YAKOB 5 - Kalate Zambe Nnomo a Mfefe Mfefé Nkôñelan

Ngo'o mia minkukum

¹ Eyoñe ji a mia minkukum, yônane beta ñyônan, amu bidim bia ye kui be mia.

² Akume denan e ne ébo, mengômesane menan me maneya diban a si? ibem.

³ E or wônan a argent wônan bi maneya bili mieñgele, a mieñgele ate a ye bo ngaa a wosane mia, a ye di minsône mienan aval ane nduan. Mi nga kôan akume mevis e melu ma su'ulan.

⁴ Fomba'ane ma'ane bebo bisaé be nga kôane bidi e mefube menan, mi biya me a ma yôn, a miñyône bekôane bidi, mi kuiya e melo me Nti ya *minsamba mewosan.

⁵ Mi nga bi ényiñ é ne ngu a édima e *si nyô. Mi nga ve minleme mienane bidi e môse ba tyi'i biyem.

⁶ Mi nga ve mekua, a wôé zôsôa môt, a nji kange mia.

Njiban a nsoone Nti

⁷ Ajô te jiba'an, a bobejañ, akekui nsoone Nti. Fomba'ane *mbé mefup. A yange mbamba bibuma te bo ôjeja'a, nté ôse a ngenan te kolé mintôle bibuma a bi bia su'ulan.

⁸ Mia fe jiba'an. Bo'one ngule minlem, amu nsoone Nti ô ntoo bebé.

⁹ A bobejañ, te somane ba bevok, nde mia ye sa'ale ntyi'ane mejô. Mi lôô Ntyi'i mejô a tele mimbé yôp.

¹⁰ Mfa'a minjuk a njiban, éve'ela jenan é ne bekulu mejô be nga kobô a jôé Nti.

¹¹ Mi lôô ane bia se'e ba be nga jibi na be bili ébotan. bôt ba jibi. Mi nga wô'ô nkañete njibane Yob, a yene nsôñane Nti mfa'a wé. Nti a ne *mvam abui, a nkoone bôt éngôngo.

Yaa ve yaa a momo ve momo

¹² Ve jam ôsu a bobejañ, te kalane yôp, nge si, nge avale nkal éziñ afe. Yaa wônan a bo'o ve yaa, a momo ve momo. Nde mia ye sa'ale mo ya ntyi'ane mejô.

Ajô meye'elan

¹³ Ye môt éziñe ya be mia a wô'ô mintaé? A ye'ela'an. Y'a wô'ô mevak? A yi'a bia.

¹⁴ Ye môt wua ya be mia a kon? A lo'one bemvendé be keké, a be ye'elan éyoñ be maneya wo'o nye mbon a jôé Nti.

¹⁵ Meye'elane ya mbunan ma ye nyii nyô a kon. Nti a ye bete nye si. A nge a nga bo mam me ne *abé, ma ye jambane nye.

¹⁶ Memane mam *abé menan, bana e be ba bevok, a ye'elan ajô ba bevok, nde mia ye yet. Meye'elan me zôsôa môt ma bo beta be mam.

¹⁷ Elie a nga too môt ane bia, a nga ye'elan a mban ôse na, mveñ é bo te nnoñ. A mveñ é nji nnoñe *si nyô nté mimbu mila a ngon ésaman.

¹⁸ Ane a nga beta ye'elan, mveñ ve nnoñ, a si ve beta ve bibuma bié.

Ndutane ba ba kop

¹⁹ A bobejañ, nge wua ya be mia a kobeya *zen a li'i benya mejôô, a ba beta dutu nye,

²⁰ yemane na, nyô a dutu mbo *abé a li'i mbia zene wé, a ye nyii nsisime wé, a a ye bo mam *abé abui na, me jamban.