YAKOB 1 - Kalate Zambe Nnomo a Mfefe Mfefé Nkôñelan

¹ Ma, Yakob, mbo ésaé Zambe a Nti Yésus Krist, ma tili *meyoñ awôm a mebaé me ne *mmialan e yôbe yôp. Mbôlané!

² A bobejañ, nyoñane *meve'ele mese ma kui e be mia a mbamba *nlem,

³ mi yeme na, e *meve'ele mbunane wônan wo tôbane me, ma kô'ôlane njiban.

⁴ Ve na, njiban ô bo'o ésaé, nde mia ye bo nya *mvo'é a njalan, teke jam éziñ e ne *abé be mia.

Meye'elane me mbunan

⁵ Nge fe'e ja jembane môt éziñe ya be mia, a jaké'é je Zambe, nye a ve bôte bese tyi'ibi tyi'ibi, te minkomekan, ja ye vebane be nye.

⁶ Ve a jaké'é a mbunan, teke bone bisô biziñ. Amu e môt a sôan, a funane ntyôa mañ, ñwô évuñulu ja tindi.

⁷ Môt avale te a bo'o te ve'e fe'e na, Nti a ye ve nye jôme si jôme ka.

⁸ Amu a ne môt a nee nleme nkaban, nyô a yeñelan.

Nkukum a nzôzoé

⁹ E monyoñ a ne *nzôzoé a yene mvaé éyoñ a betebane yôp,

¹⁰ a nkukum avale da, éyoñ wo silibane si. Amu a ye lôt aval ane same ya afup.

¹¹ Amu éyoñe jôp e tôôya, ayôñe dé da kôtô bilok, sam é koo, a abeñe dé ya yen a mis é mané. Avale dada nkukum wo ye jañ e zañe ya bisaé bié.

Ajô * meve'ele ényiñe mbunan été

¹² Ebotan a e môt a jibi *meve'ele, amu na, éyoñ a kabeya, a ye nyoñ ékate duma ya ényiñ é ne ntiñetan e be ba ba nye'e nye.

¹³ Môt éziñ a bo'o te jô, éyoñ a tôbane *meve'ele na, *meve'ele ma so ma be Zambe. Amu Zambe a vo'o bo *abé, nalé fe émien a vo'o ve'ele môt.

¹⁴ Môt ase a tôbane *meve'ele amu minkômbane mié émien mia du'u nye, a dutu nye.

¹⁵ Eyoñ nkômban ô nyoñeya abum, wo biaé *abé, a éyoñ *abé e tôlôbôya, da su'ulane biaé awu.

¹⁶ Te du'uban, a bobejañ ma nye'e.

¹⁷ Mfañe mvean ôse, a nya das ase, bia so yôp, e be Esaa bifufup, nye a ne teke ntyendan nge nsisiñe ya nkôñelan.

¹⁸ Amu mbamba nkômbane wé, a nga biaé bia a benya mejôô ya anyu dé, nde bia ye bo *bembômô ya mintéane mié.

Nwô'an a mboone mejô me Zambe

¹⁹ Simesa'an ajô di a bobejañ ma dañe nye'e, môt ase a bo'o avôle ya wôk, ve ôte'ete'e ya kobô a ôte'ete'e ya yaa.

²⁰ Amu ayaa môt e nji jalé nkômbane Zambe a ne *zôsôô.

²¹ A na, va'ane mvin ése a *nkpwala ôse wo nemban. Nyoñane mejô me ne mbéane be mia a évôvoé *nlem, mme me ne ngule ya nyii binyiñe bienan.

²² Ve bo'one bôt ba bo mejô, saa ve bewô'étam, mi za du'u miabebien.

²³ Nge môt a wô'ô mejô, ve te bo me, a funane môt a yen asu dé a nga bialé de e ngobé

²⁴ A mane yen émien, a kelé, été été, a vuane jôm a funane je.

²⁵ Ve môt a beme mis e mbamba *atiñ, e di ya éto beti a tôñe de, saa ve ñwô'an étam, ve bo ane da ye'ele, môt ate a ye yene mvaé ya mimboone mié.

²⁶ Nge môt éziñ a buni na a ne mbuni Zambe, ve te bi ôyeme vié ngbwak, a du'émien, mbunane wé ô ne zesé.

²⁷ Nya mbunane a ne *mfuban a tee ayeñ, asu Zambe Esaa, nye nyô: njomane bobenyui a minkus e minju'u miab été, a nsa'alane *si nyô asu ya bo te bili mvin.