SAMUEL BAA EJÔÉ DAVID 7 - Kalate Zambe Nnomo a Mfefe Mfefé Nkôñelan

Nkulan mejô Natan ajô * nda bôt David

¹ Eyoñe njô bôt a nga tabe e *nda jé, a Nti a veya nye awo'on, éyoñ a nga kôté nye be besiñ bé bese be nga bômane nye,

² nd'a nga jô *nkulu mejô Natan na: Womien tame ñhe yen! Ma me too *nda é ne nlôñan a Sédre, v'éwolo Zambe é too e *nda éndelé si.

³ Ane Natan a nga yalane njô bôte na: Kelek a bo e jam ése é ne wo *nlem, amu Nti a ne be wo.

⁴ V'a nga bo na, alu te, Nti a nga kobô Natan na:

⁵ Kele jô mbo ésaé wom David na: Nti a kobô na: Ye wo wo ye lôñe ma *nda ya tabe'

⁶ Amu me nji tabe e *nda ataté *môs me nga soo bone b'Israél Ejipte a kui môse wu, ve ma zu ma wulu me too *nda éndelé si a e *tabernakel été.

⁷ Vôm ase bia be bone b'Israél bese bi keya, ye me toteya éfia e be ayoñe da ya *meyoñ y'Israél di me nga bendé na é ve bôte bam y'Israél bidi, ye me jôya na: Amu jé mi nji lôñe ma *nda besédre'

⁸ Eyoñe ji wo ye kobô mbo ésaé wom David na: Nti ya *minsamba mewosan a jô na: Ma me nga nyoñe wo vôm ba ba'ale biyem, e mvuse mimbam betit, na ô bo nliti zene ya bôte bam y'Israél.

⁹ Me nga too be wo e vôm ase ô nga ke, me maneya vaa besiñe bôé bese ôsu viôé, me neneya jôé dôé é bo ane jôé ya beta be bôt be ne si nyô;

¹⁰ Me veya ayoñe dam Israél vôm ya tabe a me bemeya nye si na a tabe été a bo te beta fô'ôsan, na bikotekot bi bôt bi bo te beta samele nye aval'ane melu mvus,

¹¹ A aval'ane melu me nga telé betyi'i mejô e be bôte bam Israél. Me veya wo awo'on éyoñ me maneya kôté wo e be besiñe bôé bese. Ajô te Nti a kate wo foé na a ye bo wo *nda bôt.

¹² Eyoñ melu môé ma ye jaé a éyoñ wo ye bômbô mia b'ésoo, ma ye yemete mvoñe bôte jôé e mvuse jôé, nyô a ye kui *miñya miôé, a ma ye yemete éjôé jé.

¹³ Nye a ye lôñe jôé dame *nda, a ma ye yemete éto njôane jé nnôm éto.

¹⁴ Mamien ma ye bo nye ésaa a nye a ye bo ma mon. Nge a kop, ma ye belane bôt ane ôlé ya bôme nye a ane minkasa ya yite nye.

¹⁵ Ve mvame jam ja ye bo te kôlô be nye, avale me nga vaa je be Saül, nyô me nga telé fefel ôsu viôé.

¹⁶ Ôsu viôé, *nda jôé a éto njôane jôé bia ye bo teke afô'é, éto njôane jôé fe ja ye bo ñyemetan nnôm éto.

Meye'elan me David

¹⁷ Ane Natan a nga kobô David aval'ane mejô mete mese me né a aval'ane ñyenane te ô né.

¹⁸ Eyoñe te David a nga tebe asu Nti a jô na: Me ne za, A Nti wom, *nda bôte jame ke jé, ane ô keya kui ma nté te'

¹⁹ V'abime te da be tyôtyoé e mise môé, a Zambe wom me wô'ôya fe ô kobô'ô ajô ndaa mbo ésaé wôé melu ma zu ôsu. Ye zene môta biname le, a Zambe wom'

²⁰ Jé David a ne jô wo a dañ abim a jôya? Wo yem mbo ésaé wôé, wo e Zambe wom!

²¹ Amu nkobô wôé a aval'ane nleme wôé wo kômbô nde ô maneya bo beta be mam bete asu ya liti me mbo ésaé wôé.

²² O ne fo'o anen a Zambe ya nnôm éto! Amu teke jôm ja funane wo, a Zambe mfe a nji bo ve wo, éyoñ bia fombô mam bi nga wôk a melo mangan.

²³ Ye ayoñ afe é ne *si nyô é too ane ayoñe dôé Israél, a ye bezambe be nga tame ke kôté ayoñe te na é bo éndap a ve de jôé avale ô nga bo Israél? Ô boya Israél beta be mam, beangôndô be mam asu mvaé ya si jôé, bôte bôé ô nga kôté Ejipte be too, nalé fe *meyoñ a bezambe y'Ejipte be too, asu ya na Israél a bo jôme jôé

²⁴ O yemeteya ayoñe dôé Israél na é bo ayoñe dôé nnôm éto; a wo, Nti, Ô ntoo e Zambe wé.

²⁵ Eyoñe ji, a Zambe ya nnôm éto, bo'o na nkobô ô maneya kobô mbo ésaé wôé a *nda bôte jé ô tabe nnôm éto, a bo'ok aval'ane nkobô wôé ô né.

²⁶ Jôé dôé e bo'o duma nnôm éto a be jô'ô na: Nti ya *minsamba mewosan a ne e Zambe Israél! E ndaa mbo ésaé wôé David é bo'o ngu asu dôé!

²⁷ Amu womien, a Nti ya *minsamba mewosan, Zambe y'Israél, Ô kulaneya mbo ésaé wôé jam ô jô'ô na: Ma ye lôñe wo *nda! Amu ajô te mbo ésaé wôé a te bi ngule *nlem ya ye'elane wo.

²⁸ Eyoñe ji a Zambe wom, wo ô ne Zambe, mejô môé me ne bebela, a ô kateya mbo ésaé wôé mbamba jame nyô.

²⁹ Ajô te kañese'e botan e ndaa mbo ésaé wôé éyoñe ji, nalé ja ye tabe nnôm éto asu dôé! Amu wo Zambe wom ô kobôya, a ébotane jôé, e ndaa mbo ésaé wôé ja ye nyoñ ébotan nnôm éto.