YASUA 22 - Kalate Zambe Nnomo a Mfefe Mfefé Nkôñelan

Ata'a metuna'a e Yordan yat

¹ Yasua a nga loone bone be Ruben, ba be Gad a ba b'éfas ayoñe Manasé,

² a jô be na: Mi nga bo e jam ese Môze, mbo ésaé Nti, a nga bendé mia, a mi nga bo tyiñe jam mewôk mfa'a ya jam ese me nga bendé mia,

³ den melu abui, mi nji ke li'i bobenyoñ, a mi nga bo abendé Nti, e Zambe wônan, a nga bendé mia.

⁴ Amu Nti, e Zambe wônan, a veya bobenyoñ benan awo'on avale a nga jô: mi ntoo nguleya bulan e menda bindelé menan, e mfa'a si jenan é né, nje Môze, mbo ésaé Nti, a nga ve mia e Yordan yat.

⁵ Bômba'an évévé ya bo abendé a atiñe Môze, mbo ésaé Nti, a nga bendé mia, mia yiane nye'e Nti, e Zambe wônan, wula'an e mezene mé mese été: bo'on mebendé mé, kabeta'an a nye, a saane nye a nleme wôé ôse a nyôle jôé ése Nge na a ényiñe jôé ése, nalé éfia néfes, nkobô beyude, ja liti fe.

⁶ Nde Yasua a nga botane be a suu be be ke: nalé be nga ke e menda bindelé map.

⁷ Môze a nga ve éfas ayoñe Manasé ngap e Basañ, wôna a nga ve éfas évo'o ngap e Yordan yat, mfa'a jôp da dim. Eyoñ Yasua a suuya be be ke e menda bindelé map, a nga botane be,

⁸ a jô be na: Bula'an e menda bindelé menan a abui akum, abui mimbam biyem, abui moné, or, mvot, étyé a mengômesan, mia be bobenyoñ mi kaba'ane biôm mi nga sa besiñe benan.

⁹ Ajô te bone be Ruben, ba be Gad a ba b'éfas ayoñe Manasé, be nga bulane valé, be kandaneya bone b'Israél bevok e Silô, si ya Kanaan, be kelek e si ya Galad, nyô be nga nyoñe ngap, aval'ane Nti a nga bendé a anyu Môze.

¹⁰ Eyoñ be nga kui mefôla me Yordan ma wô'a si ya Kanaan, nde bone be Ruben, ba be Gad a ba éfas ayoñe Manasé be nga lôñ ata'a metuna'a e Yordan. Ata'a metuna'a te e mbe beta jôme ya yen.

¹¹ Bone b'Israél bevok be nga wô'ô na bone be Ruben, ba be Gad, a ba b'éfas ayoñe Manasé be lôñeya ata'a metuna'a te, *zôsôô a si ya Kanaan, mefôla me Yordan me ne éfase bone b'Israél.

¹² Eyoñe bone b'Israél be nga wô'ô jame te, nde bôte bese be nga sulan e Silô a ke wosane be.

¹³ Bone b'Israél be nga lôme Finéas, e mone Eléazar, *ntuni, e be bone be Ruben, Gad a éfas ayoñe Manasé,

¹⁴ baa be bivet awôm be nga ke, *nda bôt ése évete jia, mfa'ayoñ ese ya *meyoñ y'Israél; bese be mbe minlô ya menda me bôte map, ézezañe betoyini y'Israél.

¹⁵ Nde be nga ke e be bone be Ruben, Gad a éfas ayoñe Manasé, e si ya Galad, a kobô na:

¹⁶ Avale di nde ékôane bôte Nti ése ja jô na: Melo mi boya Zamba Israél ma ma tinan aya, amu mi lumeya Nti mvus, a lôñe ata'a metuna'a, mfa'a ya bene njôane Nti môse wu'

¹⁷ Ye *abé Péor e ne mone jam e mfa'a wongan, a too ke na, a kui môse wu, bi ngenan te tuneban mfa'a ya mbia jam ate, a mbia ébubua a nga suan ayoñe Nti e zañ!

¹⁸ Ve den mi beteya lume Nti mvus! Nge mia bene Nti den, akiti a ye wô'ô ngum ayoñ Israél ôse ôlun.

¹⁹ Nge si é ne ngabe jenan é nji ke bo *mfuban, a ntoo ñhe ve kean e si é ne ngabe Nti, e vôm étaba'a jé é né, éyoñe te mia bi ngap ézezañe jangan, ve te benane njôane Nti, a te kubane bia nyô, a lôñ ata'a metuna'a e too te di Nti, e Zambe wongan.

²⁰ Eyoñ Akan, e mone Zéra, a nga bo nalé mfa'a ya jôm é mbe na ja yiane jañ, Israél ase a nga tôban ayaa Nti. Sa ny'étam a nga wu amu mbia mboone wé.

²¹ Bone be Ruben, ba be Gad a ba b'éfas ayoñe Manasé be nga yalane bivet betoyini y'Israéle na:

²² Zambe, Zambe, Nti, Zambe, Zambe, Nti, ny'étam *a yem! A Israél nye fe a ye yeme de! Nge amu mbenane njôan, nge melo e mfa'a Nti, te nyii bia e môse wu!

²³ Nge bi nga lôñ'ata'a metuna'a asu ya ngaa a mimvean, nge asu ya bo mimvean ya late Zambe ngbwa, Nti Emien a sili'i bia sito'o y'été!

²⁴ Bebela na, jame te e nji ke bo ane mia simesan; ve bi nga bo de, amu bi nga bili biyebe, a simesane na: A akiti, bone benan be za jô émbangane na: Élat évé é ne e zañe jenan a Nti, e Zamba Israél'

²⁵ Nti a nga bôôé Yordan nné e zañe jangan a mia, bone be Ruben a bone benan, nde émbangan ba ye bo te beta ko Nti woñ.

²⁶ Ajô te bi nga jô biabebiene na: Mbo'on ésaé a lôñe ata'a metuna'a, saa kik asu mimvean mi ne ngum nge asu metuna'a,

²⁷ v'aval'ane ngaa e zañe jangan a mia, nalé fe e zañe bone bangan éyoñ bi maneya wu, bi kañe Nti ôsu vié a mimveane miangan mi ne ngum, biyem biangan bia ye ve a mimveane miangan ya late Zambe ngbwa: nalé bone benan ba ye bo te jô émbangan a akiti na: Ngap é nji ke bo mia e be Nti!

²⁸ Bia te jô na: Nge ba kobô bia avale nkobô te a akiti, nge kobô de e be bone bangan, bia ye yalane na: Yenan éve'ela ata'a metuna'a Nti, nje b'ésaa bangan be nga bo, saa ke amu mimvean mi ne ngum nge metuna'a, ve aval'ane ngaa e zañe jangan a mia.

²⁹ Ajô te e nji ke bo bebé e be bia na bi bene njôane Nti nge lume nye mvuse den, amu nlôñan ata'a metuna'a, asu mimvean mi ne ngum, asu zesé mimvean, nge asu mimvean ba ve ane metuna'a e fefel'ata'a metuna'a Nti, e Zambe wongan, nyô a ne ôsu y'étaba'a jé!

³⁰ Eyoñe Finéas, *ntuni, nalé fe bivete ya ayoñ a minlô betoyini y'Israél ba be be nga too, be nga wô'ô mejô me bone be Ruben, Gad a éfas ayoñe Manasé be nga kobô, be nga vak.

³¹ Nde Finéas e mone Ntuni Eléazar, a nga jô bone be Ruben, Gad a éfas ayoñe Manasé na: Bia yeme dene na Nti a ne ézezañe jangan, amu mi nji ke seb'étome ji mfa'a Nti, a amu nalé, mi kôtéya bone b'Israél e wo Nti.

³² Finéas, e mone Ntuni Eléazar, a bivet, be nga kôlô e be bone be Ruben, Gad, a éfas ayoñe Manasé, si ya Galad, a bulan e si ya Kanaan, e be bone b'Israél, a kate be foé.

³³ Ane bone b'Israél be nga vak amu foé éte: nde be nga botane Zambe, a be nji fe beta kobô ajô ya ke bita, a jiane sii bone be Ruben, a bone be Gad be nga too.

³⁴ Nde bone be Ruben a bone be Gad be nga yôlé ata'a metuna'a te jôé be jô'ô na: Ata'a metuna'a di e ne ngaa e zañe jangane na Nti a ne Zambe.