Tt 3 - Kalate Zambe Nnomo a Mfefe Mfefé Nkôñelan

Bewosane mbunane biyoñ bia su'ulan

¹ Wômôlô'ô bôte bese melo na, ba yiane suu bebiene si e be betebe ôsu ya éjôé a ba be bili ngule njôan. Ba yiane bo mewôk a tabe nkôman asu mbamba mboon ase.

² Te ta môt, a sa'ale meluman, a yené *mvo'é e be bôt, a liti ndeme nje'ebane *nlem e be bôte bese.

³ Amu melu mvus, bia fe bi nga too mekut, bebene njôan, ñyalane feñ, belo minkômban mise a mimvôman mevale mese, a nyiñ ézezam a minyamete été, angôndô *abé, a siane bia bia.

⁴ Ve éyoñe mvame Zambe Nyii wongan, a nye'ane wé mfa'a bôt, bi nga yené,

⁵ a nga nyii bia, saa amu mimboone biabebien bi nga bo e *zôsôô été, ve amu nkoon éngôngole wé, a zene mewoban me mfefé abialé a mvumelane Mfufube Nsisim a ve.

⁶ Nsisim ate nye a nga miase be bia abui abui, amu Yésus Krist Nyii wongan,

⁷ nde, éyoñe bi kabeya amu mvame jé, bia ye bo benyoñe ngab ényiñe ya melu mese amu ndi minlem é né.

⁸ Njôane wu ô ne wu ya buni. Ma yi na ô tu'a yemete wô, nde ba bese be buniya Zambe, be ve ngu mfa'a mbamba mimboon. Mam mete me ne mvaé, a mvolan e be bôt.

⁹ Ve zesé minjeñan, nlañane bindan, môman, nsañeta'an ajô metiñ, sa'ale'e bie: bi ne zezé a teke mvolan.

¹⁰ Telé'é môt a bili ékotekote nye'elan e fefe, éyoñ ô lebeya nye éyoñe jia nge bibaé, te wôk.

¹¹ Wo yeme na, avale môte te e ne njañane fé, mbo mam *abé, a ne nyô a ve émiene mekua.

Mebendé a mebatan

¹² Eyoñe me lômeya wo Atémas nge Tisik, jeñe *zen ése ya zu koone ma Nikapolis. Valé nye me tyi'iya na, ma ye lôt ôyôn.

¹³ Tuka'a kômesane dulu Zénas, ñye'ele metiñ, a Apôlôs na, jôm é bo te jembane be.

¹⁴ Bôte bangane fe ba yiane yé'é na be tulan ôkup e mbamba mimboon, mfa'a ya kôme mam ma siliban avôl avô. Be za yené be too te bibuma.

¹⁵ Bôte bese bia be be bi too, ba batane wo. Bata'ane me ba ba nye'e bia e mbunan été. Mvam é tabe'e be mia bese.