SAMUEL ÔSU 16 - Kalate Zambe Nnomo a Mfefe Mfefé Nkôñelan

Zambe a tobe Davib mfefé njô bôt

¹ Ane Nti a nga jô Samuel na: Wo ye yône Saül nté *mbé? Ma me beneya nye na a bo te beta jôô Israél. Jalé'é nla'a mbone wôé a ke! Ma lôme wo e be Izayi, e Bétléhém, amu me yeneya njô bôte wom e bobefame bé été.

² Ane Samuel a nga jô na: Ma ye ke aya? Eyoñe Saül a ye wô'ô de a ye wôé ma. Nde Nti a nga jô na: Wo ye kee ngal éjakas a jô na: Ma zu ve Nti étyi'a.

³ Wo ye loone Izayi éyoñe ya ntyi'an; mamien ma ye kate wo jam wo yiane bo, a wo ye wo'o ma nyô ma ye liti wo mbon.

⁴ Ane Samuel a nga bo e jame Nti a nga jô, nde a nga ke Bétléhém. Ane bemvendé ya tison be nga zu tôbane nye be fô'ôba'an a jô na: Ye nsoone wôé wo kate jam éziñ ya mevak'

⁵ A nga yalane na: Yaa! Ma zu ve Nti étyi'a. Tunane miabebien a tôñe ma vôm ma ke ve étyi'a. A nga bo fe na Izayi a bobefame bé be tuneban a a nga loone be e vôm a nga ve étyi'a.

⁶ Eyoñe be nga suan, Samuel a nga simesan éyoñ a yeneya Eliab na: Ma buni fo'o na nyôô Nti a ne *ñwo'one mbon nye a tele nye ôsu nyô.

⁷ Ve Nti a nga jô Samuel na: Te fombô avale wo yene nye atan, ayabe nté dé, amu me beneya nye. Amu é nji ke bo ajô ya jôme bôt ba yen amu bôt ba fombô jôm avale ja yené atan ve Nti a fombô *nlem.

⁸ Ane Izayi a nga loon Abinadab a lôte nye e mise me Samuel. Samuel nye na: Nyôna fe Nti a nji tobe nye.

⁹ Ane Izayi a nga lôte Samma, Samuel a nga jô na: Nyôna fe Nti a nji tobe nye.

¹⁰ Nalé Izayi a nga bo na bobefame bé zamgbwa be lôt e mise me Samuel, nde Samuel a nga jô Izayi na: Nti a nji ke tobe môt éziñ y'été.

¹¹ Eyoñe te Samuel a nga sili Izayi na: Ye ô nji bi bobefam befe? Izayi na: A li'iya ve nyô a ne mongô, a ve biyem bidi. Nde Samuel a nga jô Izayi na: Lôme bôt be ke loone nye, amu bi se nguleya tabe si v'akekui a soya va.

¹² Ane Izayi a nga lôme bôt be ke nyoñe nye. A mbe ôbe évele, a be'e mbamba be mis a bili fe mbamba éyeka'a. Eyoñe te Nti a nga jô Samuel na: Kôlô'ô si ô wo'o nye mbon, amu e nye le!

¹³ Ane Samuel a nga nyoñe nla'a mbon a wo'o nye wô ézezañe bobenyañ. Nde Nsisime Nti ô nga bi David ataté *môs ôte a ke ôsu. Ane Samuel a nga kôlô a ke e Rama.

Saül a mbia * nsisim . David e mongô bisaé Saül

¹⁴ Ane Nsisime Nti ô nga kôlô be Saül a mbia *nsisim, a so'o be Nti a nga jalé nye a woñ.

¹⁵ Ane bebo bisaé be Saül be nga jô nye na: Tame yen, mbia *nsisim, a so'o be Zambe, a ndeñele wo.

¹⁶ Ajô te a masa kobô'ô! Bebo bisaé bôé be ne émbôé. Ba ye jeñe môt a yeme bôme ndeñge; a ye bôme nye éyoñe mbia *nsisim a so be Zambe a zuya be wo a wo ye bi mvolan.

¹⁷ Ane Saül a nga yalane bebo bisaé bé na: Jeñane ñhe ma môt a yeme bôme ndeñge mvaé a zuu ma nye.

¹⁸ Ane wua ya bisoé bebo bisaé a nga kobô na: Me nga yene mona Izayi e Bétléhém, a yeme bôme ndeñge; a ne fe ôdidi'i mben, môta mewosan, ke'ete a abeñe môt, a Nti a too be nye.

¹⁹ Ane Saül a nga lôme bôt e be Izayi be kate nye na: Lôme ma mone wôé David, nyô a ba'ale mintômba.

²⁰ Nde Izayi a nga nyoñ éjakase jé, a beté bidi été yôp, a nyoñe fe nde'e woon a étoñ ékela, a lôme ñhe David mone wé a ke ve bie Saül.

²¹ Ane David a nga kui a tebe e mise me Saül, nde Saül a nga dañe nye'e nye, a bo nye mbe'e mengale wé.

²² Ane Saül a nga lôm be kate Izayi na: Ma ye'elane wo na ô jô'é ma David, amu me yeneya nye mvaé.

²³ Eyoñ ése e *nsisim wo so be Zambe ô nga bi Saül, David a nga nyoñe ndeñge a bôme nye, éyoñe te nje Saül a nga vebe *mvo'é a bo fe ôbe *mvo'é, a éyoñe te mbia *nsisim a nga kôlô be nye.