SAMUEL ÔSU 9 - Kalate Zambe Nnomo a Mfefe Mfefé Nkôñelan

Saül a ke be Samuel e Rama

¹ Môt éziñe ya ayoñe Bényamin a too jôé na Kis mona Abiél ndaé Seror, ndile Bekôrat, ôwuabañ Afia, mona mone Bényaminite, A mbe ngungule môt a éwôlô.

² A nga bili monafam jôé na Saül, étua abeñ ésoé ndôman, abeñ a bone b'Israél bese, a dañe fe bese ayap.

³ Beyale bijakase be Kis, ésaa Saül, be nga jañ; nde Kis a nga jô Saül, e mone wé na: Nyoñe wua ya bebo bisaé, kôlô'ô si a ke jeñe beyale bijakas.

⁴ Nde a nga tulan minkôl, teke yene be; a nga beta tulane si ba loone Kaalim, teke jôm! A beta lôt e sii Bényamin, teke yene jôm.

⁵ Be nga kui e Suf a Saül a nga jô mbo ésaé ba nye be mbe nsamba na: Za'a bi bulan amu na ésaa wom éyoñ a vuaneya beyale bijakas, a ye viane bi nju'u *nlem amu bia.

⁶ Nde mbo ésaé a nga yalane nye na: Da tôbane na môta Zambe a ne e tisone nyô, bôte bese ba semé nye; jam ése a jô da boban avale a te jô. Nkelek, ndô'ôtô na a ye kate bia e zene bia yiane tôñ.

⁷ Nde Saül a nga jô mbo ésaé wé na: Ve nge bia ke, jé bia ye ve môta Zambe? Amu bidi bi nji beta bo e bikpwaé biañgan été, a bi nji bi jôm éziñe ya ve môta Zambe. Bi bili jé'

⁸ Ane mbo ésaé a nga beta nyoñe nkobô a jô Saül na: Me bili mone nsañe moné, ma ye ve nye môta Zambe, a a ye liti bia e zene bia yiane tôñ.

⁹ Melu mvus, môt a ke sili nkômbane Zambe a mbe a jô'ô na za'a bi kean e be ñyene mam! Amu môt ba loone dene na *nkulu mejô, be nga loone nye melu mvuse na ñyene mam.

¹⁰ Saül a nga jô mbo ésaé wé na: Ô kobôya *mvo'é! Za'a ñhe bi ke! Nde be nga ke e tisone môta Zambe a nga too.

¹¹ Eyoñ be beteya e tison, be nga tôbane bobebinga be kele laé mendim ane be nga jô be na: Ye ñyene mam a ne va'

¹² Be nga yalane na: Yaa a ne wo ôsu; éyoñe ji kel'avô, amu a te zu e tisone den, amu ntyi'ane biôm wo yiane boban den asu bôt e vôm a ne mbetane yôp.

¹³ Eyoñ mia ye kui a nyiin e tison, mia ye koone nye te na a beté e vôm a ne mbetane yôbe na a di; amu bôt baa ye ke di te na a soya, amu a yiane botane mvean; e mvuse valé nje bôt be ne nloon ba ye di. Ajô te betan éyoñe ji, a ana'ana mia ye koone nye.

¹⁴ Eyoñe be nga kui ézezañe tison, Samuel a nga ke tôbane be e vôm ba bet e *nda yôp.

¹⁵ A tatéya bo na, môse wua ôsu, te na Saül a so, Nti a nga kate Samuel

¹⁶ na: A Akiti, aval'éyoñe di, ma ye lôme wo môte ya Bényamin, wo ye wo'o nye mbone na a bo nliti zene ya bôte bam Israél. A ye nyii bôte bam e wo Befilisteñ; a me Fombôya bôte bam amu ñyône wop ô beteya a kui be ma.

¹⁷ Eyoñe Samuel a nga yene Saül, Nti a nga jô nye na: Môt me nga jô wo nye nye le; nye a ye bi éjôé e be bôte bam.

¹⁸ Nalé Saül a nga subu Samuel bebé e *mbé tison a jô na: Liti'i ma, ma ye'elane wo, e vôme *nda ñyene mam é né.

¹⁹ Nde Samuel a nga yalane Saül na: Tôñe ma mfa'a éto y'ékôndô'ô yôp. Bia be mia bia ye di den. Ma ye jô'é wo ô ke mametyé, a liti wo e jam ése é ne wo *nlem.

²⁰ Te tyelé nleme yôp amu beyale bijakase biôé bi ne njañan dene melu mela, amu be yenéya. Za a nee e mam mese me n'édima Israél? Ye sa wo a ndaa ésoo ése'

²¹ Saül a nga yalane na: Ye me nji bo môte ya Bényamin, ayoñe da ya *meyoñ ma dañe tyôtyoé Israél? Ye abume dam é nji dañe tyôtyoé e mebum mese y'ayoñe Bényamin? Amu jé wo kobô me nalé'

²² Ane Samuel a nga nyoñe Saül a mbo ésaé wé, nd'a nga nyiñeli be aba *nda a ve b'éto ôsu ya bôt be mbe nloon, be mbe bebé bôte mewôm mela.

²³ Eyoñe te Samuel a nga jô nyame bidi na: Za'a ve be ngap ma te ve wo me jô'ô na: Bô'é je e fefe.

²⁴ Nde ñyame bidi a nga vaa éname y'abé a jôm ése ja bômane je a bôé je ôsu Saül. Ane Samuel a nga jô na: E ngabe ba te naane wo le; za'a je ôsu viôé a di, amu me ne jô na ba te naane wo je éyoñ ma te loone bôt. Eyoñe te Saül baa Samuel be nga di vôme wua *môs ôte.

²⁵ Be nga so éto y'ékôndô'ô yôp a zu e tison, Samuel a nga laane Saül minlañ andile yôp.

²⁶ Nde be nga kôlô si ndibe tyé. Eyoñe jôp é ngenan te tôô, Samuel a nga loone Saül andile yôp a jô na: Kôlô'ô si a ma ye suu wo ô ke, nde Saül a nga kôlô si, be nga ke e njoñe yôbe bebaé nsamba wua, nye a Samuel.

²⁷ Eyoñ ba siliki aku'u tison, Samuel a nga jô Saül na: Jô'ô mbo ésaé wôé na a ke bia ôsu. Nalé mbo ésaé a nga tebe be ôsu. Samuel a nga jô Saül na: Tebe'e éyoñe ji, a ma ye bo na ô wô'ô nkobô Zambe.