SAMUEL BAA EJÔÉ DAVID 22 - Kalate Zambe Nnomo a Mfefe Mfefé Nkôñelan

David a ve Zambe akéva

¹ Ane David a nga tote Nti mejô ya jia ji éyoñe Nti a maneya kôté nye e mo besiñe bé bese a mo me Saül.

² Nye na: Nti a ne ako'o dam, ôleme viam Nkôté wom,

³ e Zambe a ne akôme dam, e vôm ma sobô, ébene jam a e ngule ja nyii ma, asoé dam é n'ôyabe yôp éyoñe ma tup. A e nyii wom! Wo nyii ma.

⁴ Ma yôtan a jô na: Nti a yian ékaña'a! A me nyiibaneya be besiñe bam.

⁵ Amu mintyôa y'awu mi nga bametane ma. Me nga ko atôñe mendim da tyame biôme woñ;

⁶ Mengata'a y'étaba'a miñwuan me nga bômane ma, mevote y'awu me mbe m'ôsu,

⁷ ôlune viam été, me nga ye'elane Nti, ma ye'elan e Zambe wom: a too ndaa njô bôte jé, a wô'ô tyiñe jam, a ñyône wom wo kui melo mé.

⁸ Si é nga ti'itan a fô'ôsan, mimbôka'a ya yôp mi nga fô'ôban, mi nga ti'itan, amu ayaa dé e nga yôñ.

⁹ Otita ô nga vam e mimbile mi môé mié, nduan ja di'i é nga vam anyu dé: metye'e me nduan fe me nga kui été.

¹⁰ A nga vite yôp a sis Afibe *nkut é too nye mebo si.

¹¹ A nga bete Kérubime yôp a a nga yele, a nga so mefap v'évuñulu.

¹² Dibi é nga bômane nye ane *nda éndelé, a nga sobô afibe nkut'été, e minkut mi ne njalane mendim été.

¹³ Minkôkô ya nsoone wé mi nga futi nduan e da'a.

¹⁴ Nti a nga bam ane zo'oyañ a too yôp été nyô a n'ôyabe yôp a nga bo na tyiñe jé é wô'é;

¹⁵ a nga wua mekoñe bilaé a mialane be, feleves jia é nga dañe be.

¹⁶ Mañ me nga kôt a mimbôka'a ya si nyô Mi nga kui asoé, amu ayaa Nti a amu mveb'évuñulu ya mimbile mi môé.

¹⁷ A same wo wé a too yôp. A bi ma, a dutu ma e beta mendim été;

¹⁸ a kôté ma be nsiñe wom a ne ngu, be ba ba vini ma be too fe ngu a dañe ma.

¹⁹ Be nga basane ma e môse ya bidime biam, Ve me nga ye'ebe be Nti.

²⁰ A nga vaa ma a tooé ma ne nyema, a nga dutu ma amu a nga nye'e ma.

²¹ Nti a nga bo ma aval'ane *zôsôô wom a né. A nga belane ma avale mfubane ya mo mam ô né;

²² Amu me nga ba'ale mezene me Nti, a me nji ke Zambe wom ôyap a mboon *abé.

²³ Mevinda mé mese me ne m'ôsu a me nji ke e fefele minjôane mié.

²⁴ Me nga yené te bijô e be Nye, a me nga tu'a tabe ntyee ékobe jam été.

²⁵ Ajô te Nti a nga bulane ma ane *zôsôô wom a né, ane me ne *mfuban e mise mé.

²⁶ Wo liti nye'an be nyô *a nye'e, ô ne *zôsôô be môt a ne *zôsôô.

²⁷ O ne *mfuban be môt a ne *mfuban, ve wo yené mfefek be môt a ne njo'otan.

²⁸ Wo nyii bingôngole bi bôt, mfombane wôé wo sili bôt be ne mebune si.

²⁹ Ya! A Nti! Wo ô ne éfufube jam! Nti a faé dibi dam éfufup.

³⁰ Ma ke mbi e nsamba mewosan été amu wo, éyoñ me bili e Zambe wom me ne nguleya yôô mfine *mekok.

³¹ Mezene me Zambe me ne teke ékop. Nkobô Nti ô ne bebela; a n'ében e be ba ba sobô be nye.

³² Amu za a ne Zambe ye sa Nti' a za a n'akok ye sa e Zambe wongan'

³³ Zambe Nye a ne éwôlô ôleme jam, Nye fe a kôme ma *zen ane da yian.

³⁴ A bo mebo mam me funane ma minkok, a bo na me tebe mevôm me n'ôyabe yôp.

³⁵ A ye'ele mekule me mo mam me yembane bita, a mo mam ma limiti *élaé mvot.

³⁶ Wo ve ma ébene ya nyiane wôé, a évôvoé ja bo ma beta môt.

³⁷ Amu wo, ma dañe mate avô teke kolé ôbak.

³⁸ Ma tôñe besiñe bam a jiane be, me nji bulane mvus te na ajô ya zañe bia be be é mané.

³⁹ Ma tyi'i be afus, ma mane be, ba ye bo te beta tebe tetele; be bôô tyia, a ma beté be abo nyô.

⁴⁰ Wo ve ma nguleya wosan, bôte ba té ma mejô, wo bo na me dañe be, mbe bana be ne e mebo mame si.

⁴¹ Wo bo na besiñe bam be tup ôsu viam, me ne nguleya bo besiñe bam zezé biôm.

⁴² Mfombane wop ô kusa liti na ba sili mvolan. Teke môt a zu volô be; ba kobô Nti, ve Nye teke yalane be.

⁴³ Ma nyose be, ma veñesane be mbuluk, ma tibi be a mebo ane mbotok ya minjoñ.

⁴⁴ Wo solé ma mfa'a ya bôte bam ba yaa, wo ba'ale ma na be bo nlô ya *meyoñ, e bôt me nji yem ba ke éjôé jame si.

⁴⁵ Bikuu bia zu kobô ma a ékôkon ôyem, e mone jam ase ma jô be be ve wô'ô ma.

⁴⁶ Bone bikuu be te'eya. Ba kui aleme dap be nyemba'an.

⁴⁷ Nti a tabe'e nnôm éto a ako'o dam é bo'o ébotan! Zambe, ako'o ya nyiane wom a yiane wum,

⁴⁸ Zambe a ve ma akuna'a, Nyô a sili meyoñe si be ma,

⁴⁹ a vaa ma besiñe bam été! Wo bete ma besiñe bame yôp Wo kôté ma be môt a ne njet.

⁵⁰ Ajô te ma ye kañe wo e *meyoñ me bôt été a Nti! Ve ma ye yia jôé dôé bia.

⁵¹ A ne nkum ya nyian asu njô bôte wé. A ne *mvam e be môte wé a ne *ñwo'one mbon, e be David a mvoñ bôte jé akekui nnôm éto.