SAMUEL ÔSU 5 - Kalate Zambe Nnomo a Mfefe Mfefé Nkôñelan

Ewolo Zambe e mo Befilisteñ

¹ Eyoñe Befilisteñ be nyoñeya éwolo Zambe, be nga kee je Eben-Ezér e tisone Asdôd.

² Nde be nga nyoñ éwolo Zambe a nyiñeli je e *nda Zambe Dagon a bôé je fefele Dagon.

³ Tyé kpwaa, Beasdônieñ be nga kune kôlô si a koé na Dagon a kuya, asu é butu nye si ôsu éwolo Nti. Ane be nga nyoñe Dagon a bulane nye été jé.

⁴ Tyé kpwaa, be nga kune kôlô si a koé Dagon a kuya, asu é butu si ôsu éwolo Nti; e nlô Dagon a mekule me mo mé me kooéya me bôô anyiine *mbé yôp, jôm é li'iya nye ve nkuk.

⁵ Ajô te betuni be Dagon a bôte bese ba nyiin e *nda zambe jé e Asdôd be ne teke wulu anyiine ya *mbé a kui e môse wu.

⁶ Ane wo Nti ô nga jumbu e be bôte ya Asdôd, a nga wua be e beta nju'u été; a nga bibi be a mot ataté asdôd a yiane si ése.

⁷ Eyoñe bôte ya Asdôd be yeneya jame te, be nga jô na: Éwolo Zambe y'Israél jaa ye ke tabe be bia, amu e wo wé wo liti bia be Dagon e *zambe wongane njuk.

⁸ Nde be nga bañete a sulane bivete Befilisteñ a jô na: Bia ye bo éwolo Zambe y'Israél aya? Bivet bi nga yalane na: Éwolo Zambe y'Israél ja yiane ke e Gat. Ane be nga lôm éwolo Zambe y'Israél e Gat.

⁹ Eyoñ éwolo é keya, nde wo Nti ô nga silan tison. Beta njuk a nga kui; Nti a nga bibi bôte ya tison ataté nyô a dañe tyôtyoé a kui nyô a dañ anen; be nga kone mot.

¹⁰ Nde be nga lôm éwolo Zambe Ekroñ. Eyoñ éwolo Zambe é nga nyiin Ekroñ, bôte y'été be nga yôn a jô na: Be zuya éwolo Zambe y'Israél be bia na bi mane wu, biabebien a bôte bangan!

¹¹ Ane be nga bañete a sulane bivete bise ya Befilisteñ. Nde bivete bite bi nga jô na: Bula'an éwolo Zambe y'Israél; é bula'an e vôme wé, é za mane wôé bia, biabebien a e bôte bangan. Amu beta nju'u y'awu a mbe e tison ése; e wo Zambe ô nga jumu été ngu.

¹² E bôt be nji ke wu be nga kone mot a e mvolan tison ése é nga sili ô nga bet a kui yôp.