SOFONI 1 - Kalate Zambe Nnomo a Mfefe Mfefé Nkôñelan

¹ Ajô Nti, di e nga katebane be Sôfôni, mone Kusi, mone Gedalia, mone Amaria, mone Ezékias, melu Yôzias mone Amon a nga too njô bôt e Yuda:

Nti a bemen Yuda a Yérusalém

² Ma ye jiane biôm bise ne meñ e *si nyô, nalé Nti a jô;

³ ma ye jiane bôt a betit, ma ye jian anone ya yôp a kose ya mañ, mam ma kolé bôt ôbak a e bôt be n'abé, ma ye jiane jôm ése é ne môta binam e *si nyô, nalé Nti a jô.

⁴ Ma ye same wo wom a liti Yuda njuk avale te fe ma ye bo e bôt bese be too Yérusalém; ma ye vaa jôm ése é li'iya vôme nyô é too asu Baal. Jôé betuni ba saane nye, ba be bevee metuna'a,

⁵ ba ba kute meboñe si e mendil, Ôsu ya ateté ya yôp, ba ba kute meboñe si a kalane Nti, be kala'ane fe njô bôte wop.

⁶ Ba be nga lume Nti mvus a ba be nji jeñe Nti, nge sili nye mam.

Môse Nti

⁷ Evô asu be Nti a too nnôm éto! Amu môse Nti ô ntoo bebé. Amu Nti a maneya kômesane metuna'a, a maneya tun e bôt a nga bañete.

⁸ Ve e môse metuna'a Nti, ma ye tebe bivet a bone be njô bôt e ngame yat. Nalé fe ma ye bo ba bese be be'e mengômesan ya *meyoñ mefe.

⁹ Môs ôte, ma ye tebe môt ase a yôô *mbé ya Nda Zambe yôp e ngame yat, nalé fe mfa'a ba jalé Nda Nti wop a évô a mvô.

¹⁰ Môs ôte, nalé Nti a jô, Minyôn mia ye wô'é ataté *mbé bekos, a mintat mfa'a tison ôvok, a beta éduñ mfa'a ya minkô.

¹¹ Yian, a mia bôt mi too Makték! Amu bôte bese ya Kanaan be jañeya, ba bese be be'e argent be maneya tyi'iban.

¹² Melu mete, ma ye tyase Yérusalém a belambe. A ma ye ke e bôt be vu'u e biôm be maneya naane yôp e ngame yat, a mbe ba jô e minleme miap été na: Nti a ne teke bo mvaé ng'abé.

¹³ Akume dap da ye saaban, a menda map ma ye li'i bifut. Be nga lôñe menda ve ba ye bo te tabe me. Be nga bé mefube mindik, ve ba ye bo te nyu woon y'été.

¹⁴ Môse Nti ô ntoo bebé, ô ntoo bebé, wo zu avôl avô; éduñe ya môse Nti ja bo mbene na ô yôn mbia ñyônan.

¹⁵ Môs ôte ô ne môse y'ayaa, môse y'ôlun a biyebe, môse y'éndaman a ébitan, *môs ô ne ékukut a dibi, môse *nkut a ôtita,

¹⁶ e môse toñ a mbetane tyiñ bia ye bo, asu ya wosane bitison bi ne ngu, a azomezome menda da dañ ôyabe yôp.

¹⁷ Ma ye futi bôt ôlun été, a ba ye wulu ane mindindim, amu be nga bo Nti abé; metyi map ma ye mialan ane mbuluk, a minsône miap ane mbuan.

¹⁸ Argent a or wop ba ye bo te nguleya nyii be. E môse ya ayaa Nti; si ése ja ye dik a nduane ya abane dé, éyoñ ba ye soñe njañan ya bôte bese be too si nyô ñwô ô ne angôndô.