YASUA 18 - Kalate Zambe Nnomo a Mfefe Mfefé Nkôñelan

Ngabe si * meyoñ mevo'o zamgbwal

¹ Ane bôte bese y'Israél be nga sulan e Silô. Nde be nga lam nd'éndelé bendôba'ane valé, a koone na, si ése é ntoo éjôé jabe si.

² Valé *meyoñ ya be be me ngenan te nyoñe ngabe si jap.

³ Nde Yasua a nga jô bone b'Israél na: Mia ye bo njem a fianga ya nyoñe si Nti, e Zambe b'ésoo benan a veya mia akekui éyoñ évé'

⁴ Ayoñ ése é tobôk bôte belaa, a ma ye lôme be be ke bo jam éziñ: ba ye kôlô a wulu e si ése, a tili aval'ane mengap ya si éte me né, wôna, ba ye beta bulan e be ma.

⁵ Ba ye kabe je ngabe zamgbwa. Yuda a ye li'i mfa'a minné mié ya nké mi né, a *nda Yôsep ja ye tabe e minné mié y'akôé.

⁶ Wôna, mia mia ye kaban abime si e li'iya, tañe mengap zamgbwa, éyoñe te mia ye zu liti ma nkabane te, a ma ye bo *asimba, asu denan asu be Nti, e Zambe wongan.

⁷ Ve Belévit ba ye bo te nyoñe ngap ézezañe jenan, amu ésaé betuni é ne ngabe jap, wôna Gad, Ruben a éfas ayoñ Manasé be nga nyoñe ngap e Yordan yat, mfa'a jôp da tôô, ngabe Môze, mbo ésaé Nti, a nga ve be.

⁸ Nde bôte bete be nga kôlô si a ke. Yasua a nga bendé beve'e si na: Kelan a bômane si, a ve'e je, éyoñe te mia ye bulan e be ma: ma ye bo *asimba, asu denan asu be Nti e Silô.

⁹ Nalé bôte bete be nga ke, a mane tyi'ilane si ése: nde be nga mane ve'e je, tañe mengabe zamgbwa a mane tili me e ngume kalat'été, aval'ane bitison bi né. Ane be nga bulane be Yasua e minkane Silô.

¹⁰ Nde Yasua a nga bo *asimba asu dap, asu be Nti, a a nga kabe si e be *meyoñ zamgbwa y'Israél me nga li'i, aval'ane me mbe nkaban.

Bényamin

¹¹ Ngabe si bone be Bényamin é nga vebane be be, a *asimba, aval'ane mebume map me né. Nné wop a mbe e zañe bone be Yuda a bone be Yôsep.

¹² Mfa'a y'akôé, nné ate a nga taté Yordan, a bet avele Yérikô akôé, a bete nkô, mfa'a jôp da dim, a kele vam e *nkôte si ba loone Bét-Avén.

¹³ A beta lôte valé, a kui e Luz, avele Luz é ne Bétél e nké, a siliki Atarôt-Adar e nkôle yôp ô ne Bétôroñ e nké.

¹⁴ Mfa'a jôp da dim, nné a nga vit mfa'a ya mañ e nké, ataté nkôl ô ne *zôsôô a Bétôroñe nké, a ke vam e Kiryat-Bal, nye a ne Kiryat-Yearim, tisone bone be Yuda mfa'a jôbe da dime le.

¹⁵ Mfa'a ya nké ô mbe ô taté'é aku'u Kiryat-Yearim. Nné a mbe a kuik e jôbe da tôô, a kui fe anjeñ mendim me Néftôa.

¹⁶ Nné a nga siliki e susu'a nkôl ô ne *zôsôô a mbi'ili Bén-Inom, e mbi'ili Refayim akôé. A siliki mbi'ili Inom, avele Beyébuzieñ nké, a beta siliki a kui Eyin-Rogél,

¹⁷ a lôt akôé a ke kui Eyin-Sémék, a kui fe e Gelilôt, nye a ne *zôsôô a abete nkôle Adumin, a siliki ako'o Bôañ, mona Ruben.

¹⁸ A lôt avele nkôl'akôé, *zôsôô a Araba.

¹⁹ A beta lôt avele Bét-Ogla akôé, a ke vam e mañ me nku akôé, mfa'a ya asuane Yordan e nké: nné ya nké nye le.

²⁰ Mfa'a ya jôp da tôô, Yordan nye a mbe nné. Ngabe si bone be Bényamin, aval'ane mebume map me né, a minné mié mimfa'a mise, nye le.

²¹ Bitison bi bone be Bényamin, aval'ane mebume map me né mbie bi: Yérikô, Bét-Ogla, Emék-Késis;

²² Bét-Araba, Semarayim, Bétél;

²³ Avim, Para, Ofra;

²⁴ Kéfar-Amonayi, Ofni a Géba; bitison awôm a bibaé a minlame miap.

²⁵ Gabaoñ, Rama, Beérôt;

²⁶ Mispé, Kefira, Môsa;

²⁷ Rekém, Yirpeél, Tareala;

²⁸ Séla, Eléf, Yebus, nye a ne Yérusalém, Gibeat a Kiryat: bitison awôm a binyin a minlame miap. Ngabe si bone be Bényamin, aval'ane mebume map me né, nje le.