YAKOB 4 - Kalate Zambe Nnomo a Mfefe Mfefé Nkôñelan

E bôte minleme miap mi ne nkaban

¹ Mejô a mintañete bia so vé be mia? Bia so e mbia minkômbane mienan mmie mia wosan e menyôle menan été.

² Mia nyamete ve teke bi. Mi ne bewôé bôt a éviele, ve teke nguleya kui vôm. Mia luman a juan. Mi nji bi, amu mi nji bo ba ba ja'é.

³ Mia ja'é ve te nyoñ, amu minja'ane mienan mi nji sôñe jam e ne mvaé, ve mimvômane mienan.

⁴ A binga bijabô! Ye mi nji yeme na nye'ane *si nyô ô ne ziñ ja wosane Zambe? E môt a kômbô bo mvôé a *si nyô a bo émiene nyô a siñe Zambe.

⁵ Nge na, ye mia buni na mimfufube mintilan mia kobô ékobôkobô vôme mia jô na: Zambe a kômbô a *aban ese, *nsisim a nga toé e be bia été.

⁶ Ve a dañe bo mvaé éyoñ a liti *mvam. Amu ajô te mintilan mia jô na: Zambe a wosane bôt be ne mebun, ve a mvamane ba ba suu bebiene si.

⁷ Ajô te su'ane miabebiene si be Zambe. Ve benane njôane Satan a a ye tube mia ôyap.

⁸ Suba'ane Zambe bebé, ndemben a ye subu mia bebé. Sôbane mo menan, mia bebo mam *abé a lumane minleme mienan, mia e bôt mi ne minleme nkaban.

⁹ Miabebien yemane na mi ne bingôngol, jaéne meyep, yônan. E vioé wônan ô kôñela'an awu a meva'a menan jame da te'e nyô.

¹⁰ Su'ane miabebiene si asu Nti, a a ye bete mia yôp.

Mveane môte mfe mekua

¹¹ A bobejañ, te koban *abé mia mia. E môt a kobô monyañ *abé nge tyi'i monyañ ajô, a kobô *atiñ abé, a tyi'i fe *atiñ ajô. A nge wo tyi'i *atiñ ajô, ô nji bo ane metiñ ma jô, ve nyô a tyi'i metiñ ajô.

¹² Amu môte wua nye a ne ntelé metiñ a *ntyi'i mejô. Nye étam a ne ngule ya nyii a wôé. O ne za e wo tyi'i ébe môtô ajô'

Bejeñ akum a beka'a mam

¹³ Ngo'o mia mia jô na: Den nge akiti bia ye ke e tisone nyô nge nyuli. Bia ye tabe wé ngume mbu, bia ye bo makit a bi moné,

¹⁴ mia mi nji yem akiti ya binyiñe bienan. Amu mi ne ve ndutu a kui nté éziñ a mané.

¹⁵ Mi li'i jô na: Nge Zambe a kañese, bia ye nyiñ a bo jame di nge dili.

¹⁶ Mia wulu ngunguane ya énguñe jenan. Ngunguan avale te ô ne *abé.

¹⁷ E môt a yeme bo mbamba jam ve te bo nye, a be'e mekua ya mboon *abé.