YASUA 23 - Kalate Zambe Nnomo a Mfefe Mfefé Nkôñelan

Yasua a leb'Israél

¹ Ayab'éyoñ e nga lôt, ataté éyoñ Nti a nga ve Israél awo'on a kôté nye e mo besiñ be nga bômane nye. Valé Yasua a ntoo nnôm a *mvendé môt.

² Ane a nga bañete Israél ase: bemvendé bé, minlô mi bôte mié, betyi'i mejô bé a bivete bié ya mewosan. Nde a nga jô be na: Me ntoo nnôm a *mvendé môt.

³ Mia mi nga yene mam mese Nti, e Zambe wônan, a nga bo *meyoñ mana mese amu mia. Amu Nti, e Zambe wônan, nye a nga wosan e señe jenan.

⁴ Mi lôô, a *asimba, me maneya ve mia *meyoñ me li'iya ma na mi nyoñe me ane ngap, aval'ane *meyoñ menan me né, ataté Yordan a *meyoñ mese me nga jian, a kui mañ me ne anen, mfa'a jôp da dim.

⁵ Nti, e Zambe wônan, a ye tindi me me ke mia ôyap, a wôlé be mesi map ôsu vienan; mia ye nyoñe si jap avale Nti, e Zambe wônan, a nga jô mia.

⁶ Ve jeñan a ngul'ése ya ba'ale a bo mam mese me ne ntilan e kalate metiñe Môze, te ke nye fefel mfa'a ya mbo nnôm, nge mbo ngal,

⁷ nalé mia ye bo te bundan a *meyoñ mia be be mi too mana. Mia ye bo te tote jôé bezambe bap, nge belane de e mengana menan été. Mia ye bo te kañe be, nge kute be meboñe si.

⁸ Ve mia ye kabetan a Nti, e Zambe wônan, avale mi boya a kui e môse wu.

⁹ Nti a nga wôlé *meyoñ me ne anen a ngul mesi mi lôô ma: a kui den, teke môt a tebeya, nge vo mia.

¹⁰ Môte wua ya be mia a nga kui na, a titane bôte toyini: amu Nti, e Zambe wônan, a nga wosan asu denan, aval a nga jô mia.

¹¹ Ajô te, taba'ane ñhe ntyel, *a nye'e Nti, e Zambe wônan.

¹² Nge mia yale feñ, a timbi a *meyoñ mevo'o mia be be mi too ma, nge mia lat a me ajô meluk, a nge mia bundan a me,

¹³ tuka'a yemane na, Nti, e Zambe wônan, a ye bo te ke ôsu a wôlé *meyoñ mete mesi ôsu vienan. Ve *meyoñ mete ma ye bo mia avot a ôlam, nkasa wo bibi mia mevel, a biyo e mise menan été: akekui mia ye jañ e mbamba si Nti, e Zambe wônan, a veya mia.

¹⁴ Mi lôô, ma ke den, e vôme jôm ése é ne si ja ke. Mia yem a nleme wônan ôse, a ényiñe jenan ése na: Teke ajô da ya mbamba mejô mese Nti, e Zambe wônan, a nga kobô mia e nga bo te bo ésaé: mese me maneya tôéban asu denan, teke da e li'iya te bo ésaé.

¹⁵ Ve yemane na: Avale mbamba mejô me Nti, e Zambe wônan, a nga jô mia, me maneya tôéban asu denan, nalé fe Nti a ye tôé ayaa ese e nyôle jenan, akekui a maneya jiane mia e mbamba si Nti, e Zambe wônan, a veya mia nyô.

¹⁶ Nge mia tyam élate Nti, e Zambe wônan, a nga yôtan asu denan, nge mia ye kañe bezambe befe a kute meboñe menane si ôsu viap, ayaa Nti da ye yôñ e nyôle jenan, a mia ye ji'a jañ e mbamba si a veya mia.