YASUA 16 - Kalate Zambe Nnomo a Mfefe Mfefé Nkôñelan

Efuse si bone b'Efrayim

¹ Akap e nga veban be bone be Yôsep e nga taté Yurdéñ, bebé Yérikô, e jôp da tôô, e lôte *nkôte si wo yené, ataté e Yérikô nkôle Bétél.

² Beta nkôle a kui Luz, a lôt a ke nné Bearkieñ Atarôt.

³ A siliki e jôp da dim, nné Beyafeletieñ, a kui éfuse si ya Bétôroñ nké, a ke fe kui Gézér na e vam e mañ.

⁴ Ngabe *bon be Yôsep nje le: Manasé baa Efrayim.

⁵ Nné *bon b'Efrayim nye nyô, aval'ane mebume map me né: nné ya ngabe jap a mbe mfa'a jôp da tôô: Atarôt-Adar, a kui Bétôroñ akôé.

⁶ Nné a nga kui mfa'a jôp da dim, étune ya Mikmétat akôé, a beta kôñelan mfa'a jôp da tôô, étune ya Taanat-Silô a tyi'ilan e jôp da tôô, mfa'a ya Yanôa.

⁷ Akôlô ya Yanôa, nné a siliki mfa'a ya Atarôt a Naarata, a nnambe Yérikô, a ke vame Yordan.

⁸ Akôlô a kôlô Tapua, a lumbu mfa'a jôp da dim, ôtôñe Kana, a ke vame mañ. Ngabe si *bon b'Efrayim, aval'ane mebume map me né, nje le.

⁹ Nalé fe bitison bi nga veban asu *bon b'Efrayim ézezañ ya ngabe bone be Manasé, bise a minlame miap.

¹⁰ Ve be nga bo te wôlé Bekananééñ be nga too Gézér si jap. Bekananééñ bete be nga tabe ézezañe jap a kui môse wu. Ve be too alo ya bo be bisaé.