YASUA 4 - Kalate Zambe Nnomo a Mfefe Mfefé Nkôñelan

Meko'o awôm a mebaé

¹ Eyoñe ngum ayoñ ôse ô maneya dañe Yordan, Nti a nga jô Yasua na:

² Nyoñan befam awôm a bebaé ayoñ été, *nda bôt ése môte wua.

³ Benda'ane bôte bete na: Toka'ane meko'o awôm a mebaé, ézezañe Yordan e mevôm betuni be nga tebe ne sim, éyoñe te mia ye dañe me Yordan a bôé me vôm mia ye bômbô meyôa den.

⁴ Nde Yasua a nga loone befam awôm a bebaé be nga toban e bone b'Israél été, *nda ése fame jia.

⁵ Ane a nga jô be na: Teba'an ôsu éwolo élate Nti, e Zambe wônan, mi kelek e teme Yordan, éyoñe te môt ase a to'é ako'o da a be'e de étule jé yôp, aval'ane tañe menda Israél me né.

⁶ Amu jame te da ye bo ndem be mia. Eyoñe bone benan ba ye sili mia a akiti na: Meko'o ma ma liti jé mfa'a wônan'

⁷ Mia ye yalane be na: Amu mendime ya Yordan me nga tyi'i ôsu éwolo élate Nti, éyoñ é nga dañe Yordan, ane mendim me nga tyi'i. Meko'o ma me ne ndem ya simesan biyoñ bise mfa'a bone b'Israél.

⁸ Bone b'Israél be nga bo avale Yasua a nga bendé be. Be nga vaa meko'o awôm a mebaé ézezañe Yordan, avale Nti a nga jô Yasua, a aval'ane tañe menda y'Israél é né. Nalé be nga kee meko'o mete a bôé me e vôme ya meyôa.

⁹ Yasua a nga telé meko'o awôm a mebaé ézezañe Yordan, vôm mebo betuni be nga be'e éwolo élat me nga tebe. Meko'o mete me ne valé a kui môse wu.

¹⁰ Betuni be nga be'e éwolo be nji ke jô'é nteban ézezañe Yordan, v'akekui éyoñe mam mese Nti a nga bendé Yasua na a kate bôt me maneya boban, aval'ane Môze a nga bendé Yasua. Nalé bôt be nga ji'a mane dañ.

¹¹ Eyoñe bôte bese be nga man, éwolo Nti a betuni be nga tebe bôt ôsu.

¹² Ane mvô'ô Ruben, nyô Gad a nyô éfas ayoñ Manasé be nga tebe Israél ôsu be be'e biôm mewosan, aval'ane Môze a nga bendé be.

¹³ Be mbe bôte mewosan bebé toyini mewôm menyin, be nga lôt asu be Nti, be too nkômesan ya wosan, a mesu me lumu be mfa'a minje'ese ya Yérikô.

¹⁴ Môs ôte Nti a nga nene Yasua e mise m'Israél ase, ajô te be nga semé nye avale be nga semé Môze, nté ôse a nga vee.

¹⁵ Ane Nti a nga jô Yasua na:

¹⁶ Bendé'é betuni be be'e ngaa éwolo na, be kôlô Yordan été a bete kindik.

¹⁷ Nde Yasua a nga bendé betuni na kôla'ane Yordan, mi bet e kindik!

¹⁸ Eyoñ betuni be nga be'e éwolo élate Nti be nga kôlô teme teme Yordan a dañe dañ éyoñ be nga vaa mebo map mendim a telé me e *nkôte si, nde mendim me Yordan me nga bulan e vôme wop a lôt avale me mbe me lôtôk e zañe kindi'i ébaé.

¹⁹ Bôte bese be nga kôlô Yordan a bete kindik ngon ôsu ya mbu é too melu awôm, ane be nga tabe Gilgal, nné Yérikô mfa'a jôp da tôô.

²⁰ Yasua a nga telé meko'o awôm a mebaé be nga to'é Yordan e Gilgal.

²¹ Ane a nga jô bone b'Israél na: Éyoñe bone benan ba ye sili b'ésaa bap a akiti na: Amu jé meko'o ma'

²² Mia ye tyeñele bone benan a jô be na: Israél a nga dañe Yordan nyô mvelan.

²³ Amu Nti, e Zambe wônan, a nga vele ôsôé Yordan, a kui na mi dañe wô avale Nti e Zambe wônan, a nga bo évele mañ, nje a nga vele ôsu wongan a kui na bi mane dañ.

²⁴ Nalé a nga boban amu na *meyoñ mese ya *si nyô me yeme na wo Nti ô ne éwôlô, a na, mi ko Nti wônan woñe melu mese.