YASUA 20 - Kalate Zambe Nnomo a Mfefe Mfefé Nkôñelan

Bitison bisaman ya sobô

¹ Nti a nga kobô Yasua na:

² Kobô'ô bone b'Israél na: Tela'an e mfa'a wônan, bitison ya sobô, mbie me nga kobô mia a anyu Môze.

³ Môt a ye vañe wôé môt, nge wôé nye e fu'an, a ne nguleya tup a ke wé. Bitison bite bia ye bo mia mevôme ya sobô nkune metyi.

⁴ Ñwôé bôt a ye mate, a ke e tisone jia y'été; a ye tebe anyiine *mbé ya tison, a kañete bemvendé ya tison éte e jam a bili; éyoñe te ba ye nyoñe nye e fefele jap, e tison été, a ve nye vôme ya tabe baa be be e tison été.

⁵ Nge nkune metyi a tôñe nye, bemvendé ba ye bo te kalane ñwôé môt e mo mé: amu a nga wôé môt a ne nye bebé e fu'an, amu a nji tame taté bo nsiñe wé.

⁶ A ye tabe e tison été akekui a tebeya asu betyi'i mejô ya ayoñ, a ke fe kui éyoñe Monti *ntuni a bo bisaé melu mete a wuya. Eyoñe te nje ñwôé môt a ye kôlô a bulan e tisone jé a e *nda jé, e tison vôm a nga tup.

⁷ Nde be nga telé Kadés e Galilé, nkôle Néftali; Sikem nkôle Efrayim, a Kiryat-Arba a ne Ebroñ, nkôle Yuda.

⁸ E Yordan yat, mfa'a jôp da tôô, be nga telé Yérikô; mfa'a ya *nkôte si, e nje'ese ayoñe Ruben, be nga telé Besér; Ramôt mfa'a ya Galad, ayoñe Manasé été.

⁹ Bitisone bi, mbie bi nga teléban asu bone b'Israél bese, a asu *ntabe ô too ézezañe jap. Nalé nyô ase a ne wôé môt e fu'an a ne mate, a ke sobô été, a bo te wu e mo me nkune metyi, éyoñ a ngenan te tebe asu betyi'i mejô ya ayoñ.