YASUA 12 - Kalate Zambe Nnomo a Mfefe Mfefé Nkôñelan

Bejô bôt Israél a nga wôé

¹ Bana be ne bejô bôte ya si éte, mbe bone b'Israél be nga wôé a nyoñe si jap e Yordan yat, mfa'a jôp da tôô: akôlô mbi'ili Arnon a kui nkôle Ermon, a Araba ase mfa'a jôp da tôô:

² Sioñ, njô bôte Beamorééñ a nga too Hesboñ. A nga bili éjôé ataté Aroér, tison é ne nsa'a ôtôñ Arnon, a ataté ézezañ ôtôñ, éfase jia ya Galad, akekui ôtôñ Yabôk, nné bone b'Amon.

³ A nga jôô fe ataté Araba akekui mañ ya Kinérôt mfa'a jôp da tôô, a ke fe kui mañ ya Araba, mañ me bili nku, e jôp da tôô mfa'a ya Bét-Yesimôt; nalé fe mfa'a ya nké e meyo me nkôle Pisga.

⁴ A si Og, njô bôte ya Basañ, wua ya Benefayim be nga li'i, a nga too Astarôt a Edré.

⁵ A nga jôô si minkôle ya Ermon, Salka, si ése ya Basañ a kui nné si Begézurieñ a Bemakatieñ, nalé fe éfase baa ya Galad, ba Sioñ njô bôte ya Hesboñ be too nné.

⁶ Môze, mbo ésaé Nti, a bone b'Israél, be nga bôé be; a Môze, mbo ésaé Nti, a nga ve si jap ane ngap e be bone be Ruben, bone be Gad a bone be éfas ayoñ Manasé.

⁷ Bana be ne bejô bôt Yasua a bone b'Israél be nga bôé, éyoñe te be dañeya Yordan, mfa'a jôp da dim, ataté Bal-Gad mbi'ili Libañ, a kui nkôle Halak ô tele mfa'a ya Séyir. Yasua a nga ve si jap ane ngap, mfa'a *meyoñ ya Israél aval'ane me ne nkaban,

⁸ Si minkô, nje'ese Araba a bone minkô, *nkôte si a Négéb: si Beétieñ, Beamorééñ, Bekananééñ, Beférizieñ, Beévieñ a Beyébuzieñ:

⁹ Njô bôt ya Yérikô wua, njô bôte ya Ayi mfa'a ya Bétél wua;

¹⁰ njô bôte ya Yérusalém wua, nyô ya Ebroñ wua,

¹¹ njô bôte ya Yarmut wua, nyô ya Lakis wua;

¹² njô bôte ya Egloñ wua, nyô ya Gézér wua;

¹³ njô bôte ya Debir wua, nyô ya Géder wua;

¹⁴ njô bôte ya Orma wua; nyô ya Arad wua;

¹⁵ njô bôte ya Libna wua; nyô ya Adulam wua;

¹⁶ njô bôte ya Makéda wua, nyô ya Bétél wua;

¹⁷ njô bôte ya Tapua wua, nyô ya Efer wua;

¹⁸ njô bôte ya Afék wua, nyô ya Lasaron wua;

¹⁹ njô bôte ya Madon wua, nyô ya Asor wua;

²⁰ njô bôte ya Simron-Méron wua, nyô ya Akaf wua;

²¹ njô bôte ya Tanak wua nyô ya Mégidô wua;

²² njô bôte ya Kédék wua nyô ya Yôknam mfa'a ya Karmel wua;

²³ njô bôte ya Dor e mefôla mesi ya Dor wua, nyô ya Gôyim bebé Gilgal wua;

²⁴ njô bôte ya Tirsa wua; bese be mbe bejô bôte mewôm mela a wua.