SAMUEL ÔSU 2 - Kalate Zambe Nnomo a Mfefe Mfefé Nkôñelan

Meye'elane Anna

¹ Anna a nga ye'elan a jô na: Nleme wom wo vak e be Nti, Nka'ale ô ne ma mvus amu Nti, Me ne kobô besiñe bam éngandé, Amu nyiane wôé wo ve ma avak,

² Nti étam a n'étyi; E Zambe wongan étam a n'akok. Nye étam a ne Zambe, mfe a nji bo.

³ Tela'an abui nkobô ésase denan; Tela'an nkobô mebune wônan; Amu Nti a ne e Zambe *a yem mam mese A ve'e mimboon mi bôt mise e Kop.

⁴ A bu'uya *élaé mimben Ve mintetek mi mbili ngu ane kandé

⁵ Ba be mbe mebume njalan éyoñ ése Ba kuane bebien atan Ane be ne bi jôme ya di. Ve ba be mbe zaé mebum éyoñ ése Be biya awo'on. To'o nkôkôme minga fe ô biaya biyoñe zamgbwa. Ve minga a nga bili abui *bon, A veñesaneya nkôkôm.

⁶ Nti a wôé a a nyii fe, A bo na bôt be ke Nge soo be vôme ya miñwuan.

⁷ Nti a bo bôt azoé nge kum A bete be nge sili be si.

⁸ A bete éngôngole môt mbulu'u été Avale te fe a vaa *nzôzoé akun. Asu ya toé ba be beta be bôt vôme wua A ve b'éto é ne duma ane ngap. Amu si ése é ne jôme Nti A Nye a nga bôé je mekône mé yôp.

⁹ A bômbô évévé ya ba'ale ba bese ba Semé nye Ve ba ba kate nye ba wu e dibi été. Amu môt a se nguleya dañ a ngule jé ébien.

¹⁰ Nti a bo na zo'oyañ é bam é so'o yôp, nalé ja ye tya'a besiñe bé Amu a ne *ntyi'i mejô a dañ e *si nyô été. A ve njôô ya bôte bé ngu, A kô'ôlane ngule ya njôô Emien a nga top.

¹¹ Eyoñe mam mete me maneya, nde Elkana a nga bulan e nlame wé Rama; Ve Samuel a nga li'i e silô na a saane Nti e fefele Eli, *ntuni.

Asu'u mboon bone b'Eli a ate'e ésaa wop

¹² Bone b'Eli be mbe njalan a nsisime *satan, be nji ke yeme Nti.

¹³ Avale di nde betuni bete be nga bo e be bôt: éyoñ ése bôt be nga zu tyi'i biyem, mbo ésaé Ntuni a nga zu éyoñe ba yame tit, a bili élum é ne mesôñe melale mo,

¹⁴ éyoñe te a lum e vie'e été: mbômeyô, minkeññ nge ôbé, jôm ése élum é nga to'é, Ntuni a nga nyoñe je. Nalé be nga bo e be bôte bese y'Israél be nga zu e Silô valé.

¹⁵ To'o na be ngenan te di'i avoñ, mbo ésaé Ntuni a nga zu a jô môt a ve étyi'a na: Va'a Ntuni tite ya yam, amu aa ye ke kañese nyoñe tit é ne mbelan e mo môé, ve nyô é ne nyumi.

¹⁶ Nge môt a jô nye na: Ba ye taté di'i avoñ, éyoñe te wo su'ulane nyoñ jôme wo yene mvaé, mbo ésaé a nga yalane na: Momo! Wo ye ve éyoñe ji, nalé momo wô na ma ye wôlé a ngu.

¹⁷ Abé bendômane bete é mbe anen e mise me Nti, amu be nga biasé mvean ô nga veban asu Nti.

¹⁸ Ve Samuel a nga bo ésaé e mise me Nti, ésoé fame te é nga be'e éfôd ndombo.

¹⁹ Nyia wé a nga loé nye mone ngômesan mbu ôse a zu ve nye je éyoñe baa nnôm be nga zu ve biôm ba tyi'i mbu ôse.

²⁰ Eli a nga botane Elkana baa e minga wé a jô'ô na: Nti a va'a wo mvoñe bôt é so'o be minga nyô, éjiane ya mon a nga sili Nti! Ane be nga bulane jale dap

²¹ A Nti a nga botane Anna nd'a nga beta biaé bobefame belaa a bobebinga bebaé. V'ésoé ndôman, Samuel, é nga yaé e fefele Nti.

Samuel a saane Nti e Silô

²² Eyoñe Eli a ntoo nnôm abui, a nga wô'ôtan avale bone bé be nga bo Israél ase; a nga wô'ô fe na bone bete ba jô'ôbô e binga ba sulan anyiine *nda éndelé bendôba'an.

²³ Nde a nga jô be na: Amu jé mia bo avale mame te? Amu bôte bese ba kate ma mbia mimboone mienan.

²⁴ Momo, a bone bam, e jam ma wô'ô da koban é nji ke bo mvaé; mia tindi ayoñe Nti na é tyame metiñ.

²⁵ Nge môt a bo e môte mbo'o *abé, Zambe a ye tyi'i nye ajô; ve nge môt a bo Nti *abé, za a ye ye'elan ajô dé? Ve be nji ke vô'ôlô *tyiñ ésaa wop, amu Nti a nga kômbô wôé be.

²⁶ Samuel, ésoé ndôman, é nga ke ôsu a yaé; Nti a nga yene nye mvaé, nalé fe bôt.

Melep ma zu mfa'a Eli a * nda bôte jé!

²⁷ Ane môta Zambe a nga zu b'Eli a jô nye na: Avale di nde Nti a jô na: Jia! Me nga yené e be *nda bôt ésoo éyoñ é mbe Ejipte, éjôé ndaa Faraoñ.

²⁸ Me nga tobe *nda éte ézezañe ya *meyoñ y'Israél été, asu ya saane ma e vôm a n'étyi: asu ya bet ata'a metuna'a dame yôp, asu ya di'i ôlobinda a nyume mvaé, asu ya jaé éfôd ôsu viam, a me nga ve *nda bôt ésoo mimveane *bityi'a mise mia di'ibane nduan mi so'o e be bone b'Israél.

²⁹ Amu jé mia tibi mimveane miam a *bityi'a biam a mebo, mbie me nga bendé na be ve e *nda jam é n'étyi? Amu jé wo semé benyôbon a dañe ma na mi vem a ndian *bembômô ya mimvean mise y'Israél, ayoñe dam'

³⁰ Ajô te ñhe, nkulane mejô Nti, e Zamba Israél, wo jô na: Me nga jô bebela na *nda jôé a ndaa ésoo mia ye saane ma nnôm éto. V'éyoñe ji, nalé Nti a jô, ngaka'a éte é keya ma ôyap! Amu ma ye wumulu nyô a wumulu ma, ve ba ba biasé ma ba ye woban ôson.

³¹ Melu ma zu, éyoñ ma ye vaa e ngule jôé a nyô ya *nda bôte jôé, nnôme môt wo ye bo te beta yené e *nda jôé.

³² Nsiñ a ye nyoñe vôme y'étyi e mise môé me lôô. Mam mese ma ye wulu *mvo'é e be bôte y'Israél, ve teke môt éziñe ya *nda bôte jôé a ye kui nnôme môt.

³³ Ve ma ye ba'ale môt éziñ ya mvoñe bôte jôé e fefele ata'a metuna'a dam, nalé *aban a ate'e *nlem bia ye bi nye, a koé na e bôte bevo'o bese be maneya wu.

³⁴ Ndem y'été é ne e jam da ye kui be bobefame bôé bebaé: Ofni a Finéas; ba ye wu bese môse wua.

³⁵ Ma ye telé e *ntuni a wulu ane da yian, nyô a ye bo aval'ane nleme wom wo kômbô a aval'ane nsisime wom wo yene mvaé; ma ye lôñe nye *nda é ne te k'afô'ôsan, a a ye wulu ôsu y'éñwom a ne *ñwo'one mbon éyoñ ése.

³⁶ A e môt ase a ye li'i *nda jôé a ye zu kute meboñ ôsu vié asu ya bi nsañe moné ng'ôfufuse belet a jô'ô na: Futi'i ma, ma ye'elane wo, ésaé jia ya bisaé y'étyi, nalé ma ye bi ôfufuse jôme ya di.