

²³ Ane bendôman bete be nga ke a kuli Rahab atan, nalé fe ésaa, nyia bobenyañ a jôm ése a nga bili; be nga kuli bebiaé bé bese atan. Nde be nga solé be atan ya minkan y'Israél, vôme njuk ô nji bo nguleya kui be be.

²⁴ Be nga di'i tison a biôm bise bi mbe été, ô vaa ve argent, or a biôm bi ne mboon a mvot nge a étyé, mbie be nga futi, ane akum ya *nda Nti.

²⁵ Yasua a nga nyii Rahab, minga ébamba a *nda bôte jé, nalé fe jôm ése a nga bili. Nde a nga nyiñ Israél été a zu kui e môse wu, amu a nga solé e bôte Yasua a nga lôme na be ke looé tison Yérikô.

²⁶ Eyoñe melu mete nje Yasua a nga kane ngana na: Biyo'é, asu be Nti, e be môt ase a ye tebe a beta lôñe tison Yérikô. Nyô a bo mbôka'a y'été a ye dimili ntôle monafame wé, a nyô a bo mimbé y'été a ye dimili monafame wé a dañ mongô.

²⁷ Nti a nga too be Yasua, ajô te duma dé e nga yiane si ése ya Kanaan.