YASUA 17 - Kalate Zambe Nnomo a Mfefe Mfefé Nkôñelan

Ngabe si éfas ayoñ Manasé

¹ Ayoñe Manasé, ntôle mone Yôsep, e nga nyoñe fe ngap. Makir, ntôle mone Manasé, a too fe ésaa Galad, a nga nyoñe Galad a Basañ, amu a mbe môta mewosan.

² Bone be Manasé bevok be nga nyoñe fe ngap, aval'ane mebume map me né: bone b'Abiézer, bone b'Elék, bone b'Asriél, bone be Sikem, bone b'Efér, bone be Semida, mbe be mbe bobefam be Manasé, e mone Yôsep.

³ Telôfad e mone Efer e mone Galad, e mone Makir, e mone Manasé a nji biaé monafam ve bobebinga, be too môé na: Mala, Nôa, Ogla, Milka a Tirsa.

⁴ Ane be nga zu be Ntuni Eléazar, asu be Yasua mona Nun, a asu bivet, a jô na: Nti a nga bendé Môze na: A ve bia ngabe si e zañe bobejañ. Nde be nga ve be ngap e zañe bobenyañ b'ésaa wop, aval'ane abendé Nti e mbe.

⁵ Be nga ve Manasé mengab awôm a mboon *asimba, te lañe Galad a Basañ e Yordane yat.

⁶ Amu bobebinga be Manasé be nga nyoñe ngap e zañe bobefame bé, a Galad a mbe asu bobefam be Manasé bevok.

⁷ Nnéa si Manasé a nga taté Azér a kui Mikméta, *zôsôô a Sikem, a siliki e yamim, mfa'a bôte ya Eyin-Tapua be too.

⁸ E si é nga bômane Tapua é mbe jôme bone be Manasé, ve Tapua émien a mbe jôme bone b'Efrayim.

⁹ Nnéa si ate a nga siliki ôtôñe kana, mfa'a ya nké. Bitison bite bi mbe ngabe Efrayim, ézezañe bitison bi Manasé. Nnéa si Manasé ôtôñ akôé a nga vame mañ.

¹⁰ Efuse si ya nké é mbe ji Efrayim, ji ya akôé kik é too ji Manasé, mañ me too be zañ; be nga nnambe éfuse si Azér mfa'a y'akôé, éfuse si Isakar mfa'a jôp da tôô.

¹¹ Bifuse bi si Isakar a Azér été, Manasé a nga bili: Bétséan a bitison bi nga tii a nye, Yiblim a bitisone bié, bôte ya Dor a bitisone bié, bôte ya Eyin-Dor a bitisone bié, bôte ya Tanak a bitisone bié, bôte ya Megidô a bitisone bié: ngoto éla.

¹² Bone be Manasé be nji bo nguleya nyoñe bitisone bite, a bôte ya Kanaan be nga kômbô tabe si éte.

¹³ Eyoñe bone b'Israél be nga bo ngul abime da yian, ane be nga timili bôte ya Kanaan alo, ve be nji ke wôlé be bitisone biap.

¹⁴ Ane bone be Yôsep be nga kobô Yasua na: Amu jé ô nga ve bia vôme wua ane ngap, abôta si da, bi ke bi too abime beta ayoñe bôte di, amu Nti a botaneya bia a kui éyoñe ji'

¹⁵ Yasua a nga yalane be na: Nge mi ne beta ayoñe bôt, kelan afan, a li vôm éziñ e sii Beférézieñ a Berefayim, amu nkôl Efrayim ô dañeya wo ôbametan.

¹⁶ Nde bone be Yôsep be nga jô na: Nkôle te ô se nguleya yiane bia; nalé fe na bevagoñ bityé be ne e be bôte bese ya Kanaan be too mbi'ili, ba be ne Bétséañ a bitisone bié, a ba be ne mbi'ili Yizrél.

¹⁷ Ajô te Yasua a nga jô *nda Yôsep, Efrayim a Manasé na: Ô ne beta ayoñe bôt, a ngule jôé é ne anen, woo ye ke nyoñ éfuse si é ne tyôtyoé.

¹⁸ Ve wo ye nyoñe nkôl, akôsa bo na nkôle te ô ne afan: wo ye ba'é bilé y'été, a yene beta mfi été. Wo ye wôlé bôte ya Kanaan si jap, akôsa bo be bili bevagoñ bityé a, akôsa bo be ne ngul'abui.