YASUA 3 - Kalate Zambe Nnomo a Mfefe Mfefé Nkôñelan

Ndañan Yordan

¹ Yasua a nga kôlô si mametyé. Eyoñ be kôlôya Sitim, nde be nga kui Yordan, émien a bone b'Israél bese; ane be nga bômbô valé alu da abôñe Yordan, te na be dañe nye.

² Be teb'ôsu ya ayoñ be nga bômane minkan tañe melu mela.

³ Eyoñe te be nga bendé bôte na: Eyoñ mia ye yen éwolo élate Nti e Zambe wônan, nalé fe betuni, bone be Lévi, be be'e je, mia ye kôlô e vôm mi né éyoñe ji, a wulu je e mvus.

⁴ Ve zañe jenan a éwolo te, ja ye bo nté menyi'i me mo toyini: a te subane je bebé, ajô te mia ye yeme zene mia ye ke, amu mi ngenan te tame lôte *zen éte éyoñ éfe.

⁵ Yasua a nga jô bôte na: Tunane miabebien, amu Nti a ye bo bitua bi mam a akiti e zañe jenan.

⁶ A nga jô fe betuni na: Beka'an éwolo élat a ke bôt ôsu. Nalé be nga be'e éwolo élat a wulu bôt ôsu.

⁷ Nde Nti a nga jô Yasua na: Ma ye taté nene wo e mise m'Israél ase e môse wu, nalé ba ye yeme na me too fe be wo, avale me nga too e be Môze.

⁸ Ve wo yiane bendé betuni be be'e éwolo élate na: Éyoñ mi kuiya kindi'i ôsôé Yordan, éyoñe te mia ye tebe ôsôé été.

⁹ Ane Yasua a nga jô bone b'Israél na: Suba'ane ma bebé mi wô'ô jame Nti, e Zambe wônan a kobô mia.

¹⁰ Nde a nga jô na: E jame di nde da ye bo mia mi yeme na Zambe a ne vevee a ne zañe jenan a na a ye wôlé meyoñe mana si jap miabebien mi lôô: Beétieñ, Beférézieñ, Begirgazieñ, Beamorééñ a Beyébuzieñ.

¹¹ Nalé a ne na éwolo élate Nti ya si ése ja dañe Yordan mise menan me lôô.

¹² Ajô te éyoñe ji, nyôñane bôt awôm a bebaé be so'o *meyoñ y'Israél été, ayoñ ese môte wua.

¹³ Nné ane betuni be be'e éwolo Nti, Nyô ya si ése, ba ye nnambe mendim me Yordan a mebo si ya mebo map, mendim me Yordan ma so akôé ma ye tyi'i a ma ye tebe a bo beta avise wua.

¹⁴ Eyoñe bôt be nga kui atane ya menda bindelé mabe na ba dañe Yordan, betuni be nga be'e éwolo élat be nga tebe be ôsu.

¹⁵ A éyoñ bebe'e éwolo be nga kui Yordan, mebo betuni be nga be'e éwolo ke me nnambe mendim, amu minsa'a mi Yordan mise mi wô'ô dimesane mendime si, nté ôse nkôane bidi wo boban,

¹⁶ ane mendime ya ôsôé akôé me nga tebe, a bete yôp a bo avise da, ôyab a tison ba loone Adam, nje é ne bebé Tartañ; wôna mendim ya nké ma suane mañ ba loone Araba me ne ve nkuu nku, me ki me nga tyi'i fo'o ne bem. Ane bôt be nga dañ zôsôôô a Yérikô mfa'a ya yat.

¹⁷ Nde betuni be nga be'e éwolo élate Nti be nga tebe ne sim a mebo ézezañe Yordan, a Israél ase a nga lôt e nkôt'été, akekui bôte bese be nga mane dañe Yordan.