Tt 1 - Kalate Zambe Nnomo a Mfefe Mfefé Nkôñelan

Mebatan

¹ Paul, mbo ésaé Zambe a nlômane Yésus Krist, asu ya kee mintobane mi Zambe e mbunan a e ñyemane benya mejôô, aval ane ényiñe mbunan ja yian,

² amu ndi *nlem ényiñe ya melu mese, nje éte Zambe nyô a ne te laa minsos, a nga ve ngaka'a te na biyoñe ya nnôm éto bi ntoo.

³ A nye ate a nga liti ajô dé e biyoñ bi mbe ntélan a zene ya foé é nga vebane be ma, aval ane abendé Zambe nyii wongan e né.

⁴ Ma tili Tite, nya mone wom ya mbunan ô ne bia fufulu, *mvam a *mvo'é bi bo'o be wo, bi so'o be Zambe Esaa a be Krist Yésus nyii wongan.

Nta'ane mame ya keké

⁵ Nge me nga li'i wo e Kréte, e mbe amu na ô sondô mane ta'a mam, a telé bemvendé e tison ése, avale me nga kate wo.

⁶ Môt ase ya be be, a yiane bo tee bijô, nnôm a bili minga wua, a bili *bon ba buni, mbe bete môt a se nguleya bo'olô mbia ntaban nge melo.

⁷ E ne *zôsôô na bisop a bo te bijô, amu a ne mba'ale akume Zambe: tee mbia anyu, nge avôle ya yaa, nge nyuu bilam, nge njuane mendum, nge e nyoñe ma'an me ne ôson.

⁸ A yiane yeme nyoñe bôt, mvôé mbamba be mam, évôvoé, *zôsôô, étyi, njôô émien,

⁹ nkabetane benya mejôô ya buni ngu, mme mete me tele e nya nye'elane yôp. Nde a ye bo ngule ya lebe bôt e nya nye'elan été a dibe ba ba wosane nye menyu.

Mbia beye'ele

¹⁰ Bôte melo, bekobô bikobôkobô, a beduu bôt be ne abui, e nsamba bôt be ne te ntyi'ibane metye.

¹¹ Ba yiane dibe be menyu. Ba tyame mingumba menda me bôt, a ye'ele mam me nji yian, asu ma'an me ne ôson.

¹² Wua ya be be, *nkulu mejô wobe bebien a nga jô na: Bekrétôa be ne belaa minsos éyoñ ése. Betit be ne ayok, mbe ba bo ésaé ve ndian.

¹³ Ngaa ate a ne été. Ajô te, bamé'é be a ayo'o ese, nde ba ye bi mbunan ô ne *mvo'é.

¹⁴ Be bo'o te kabetane minkana. Beyude, nge metiñe me bôt, mbe bete ba lume benya mejôô mvus.

¹⁵ Jôm ése é ne *mfuban e be ba be ne *mfuban. Ve mfa'a ba be ne mvin a ba bene buni, teke jôm é ne mfuban; Ve atyeñe dap a mone môte ya nleme wop be ne mvim.

¹⁶ Ba meme na ba yeme Zambe, ve ba kate nye e mimboone miab été. Be ne angôndô y'abé, bikange kange, te ngule ya bo mbamba jam éziñ.