SAMUEL ÔSU 8 - Kalate Zambe Nnomo a Mfefe Mfefé Nkôñelan

Bone b'Israél ba sili njô bôt

¹ Eyoñe Samuel a ntoo nnôm, nd'a nga telé bone bé betyi'i mejô ya Israél.

² Jôé ntôle mone wé é mbe Yoél, jôé nyô baa é mbe Abiya; be mbe betyi'i mejô e Birséba.

³ Bone be Samuel be nji ke tôñe bibô'a mebo bié; be nga dañe nye'e nseñge, a nyoñe biboteze a tyi'i bôte mejô ékotekot.

⁴ Ane bemvendé bese y'Israél be nga sulan a zu be Samuel Rama.

⁵ Be nga jô nye na: Ô ntoo nnôm a bone bôé kik teke tôñe bibô'a mebo biôé; éyoñe ji telé'é bia njôô ya jôô bia avale *meyoñ mevo'o mese me bili.

⁶ Jame te é mbe *abé e mise me Samuel na ba sili na: Va'a bia njô bôte ya jôô bia; nde Samuel a nga ye'elane Nti.

⁷ A Nti a nga jô nye na: Vô'ôlô'ô e tyiñe jap e mfa'a ya jam ése ba ye jô wo; amu sake wo ba ben, ve ma. Be nji beta kômbô na me jô ô be.

⁸ Avale ba zu ba bo éyoñ ése, ataté éyoñ me nga soo be Ejipte a kui den be li'i ma na ba saane bezambe befe, avale te ba bo wo.

⁹ Ajô te ñhe, vô'ôlô'ô tyiñe jap; ve va'a be ayemé éngengeñ a bo na be yem e mam njô bôt a ye jôô be a ye sili be.

¹⁰ Nalé Samuel a nga ba'alan mejô me Nti mese e be bôt be nga sili nye njô bôt.

¹¹ Ane a nga jô na: E mame njô bôt a ye jôô mia a sili mme ma: a ye nyoñe bobefame benan a belane be asu bevagoñe bé a asu bebete bikabela bé; ba ye mate mimbi ôsu ya vagoñe wé;

¹² A ye bo be bivete ya toyini, a bi ya mewôm metan, a ye fe belane be asu ya senane mesi mé, asu ya kôane bidi bié a kôme mengale bita mé a biôme ya bevagoñe bé.

¹³ A ye nyoñe bobebinga benan be bo belet.

¹⁴ A ye nyoñe mefube menan ma dañ abeñ nalé fe mefube mindi'i menan a beôlivié benan, a ve bie bebo bisaé bé.

¹⁵ A ye nyoñe *ngab awômô ya memvoñe menan a nyô ya mefube mindi'i mi woone menan a ve je bivete bezimbi bia saane nye a bebo bisaé bé.

¹⁶ A ye nyoñ bebo bisaé benan be ne befam ba dañe yeme saé a ba ya bebo bisaé benan be ne binga ba dañe yeme saé, a bisoé bendômane bienan, a bijakase bienan, a a ye belane bie asu bisaé bié.

¹⁷ A ye nyoñe *ngab awômô ya mimbame biyeme mienan, a miabebien mia ye bo alo dé.

¹⁸ Môs ôte mia ye yôn amu njô bôt miabebien mia ye top, ve *môs ôte, Nti aa ye ke yalane mia!

¹⁹ Ve bôt be nga bene vô'ôlô'ô tyiñe Samuel. Be nga jô na Momo! Bia ye bi njô bôte be bia,

²⁰ nalé bia fe bia ye bo ane *meyoñ mevo'o mese; njô bôte wongan a ye tyi'i bia mejô, a ye ke bia ôsu a bo nteb'ôsu ya mewosane mangan.

²¹ Samuel a nga wô'ô mejô mese bôt be nga kobô a kate me e melo me Nti.

²² Ane Nti a nga jô Samuel na vô'ôlô'ô tyiñe jap a ve be njô bôt. Samuel ke a nga jô bôte na, kelan, môt ase e tisone jé.