YASUA 5 - Kalate Zambe Nnomo a Mfefe Mfefé Nkôñelan

Ntyi'ibane metyel a abô'ô pak

¹ Eyoñ bejô bôt bese ya Beamorééñ be too Yordan yat mfa'a jôb da dim, a bejô bôt ya Bekananééñ be too bebé mañ, be nga wô'ô na Nti a nga vele Yordan ôsu bone b'Israél, akekui be nga mane dañ, fek é nga jañe be mebum te fe ngule ya kuli mvebe asu bone b'Israél.

² Melu mete, Nti a nga jô Yasua na: Kôme atyeñe *mekok a beta tyi'i bone b'Israél metyel éyoñe baa.

³ Nde Yasua a nga kôm atyeñe *mekok a tyi'i bone b'Israél metyel, bebé e nkôl ô nga yôbane jôé na nkôle ntyi'ibane metyel.

⁴ Yasua a nga tyi'i be metyel amu na: Bôte bese be nga kôlô Ejipte, beyôm, befam ya mewosan, bese be nga mane wu *nkôte si e dulu zañ, valé be kôlôya Ejipte.

⁵ Bôte bese be nga kôlô Ejipte be nga tyi'ibane metye, ve ba bese be nga bialé zene *zen nkôte si, valé be kôlôya Ejipte, teke wua a nga tyi'iban atyel.

⁶ Bone b'Israél be nga wulu *nkôte si tañe mimbu mewôm menyin, akekui befam mewosan bese be nga kôlô Ejipte a be nga bo te vô'ôlô tyiñe Nti be nga mane jañ; Nti a nga kane ngana mfa'a wobe na ba ye bo te yene si, nje Nti a nga kane b'ésaa ngana na a ye ve bia, si, vôm menyañ a wôé bia len.

⁷ Nde a nga telé *bon éjiane jap, a Yasua a nga tyi'i be metyel amu be mbe minsôso, amu be nji ke tyi'iban e *zen.

⁸ Eyoñe bôte bese be nga mane tyi'iban metyel, be nga tabe vôme wua minkan akekui be nga mane yet.

⁹ Ane Nti a nga jô Yasua na: Den, ôson y'Ejipte ô keya mia ôyap: ajô te be nga yôlé vôm ate na Gilgal a kui e môse wu.

¹⁰ Bone b'Israél be nga tabe Gilgal a jem abô'ô Pak e minje'ese mi Yérikô, mamengô'é ya ngon ôsu é too melu awôm a menyin.

¹¹ Nde be nga di bibuma ya si éte: belet é ne te mvusan, a miñyañan mefes me fôn *môs ôte ôbien.

¹² Eyoñ be diya bibuma ya si éte, mametyé, ane *manna a nga man. Bone b'Israél be nji ke fe beta bi *manna, ve be nga di bibuma ya Kanaan mbu ôte.

Nyoñan Yérikô

¹³ A nga bo na Yasua a too Yérikô, nde a nga bete mis a fombô, ateme na môt a ntele nye ôsu, a bili nsoé nkpwaté mekône wo. Ane Yasua a nga subu nye bebé a sili nye na: Ye ô ne môte ya ngame jangan, ye nyô ya ngame besiñ bangan'

¹⁴ Nde a nga yalan Yasua na: Momo ve me ne njôô nsamba mewosan Nti, me ndôme so. Ane Yasua a nga ku asu é butu si, ve kañ a jô nye na: Jé nje Nti wom a jô mbo ésaé wé'

¹⁵ Nde évete nsamba mewosane Nti é nga jô Yasua na: Va'a besilefase bôé e mebo môé, amu vôm ô tele le a ne étyi. Ane Yasua a nga bo nalé.