YASUA 10 - Kalate Zambe Nnomo a Mfefe Mfefé Nkôñelan

Bita bi nga boban bebé Gabaoñ a nyoñan mesi mfa'a ya nké

¹ Eyoñ Adoni-Sédék, njô bôte ya Yérusalém a nga wô'ô na Yasua a nyoñeya Ayi a jiane nye ase, a na a boya Ayi a njô bôte wé avale fe a nga bo Yérikô a njô bôte wé, a na bôte ya Gabaoñ be nga bo élate *mvo'é a Israél, a be ntoo fe ézezañe jap,

² a nga dañe ko woñ; amu Gabaoñ a mbe beta tison, éfunan ane jia ya bitison bi njô bôt, anen a dañe Ayi, a bôte bé bese be mbe biwôlô.

³ Ane Adoni-Sédék, njô bôte ya Yérusalém a nga lôm Oyam, njô bôte ya Ebroñ na: Piram njô bôte ya Yarmut Yafia, njô bôte ya Lakis a Debir njô bôte ya Egloñ tyiñe na:

⁴ za'ane me né a volô ma na bi wosane Gabaoñ amu a boya élate *mvo'é ba Yasua a bone b'Israél.

⁵ Nalé bejô bôt bete ya Beamorééñ be too na nyô ya Yérusalém, nyô ya Ebroñ, nyô ya Yarmut, nyô ya Lakis a nyô ya Egloñ, be nga bet a minsamba mewosane miap mise; nde be nga vule minkane miap ôsu Gabaoñ a wosane nye.

⁶ Eyoñe te bôte ya Gabaoñ be nga lôme Yasua *tyiñ e Gilgale na: Te jô'é bebo bisaé bôé, jika'a zu a kôté bia, volô'ô bia; amu bejô bôt bese ya Beamorééñ be too si minkô be boya élat ya wosane bia.

⁷ Ane Yasua a nga ke Gilgal baa be bôt bese ya bita, a biwôlô bi bôt bise ya mewosan.

⁸ Nalé Nti a nga jô Yasua na: Te ko be woñ, amu me veya be mo môé, a teke wua y'été a ye tebe ôsu viôé.

⁹ Nde Yasua a nga kui be be atemetem. A nga wulu ngum alu ataté Gilgal.

¹⁰ Ane Nti a nga tyamelane be asu Israél a jiane be mbia njian e Gabaoñ, a titane be zene ja ke Bétôroñ a wôé be a kui Azéka a Makéda.

¹¹ Eyoñe be mateya Israél a kui Bétôroñ: nde Nti a nga wua beta *mekok me so'o yôp a ku be yôp a kui Azéka, nalé be nga tu'i awu; ba be nga wu a meta'a *mekok be mbe abui a dañe ba bone b'Israél be nga wôé a nkpwaté mekôn.

Yasua a telé jôp a ngon

¹² Ane Yasua a nga kobô Nti *môs a nga ve Beamorééñ e mo me bone b'Israél, nde a nga jô Israél a too na: A jôp, tebe'e vôm ô tele Gabaoñ, a wo, ngon, e mbi'ili Agalôn.

¹³ Nalé jôp e nga tebe te fô'ôsan, a ngone fe é nga tebe akekui éyoñ Israél a kuneya émien e be besiñ bé. Jame di e ne ntilane kalate Yasar. Ane jôp e nga tebe ézezañ yôp teke ji'a lumbu bebé ngume *môs.

¹⁴ Môs ôfe ô nji tame bo ane wuli nge ôsu nge mvuse na Nti a vô'ôlô tyiñe môt; amu Nti a nga wosan ajô Israél.

¹⁵ Ane Yasua a Israél ase be nga bulan minkane Gilgal.

¹⁶ Nde bejô bôte betan be nga mate a ke sobô mbas akok Makéda.

¹⁷ Nde be nga kate Yasua foé na: Bejô bôt betan be solô mbas akok Makéda.

¹⁸ Ane Yasua a nga jô na: Feneka'an beta *mekok a nyiine mbas akok, mi tele fe bôt be ba'ale be.

¹⁹ A mia te teban, ve tôñane besiñe benan a bo te ve be éyoñ ya sobô a te kañesane na be nyiine bitisone biap, amu Nti, e Zambe wônan, a veya be mo menan.

²⁰ Eyoñe Yasua a bone b'Israél be maneya wôé be mbia ñwôan a jiane be, ô vaa ve ba be nga tup a kui bitisone bi mbe nlôñan alem,

²¹ ane bôte bese be nga bulane minkane be Yasua Makéda, teke môt a nga beta bañ ôyem a kobô môte ya bone b'Israél.

²² Yasua a nga jô na: Di'ane anyiine *mbé ya mbas akok, a kuli ma bejô bôt betan atan.

²³ Nalé be nga kuli bejô bôt be mbe mbas ako'o été atan a zuu be be Yasua: njô bôte ya Yérusalém, nyô ya Ebroñ, nyô ya Yarmut, nyô ya Lakis a njô bôte ya Egloñ.

²⁴ Eyoñ be maneya kuli bejô bôte bete atan a zuu be be Yasua, ane Yasua a nga loone bôte bese y'Israél, a jô minlô mi bôte mewosan baa be be be nga wulu na: Za'ane bebé, beta'ane mebo menan e metyiñe bejô bôte bana. Nde be nga subu bebé a beté mebo e metyiñe map.

²⁵ Yasua a nga jô be na: Te koone woñ a te fô'ôban, bo'one ngul a ayok, amu avale di nde Nti a ye bo besiñ benan bese mia ye wosane be.

²⁶ Eyoñe te Yasua a nga su'ulan bo na be wôé bejô bôte bete; a nga tyelé be bilé bitane yôp a be nga tyele bilé bite akekui mamengô'é.

²⁷ Bebé éyoñ jôp da dim, Yasua a nga ve tyiñe na be vaa be bilé. Ane be nga wua be mbas ako'o be nga sobô été a dibe anyiin a beta *mekok. Beta meko'o me ne valé a zu kui môse wu.

²⁸ Môs ôte ôbien ñwô Yasua a nga nyoñ Makéda, a jiane nye a nkpwaté mekôn, nalé fe njô bôte wé. Ane a nga jiane be a môt ase a nga too été. Teke môt éziñ a nga li'i te wu, a a nga bo njô bôte ya Makéda avale fe a nga bo njô bôte ya Yérikô.

²⁹ Yasua, a Israél ase a too nye nsamba, a nga kôlô Makéda a ke Libna a wosane nye.

³⁰ Ane Nti a nga ve fe nye mo m'Israél a njô bôt y'été; nde Israél a nga bôé nye a meyo me nkpwaté mekôn, a wôé fe bôte bese be mbe été. Teke môte wua a nga fam awu; avale a nga bo njô bôte ya Yérikô, avale te fe a nga bo nyô ya Libna.

³¹ Akôlô ya Libna, Yasua a Israél ase a too nye nsamba a nga kui Lakis; nde be nga vule minkan ôsu vié a wosane nye.

³² Ane Nti a nga ve Lakis e mo m'Israél. Nde a nga nyoñeban e môse baa a bôéban a meyo me nkpwaté mekôn; avale Israél a nga bo Libna avale te fe a nga bo bôte bese be nga too Lakis.

³³ Eyoñe te Oram, njô bôte ya Gézér a nga zu volô Lakis. Nalé Yasua a nga wôé nye baa be bôte bé teke li'i to'o ve môte wua.

³⁴ Ane Yasua, a Israél ase a too nye nsamba a nga kôlô Lakis a kui Egloñ; nde be nga vule minkan ôsu vié a wosane nye.

³⁵ Môs ôte ôbien ñwô be nga bôé nye a meyo me nkpwaté mekôn a bôt bese be nga too été; nde Yasua a nga jiane nye *môs ôte ôbien avale a nga bo Lakis.

³⁶ Ane Yasua, a Israél ase a too nye nsamba, a nga kôlô Egloñ a kui Ebroñ a wosane nye.

³⁷ Nde be nga nyoñe nye a bôé nye a meyo me nkpwaté mekôn, tison Ebroñ ébien, njô bôte wé, bitison bise bi mbe éjôé jé si a bôte bese be nga too été, avale fe a nga bo Eglôn. Yasua a nji li'i too ve môte wua, a nga jiane Ebroñ ase a bôte bese be nga too été.

³⁸ Akôlô ya valé Yasua a Israél ase a too nye nsamba, a nga fombô tison Debir a wosane je.

³⁹ Ane a nga nyoñe je, tison éte ébien, njô bôte wé a bitison bise bi nga too éjôé jé si; nde be nga bôé be a nkpwaté mekôn a jiane bôte bese be nga too été, teke li'i to'o ve môte wua. Nalé Yasua a nga bo Debir a njô bôte wé avale fe a nga bo Ebroñ, Libna a njô bôte wé.

⁴⁰ Ajô te Yasua a nga mane bôé si ése: éfase ya minkô, Négél, Séféla, mevôm me ne ôbe mbetane yôp, nalé fe bejô bôte bap bese; a nji li'i to'o ve môte wua, a nga jiane jôm ése é bili mvebe, aval'ane Nti, Zambe ya Israél, a nga bendé nye.

⁴¹ Nalé ate Yasua a nga bôé be ataté Kadés-Barnéa e Gaza, si ése ya Gôzen a kui Gabaoñ.

⁴² Eyoñ jijia nje Yasua a nga mane nyoñe mesi mete a bejô bôte bap, amu Nti, Zamba Israél, a nga wosan e señe Israél.

⁴³ Ane Yasua, a Israél ase a too nye nsamba, a nga bulan e minkan Gilgal.