SOFONI 2 - Kalate Zambe Nnomo a Mfefe Mfefé Nkôñelan

Melep asu bôt minlem mi ne nje'eban

¹ Sula'an a fas, a ayoñe bôt e ne te wô'ôson,

² te na ntyi'an ô boban, nalé fe te na *môs ôte ô za lôté ane ôyôme zesé nkôt élok, te na ayaa Nti e za'a kui be mia, te na môse ya ayaa Nti ô za'a kui be mia.

³ Jeñane Nti, mia bôte bese ya si minlem mi ne ne mieññ, a mia tôé abendé dé! Jeñane nya ntyi'ane mejôô, jeñane nje'ebane minlem! Ndô'ôtô na mia ye fam e môse ayaa Nti da ye bo.

Ayaa asu * meyoñ bikuu

⁴ Amu Gaza a ye li'i bilik, Askalôn ki a ye bo ne sangaññ. Ba ye titan Asdôd e zañe *môs, a Ekroñ a ye tébane si.

⁵ Bidim a e bôt be too fefele mañ, a ayoñe Bekérétieñ, amu ajô Nti e ne mia ngame yat, Kanaan, si Befilisteñ. Ma ye tyame wo, a wo ye bo teke fe bôt be too be wo.

⁶ Nsa'a mañ wo ye bo fo'o ve mevôme betit ba di bilok, fo'o ve menda beba'ale mintômba, a mebemba mimbame biyem.

⁷ Nsa'a mañe te wo ye bo asu *mebuka'a me *nda Yakob; nde ba ye ve mimbame betite miap bidi valé; ba ye bômbô si mamengô'é e menda ya Akalôn été; amu Nti, e Zambe wop a ye wosan asu dap, a bulane soo minkôme miap.

Ayaa asu * meyoñ me too e jôbe da dim

⁸ Me nga wô'ô meta ya Môab a *minkobô mi ébiasé mmie bone b'Amon be nga sili mie ayoñe bôte dame si, a kôlô si a wosane minné mi si mié.

⁹ Ajô te, ane me vee! Nalé Nti ya *minsamba mewosan, Zambe ya Israél a jô, Môab a ye bo ane Sodom, a bone b'Amon ane Gomor, nalé a ne na: e vôm a ne njalan a mbia bilok, ako'o nku, ôsone jam nnôm éto; *mebuka'a ya bôte bam ma ye be sa, bôt ba ye nyiñ ayoñ dam été, ba ye nyoñe mevôm mete ane ngap.

¹⁰ Mam mete ma ye kui be be amu mebune map, amu be nga wu a ôsame a wosane ayoñe bôte Nti ya *minsamba mewosan.

¹¹ Nti a ne ékowoñe be be; amu a ye bo azezambe ese ya si ve momo jôm; mebôta me si ya meyoñe mañ ma bômane me ma ye kute meboñe si asu dé abôta si ese e vôme wé.

Ayaa asu meyoñe ya nké a akôé

¹² A bôte ya Etiôpi nkpwaté mekône wom wo ye fe jii mia.

¹³ A ye same wo wé a wosane bôte ya akôé, a ye wôé Beasirieñ a bo Ninive ne sangaññ, a bo nye si é ne ayet ane *nkôte si.

¹⁴ Mimbame biyem mia ye bo nye étaba'a jap, Betite mevale mese: ngôkoé ba mvep ba ye bômbô e mendo'o mé été; *tyiñ ja ye yôn é so'o vundi. Bilik bia ye bo anyiine mbé amu biôm be nga bo a bilé bi sédre bia ye téban.

¹⁵ Tame ñhe yene tisone mevak éte, nje é nji bi jame ya tyelé nleme yôp, a ja jô nleme wé été na: ve ma, fo'o ve ma! Jia! E ntoo jôm ôlun, étaba'a betit! ba bese ba lôte je bebé ba loñe vioñ a febe wo.