YASUA 11 - Kalate Zambe Nnomo a Mfefe Mfefé Nkôñelan

Beta bita bebé mendim me Mérôm Mewosan mfa'a ya akôé a mfa'a * mebuka'a mevo'o ya si

¹ Eyoñe Yabin njô bôte ya Asor a wô'ôya foé nyô, a nga lôme minlôman e be Yôab njô bôte ya Madon, nalé fe e be Simron a e be nyô ya Aksaf,

² e be bejô bôt be too minkô mfa'a ya akôé, ba be too Araba, Kinarôt mfa'a ya nké, ba be too si é ne nje'ese a ba be ne mfa'a jôp da dim, mefôla ya Dor,

³ e be Bekanéeñ be too mfa'a jôp da dim, e be Beamorééñ, e be Beétieñ, e be Beférézieñ, e be Beyébuzieñ be too minkô, e be Beévieñ be too nkôle Ermone si, si ya Mispa.

⁴ Bese be nga kui atan a minsamba mewosane miap; be mbe abui ane nselek ô ne abui e nsa'a mañ, bikabela a bevagoñ bita babe fe be too étua abui.

⁵ Nalé bejô bôt bete bese be nga bo akôna a vule minkan bebé mendim me Merôme na be wosane Israél.

⁶ Ane Nti a nga jô Yasua na: Te ko be woñ, amu a akiti aval'awolo di, ma ye ve be bese e mo me Israél be too mbalan meveñ bebé ya wu. Wo ye tyi'i bikabela biap mimbiaé a di'i bevagoñ bita bap e nduan.

⁷ Ane Yasua a bôte bé bese ya bita be nga suan vôm be nga too mendim me Mérôm atemetem, nalé be nga ku be yôp.

⁸ A Nti a nga ve be e mo me bone b'Israél; be ve bôé be a titane be a kui beta Sidoñ, a kui fe Misrefôt-Mayim, a kui mbi'ili ya Mispa mfa'a jôp da tôô; Israél a nga wôé be môte wua te li'i.

⁹ Yasua a nga bo be avale Nti a nga jô nye na a bo: A nga tyi'i mimbiaé ya bikabela biap a di'i bevagoñ bita bap e nduan.

Yasua a nyoñe tison Asor

¹⁰ Melu mete, éyoñ Yasua a bulaneya mvus, a nga nyoñe tison Asor a wôé njô bôte wé a nkpwaté mekôn. Bebela a ne na, melu mvus, Asor nye a mbe nlô tison ya bijôé bite bise.

¹¹ Ajô te be nga wôé be a nkpwaté mekôn a jiane bôt bese be mbe été: Teke jôm éziñ ja vebe é nga li'i, a be nga di'i Asor a nduan.

¹² Yasua a nga nyoñe fe bitison bejô bôt bete bese a bejô bôte bap bese, a nga wôé be a meyo me nkpwaté mekôn a jiane be avale Môze, mbo ésaé Nti a nga bendé.

¹³ Ve Israél a nji ke di'i tison éziñ e bitison ya minkô vengevenge ve Asor, nye Yasua a nga di'i.

¹⁴ Ane bone b'Israél be nga sa akum ese ya bitison bite a mimbam biyem; ve be nga jiane bôt bese a meyo me nkpwaté mekôn, akekui be nga mane wôé be bese, jôm ja vebe teke li'i.

¹⁵ Jame Nti a nga bendé Môze mbo ésaé wé, nde Môze a nga bendé Yasua, a Yasua a nga bo de, a nji ke biasé jam éziñ ya mam Nti a nga bendé Môze.

¹⁶ Avale te nde Yasua a nga nyoñe si: nkôle Négéb ôse, si ése ya Gôzen, nje'ese Araba, nkôle Israél a ngabe jé é ne nje'ese.

¹⁷ Ataté nkôle Halak ñwô wo yené mfa'a ya Séyir, a kui Bal-Gad, e beta mbi'ili ya Libañ, nkôle Ermone si, a nga nyoñ bejô bôte bap bese a bôé be, a wôé fe be.

¹⁸ Yasua a nga wosane bejô bôte bete melu abui.

¹⁹ Teke tison éziñ é nga bo élate *mvo'é a Israél, vengevenge ve Gabaoñ, vôm Beévieñ be nga too. Be nga nyoñe bie bise a mewosan.

²⁰ Amu Nti nye a nga ve minleme miap teke éngôngo, a mane wôé be, avale Nti a nga bendé Môze.

²¹ Melu mete fe Yasua a nga ke vaa bone b'Anak minkôle ya Ebroñ, Debir, Anab, minkôle mise ya Yuda a mi ya Israél: a nga jiane be a bitisone biap.

²² Teke mone Anak éziñ a nga beta li'i e si bone b'Israél, vengevenge ve e Gaza, Gat a Asdôd.

²³ Nalé ate nye Yasua a nga nyoñe si ése, avale Nti a nga jô Môze, a Yasua ke a nga ve je Israél, é bo ngabe jap aval'ane *meyoñ me ne nkaban. Ataté éyoñe te, si é nga bo évôvoé teke fe bita.