SAMUEL BAA EJÔÉ DAVID 8 - Kalate Zambe Nnomo a Mfefe Mfefé Nkôñelan

David a dañe * meyoñ ma bômane nye

¹ A nga bo na éyoñe mam mete me maneya, David a nga bôé Befilisteñ a samele be, a nga vaa be ngule njôan be nga bili.

² A nga bôé fe Bemôabit, a nga yemete be na be bômbô tyia, a nga wôé ngab ébaé ya be be, a nyii ke ngabe jia; ane Bemôabit be nga ke éjôé David si, be yaka'ane nye *toya.

³ David a nga bôé fe Adadézer, e mona Rehôb, njô bôte ya Sôba, éyoñ a nga beta ke telé éjôé jé ôsôé Efrat.

⁴ David a nga nyoñe nye bewulu bikabela toyini a mintete zamgbwa a bewulu si toyini mewôm mebaé. A nga ba'ale bikabela ntet ve a nga tyi'i bi bivo'o bise mvuse mimbiaé.

⁵ Ane Besirieñ ya Damas be nga zu volô Adadézer, njô bôte ya Sôba, a David a nga wôé bôte ya Siri toyini mewôm mebaé a ébaé.

⁶ David a nga telé minkan bezimbi e Siri ya Damas, a Besirieñ be nga ke éjôé David si, be yaka'ane nye *toya. Nti a nga bo na David a dañ e vôm ase a nga ke.

⁷ Ane David a nga nyoñ biben bi or bebo bisaé Adadézer be nga bili a kee bie e Yérusalém.

⁸ David a nga nyoñe fe étua abui mvot e Béta a e Bérôtayi, bitisone Adadézer.

⁹ Toyi, njô bôte ya Amat, a nga wô'ô na David a maneya bôé nkane bita Adadézer ôse.

¹⁰ Ane a nga lôme mone wé Yôram be David na a batane nye a se'e nye amu a nga bo Adadézer bita a bôé nye. Amu Toyi ba Adadézer be nga wosan. Yôram a nga ke a bili biôm bi ne mboon a argent a biôm bi ne mboon a mvot.

¹¹ Ane njô bôte David a nga telé bie étyi be Nti avale fe a nga telé argent a or a nga nyoñ e be *meyoñ mese a nga dañ,

¹² e Siri, e Môab, e Béamônite, e be Befilisteñ, e be Amalék, a e be akum a nga sa Adadézer, e mona Rehôb, njô bôte ya Sôba.

¹³ Jôé David é nga beta wum nsoon a nga so dañe Besirieñ tañe bôte toyini awôm a muam, e mbi'ili nku.

¹⁴ A nga telé minkane bezimbi Edom, a nga telé minkan bezimbi Edom ase; a Edom ase a nga ke éjôé David si; Nti a nga bo David na a dañ e vôm ase a nga ke.

¹⁵ David a nga jôô Israél ase. A nga tyi'i ayoñe dé ése mejô *zôsôô.

¹⁶ Yôab, mona Séruya, a nga jôô nsamba mewosan; Yôsafat mona Ahilud, a mbe mba'ale mintilan;

¹⁷ Sadok, e mona Ahitub, a Abimélék e mona Abiatar, be mbe betuni;

¹⁸ Séraya a mbe ntilimam; Benayahu, e mona Yehôyada ba be Bekérétieñ a Bepelétieñ be nga too; a bone be David be mbe bivet y'ôsu.