SAMUEL BAA EJÔÉ DAVID 23 - Kalate Zambe Nnomo a Mfefe Mfefé Nkôñelan

Mejô David a nga su'ulane kobô

¹ Mejô David a nga kandane kobô mme ma: nkulane mejô David e mona Izayi, nkulane mejô éwôlô môt, wu Nyô Zambe Yakob a ne *ñwo'one mbon, wu Nyia bia y'Israél a ne mvaé.

² Nsisime Nti ô nga kobô ma, a nkobô wé ô ne ma ôyem,

³ E Zamba Israél a nga kobô, Ako'o y'Israél é nga jô me na: Nyô a jôô bôte *zôsôô, nyô a jôô bôt a koo ke Zambe woñ,

⁴ a ne an'éfufube ya mametyé, éyoñe jôp da tôô, e tyé é ne teke minkut; éyoñe mveñ é leneya, ôbut via vame si amu minkôkô mié.

⁵ Avale te Zambe a bo *nda bôte jam, amu a nga bo élate ya nnôm éto bia Nye, metiñ ma ba'ale élate te me too été. Eyoñ ése me bili ndi ya dañ, a tôé minkômbane miam.

⁶ Ve ba bese ba biasé Zambe be ne aval'ane mintyaé bilé mi bili biyo mmie ba tyik. Be ne te bi mie a minsoé mi mo;

⁷ Môt ase a kômbô bi mie a nyoñ ôkob étyé nge ntyen akoñ ô n'élé, a di'i jôm ése vôm ate émien.

Biwôlô bi bôte mewosane David

⁸ Biyôlé biwôlô bi bôte ya mewosane David mbie bi: Yôséb-Basébét mone Takemonite, évete ya nsamba mimbene mila; be mbe fe be lo'one nye na: Adinô mone Esnite, nye a nga wôé bôte mintete muam éyoñe jia.

⁹ Eléazar, e mona Dôdô, ndaé Ahôhi, nye a nga tôñe valé. A mbe wua ya biwôlô bi bôte bilaa ba be David be nga dañe Befilisteñ bita éyoñe bôte y'Israél be nga mate minkôle yôp.

¹⁰ Ny'a nga tebe a wôé Befilisteñ akekui wo wé ô nga bo beta *nkôtan môs ôte. Bôt be su'ulane tôñe Eléazar ve na be nyoñe mimbim.

¹¹ Samma, e mona Agé ya Arar a nga tôñe valé. Befilisteñ be nga sulan e Léhi. Efuse si é mbe valé njalan a ônyenyama kôôn; a bôt be nga tube Befilisteñ.

¹² Samma a nga tebe tetele ézezañ éfuse si te, a beta nyoñe je a wôé Befilisteñ; a Nti a nga bo beta *nkôtan.

¹³ Bilale ya bivete mewôm mela bi nga sis éyoñ ba kôane bidi a zu be David e mbas ako'o y'Adulam, éyoñe te nsamba Befilisteñ ô vuleya minkan mbi'ili Refayim.

¹⁴ David a mbe ôlem été, nkane bezimbi Befilisteñ ki ô too Bétléhém éyoñe te.

¹⁵ David a nga liti nkômban a jô na: Za a ye nyuu ma mendime y'anjeñ é ne *mbé ya Bétléhém'

¹⁶ Ane biwôlô bi bôte bilale bite bi nga nyiine minkan Befilisteñ a ngu a labe mendime y'anjeñ é ne *mbé Bétléhém. Be nga soo me a ve me David; v'a nji kômbô nyu me, a nga miame me si ôsu Nti ane mvean.

¹⁷ Nye na: Ôsimesane ya bo avale jame te ô kele ma ôyap, a Nti! Ye sa metyi ya bôt be nga ke wôé ényiñe jabe ma? A nji kômbô nyu me. Jame biwôlô bi bôte bina bilaa bi nga bo nde le.

¹⁸ Abisayi, monyañe Yôab, e mona Séruya, a mbe nlô ya be belaa. Nye a nga samese akoñe dé *môs éziñ e mise besiñ mintete mila a wôé be. Jôé dé é nga wum e zañe jap belaa.

¹⁹ Nye a nga dañe bi duma e be belaa. Nye a mbe évete jap; ve a nji ke bo ane ba belale y'ôsu.

²⁰ Benayahu, e mona Yehôyada, a mbe mona éwôlô môt é nga dañ mewosan biyoñ abui, a too môte ya Kabsil. Nye a nga wôé Beariél bebaé ya Môab. Ny'a nga sis a wôé ngbwengbwem anjeñ été, *môs ôte ô mbe aveb abui.

²¹ Nye fe a nga wôé mone Ejiptieñ a too angônda môt. Mone Ejiptieñ ate a nga bili akoñe wo; Nd'a nga ke wosane nye a *ntum, a nga wôlé mone Ejiptieñ akoñ a wôé nye a akoñe dé;

²² Jame Benayahu, e mona Yehôyada a nga bo nde le, jôé dé é nga wum e zañe biwôlô bi bôte bilal été.

²³ Nye a nga dañe bi duma e be be a dañe ba bevok mewôm mela; v'a nji kui ane ba belale y'ôsu. David a nga telé nye a jôô nkane bita wo ba'ale njô bôt.

²⁴ Nsamba ya bôte mewôm mela ô mbe fe ô bili bôte ba: Asaél, monyañe Yôab. Elhanañ, e mona Dôdô ya Bétléhém.

²⁵ Samma ya Arôd. Eliha ya Arôd.

²⁶ Elét ya Pelét. Ira, e mona Ikés ya Tékôa.

²⁷ Abiézer y'Anatot. Mebunayi ya Usa.

²⁸ Salmôn ya Ahôa. Maharayi ya Nétôfa.

²⁹ Eléb, e mona Baana ya Netôfa. Itayi, e mona Ribayi ya Gibéa Bebenyaminite.

³⁰ Benayahu ya Piraton. Idayi ya Nahalé-Gaas.

³¹ Abi-Albôn ya Araba. Azmavét ya Bartum.

³² Eliahba ya Kaalbôn. Bené. Yasén. Yônatan.

³³ Samma ya Arar. Ahiam, e mona Sarar ya Arar.

³⁴ Elifélét, e mona Ahasbayi, mona mone Maakatieñ. Eliam, e mona Ahitôfél ya Gilô.

³⁵ Et-Krayi ya Karmel. Parrayi ya Arab.

³⁶ Yiguéal e mona Natan ya Sôba. Bani ya Gad.

³⁷ Sélék mone Amonite. Narayi ya Beérôt, nyô a nga be'e biôm mewosan bi Yôab, e mona Séruya.

³⁸ Ira ya Yéter. Garéb ya Yéter.

³⁹ Yrie mone Hitite. Bese mewôm mela a zamgbwa.