SAMUEL BAA EJÔÉ DAVID 24 - Kalate Zambe Nnomo a Mfefe Mfefé Nkôñelan

Elañe bôte y'Israél

¹ Ane Nti a nga beta yaa Israél. Ayaa te é nga tindi David a ke be ngame yat a jô nye na: Kelek a lañe bôte y'Israél a Yuda.

² Ane njô bôt a nga jô Yôab na: Za a mbe évete mewosan a za a nga too nye bebé: a ye wulu e *meyoñ mese y'israél, ataté Dan a kui Birséba: be lañe bôt. Eyoñe te ma ye yeme tañe bôte ya ayoñ.

³ Nde Yôab a nga jô njô bôte na: Nti, e Zambe wôé, a bo'o na bôt be dañe bo abui tañe biyoñ ntet, a mise me tate wom njô bôt a kômbô bo jame te'

⁴ Ve nkobô njô bôt ô nga dañe wu Yôab a bivete mewosane ngu; ane Yôab a bivete mewosan be nga kui atan njô bôt a lôô asu ya lañe bôte y'Israél.

⁵ Be nga dañe Yordan a vule minkan Aroer, e mbo nnôme ya tison é né e zañe mbi'ili Gad bebé e Yaézer.

⁶ Ane be nga ke Galad a si ya Tahtim-Hôsi. Be nga ke Dan Yaan a mefôla ya Sidoñ.

⁷ Be nga ke ôleme ya Tir, a bitisone bise Behévieñ a Bekananééñ. Be nga man ésaé e Négéb ya Yuda, e Birséba.

⁸ Nalé be nga bômane si ése tañe ngone ébu a melu mewôm mebaé a kui Yérusalém.

⁹ Ane Yôab a nga kalane njô bôt tañ ya élañe bôt: bôte mewosan ya Israél be mbe toyini mintete muam, ba ya Yuda ki toyini mintete mitan.

¹⁰ David a nga wô'ô *nlem ô kumeta'ane nye éyoñ a maneya lañe bôte nalé. Nde David a nga jô Nti na: Me boya beta *abé! Eyoñe ji, a Nti, jamé'é nja'a ékobe mbo ésaé wôé amu ma te bo bebé ane môt a ne *te fek.

¹¹ Ane David a nga kôlô si mametyé, a Nti a nga kobô *nkulu mejô Gad, ñyene mame David na:

¹² Kele jô David na: Avale di Nti a kobô na: Ma telé bibubua bilal ôsu viôé: tobe jia y'été a ma ye bo je é wosane wo.

¹³ Nde Gad a nga kui be David a kate nye avale di: Ye wo kañese na si jôé é kui zaé tañe mimbu zamgbwa, nge na wo tube besiñe bôé ba titane wo tañe ngon éla nge na bim a kui si jôé tañe melu mela? Fasek a kate ma jam ma yiane yalane môt a te lôme ma.

¹⁴ Nde David a nga yalane Gad na: Me ne e beta ôlun été! Oé! Bi tame ku e mo me Nti été; amu nkoon éngôngole wé ô n'anen; ve me bo'o te ku e mo me bôt!

¹⁵ Ane Nti a nga lôme bim Israél été, ataté mametyé a kui éyoñ é mbe ntelan; a ataté Dañ a kui Birséba, bôte ya ayoñ be nga wu toyini mewôme zamgbwa.

¹⁶ Eyoñe éngele a same wo e Yérusalém na a jiane nye, nde Nti a nga jôban amu bidim bite a jô éngele a jian a mbe bôt été na: Suku'u valé! Bula'ane wo wôé mvus éyoñe ji. Engele Nti a mbe bebé éfuse si Aravna, mone Yébuzieñ.

¹⁷ Ane David a nga kobô Nti éyoñ a nga yene éngele a wôé bôt a jô na: Tame yen: ma me nga bo *abé! Ma me nga kop; ve bôte ba be nga bo jé? Wo wôé wo yiane bibi ma a *nda bôte jam!

¹⁸ Môs ôte Gad a nga kui be David a jô nye na: Betek a lôñe Nti ata'a metuna'a éfuse si Aravna, mone Yébuzieñ.

¹⁹ Ane David a nga bet ane nkobô ô mbe, avale Nti a nga bendé.

²⁰ Ane Aravna a nga fombô a too yôb été a yene njô bôt a bebo bisaé bé be za'a be nye; nde njô bôt a nga kui atan a kute meboñe si asu é butu si.

²¹ Aravna a nga jô na: Amu jé masa wom njô bôt a zu be mbo ésaé wé? David a nga yalane na: Asu ya kus éfuse si be wo a lôñe Nti ata'a metuna'a été nalé ébubua ja ye kôlô be bôt.

²² Aravna a nga jô David na: Masa wome njô bôt a nyoñ éfuse si a ve jôm a ye yene mvaé; yenek, mimbam betit mia ye bo asu mvean ba di'i ngumba, wôna mintoñ ba tya'a mie bidi a bibôñeté asu benyak ba ye belane bie asu nja'a;

²³ A njô bôt, Aravna a ve njô bôt jôm ése! Aravna a nga beta jô njô bôte na: Nti, e Zambe wôé, a yene wo mvaé!

²⁴ Ve njô bôt a nga jô Aravna na: Momo! ma ye kuse je be wo ane da yian, a ntotane tañ; ma ye bo te ve Nti, e Zambe wom, mimvean da di'i ngumba mi ne akap! Ajô te David a nga kus éfuse si a benyak tañe besikel be moné mewôm metan.

²⁵ Ane David a nga lôñe Nti ata'a metuna'a valé a ve mimvean ba di'i ngumba a *bityi'a ya nlatane ngbwa. Ane Nti a nga voé *nlem a ébubua é nga kôlô Israél été.