SAMUEL BAA EJÔÉ DAVID 21 - Kalate Zambe Nnomo a Mfefe Mfefé Nkôñelan

Mfumbale zaé mimbu mila

¹ Melu me David, zaé é nga kui tañe mimbu mila fifiti; éyoñe te David a nga sili nkômbane Nti, nde a nga yalane nye na: Jame te da so amu metyi Saül a bôte bé be nga kuli, éyoñe Saül a nga wôé Begabaonite.

² Ane njô bôt a nga loone Begabaonite a kobô be. Begabaonite be nji bo bôte ya Israél, be mbe *mebuka'a ya Beamorééñ. Ve bone b'Israél be nga bo élat a be a nkanane ngana, Saül a nga kômbô mane jiane be amu ajô Israél a Yuda.

³ Ane David a nga jô Begabaonite na: Jé me ne bo mia a me bulu nsem a jé nalé mia ye botane ayoñe bôte Nti'

⁴ Nde Begabaonite be nga yalane nye na: Bia be Saül a *nda bôte jé bi nji bi ajô argent nge or a é nji bo ajô dangane na bi wôé môt Israél été. Nde njô bôt a nga jô na: Jam mia ye jô ma, ma ye bo mia de.

⁵ Be nga yalane njô bôte na: Amu môte ate a nga kômbô jiane bia a amu a nga bili ôsimesane ya bôé bia na bi jañ e si ya Israél été,

⁶ a ntoo ve na be kalane bia bôte zamgbwale ya bone bé, éyoñe te bia ye bôôé mimbime miap e mise me Nti e Gibéa Saül, nyô Nti a nga top. Njô bôte na: Ma ye kalane mia be.

⁷ Njô bôt a nga kamane Mefibôsét, e mona Yônatan ndaé Saül amu ngana David a Yônatan, e mona Saül, be nga kan e zañe jap asu Nti.

⁸ Ve njô bôt a nga nyoñe bone bebaé Rispa, ngone Aya, a nga biaé Saül, Armôni a Mefibôsét, a bone betan Mikal, ngone Saül, a nga biaé Adriél ya Mehôla, e mona Barsilayi.

⁹ Nd'a nga kalane be e mo Begabaonite, be ve bôôé mimbime miap nkôle yôp asu Nti. Bese zamgbwa be nga kôane bidi éyoñe nkôane fôn wo taté.

¹⁰ Rispa, ngone Aya, a nga nyoñe nkuta a taa wô émiene si ako'o yôp, ataté metata'a me nkôane bidi a kui na mendime ya yôp me sôé me yôp; mendim mete me nga kaman anone ya yôbe na é bebe be yôp a amôs, a betite ya fé a alu.

¹¹ Be nga kate David jame Rispa, ngone Aya, ébone Saül, a nga bo.

¹² Eyoñe te David a nga ke nyoñe bivese bi Saül a bi bi Yônatan mone wé e be bôte ya Yabés e Galad be nga vaa bie Bét-San, vôme Befilisteñ be nga tyelé bie éyoñ be nga bôé Saül e Gilbôa.

¹³ Ane a nga vaa bivese bi Saül a bivese bi mone wé Yônatan; be nga nyoñe fe bivese ya bôte menyôle map me nga bôô nseñ.

¹⁴ Be nga jame bivese bi Saül a bi bi mone wé Yônatan e sii Bényamin, e Séla, e soñe Kis, ésaa Saül, be nga bo e jam ése Nti a nga bendé. Eyoñe mam mete me maneya, Zambe a nga su'ulane botane si.

Israél a wosane Befilisteñ

¹⁵ Ane Befilisteñ be nga beta wosane Israél. Nde David ba be bebo bisaé bé be nga ke a wosane Befilisteñ. David a mbe nte'an.

¹⁶ Yisbi-Benôd, wua ya bone be Rafa, a nga bili akoñ é too adit besikel mintete mila, adite mvot; a nga bili fe mfefé nkpwaté mekôn ô fane nye kandé. A nga kobô na a zu ba'é wô David.

¹⁷ Abisayi mona Seruya a nga zu volô David, nd'a nga bibi mone Filisteñ a wôé nye. Nde bôte be David be nga kane ngana a jô nye na: Bia be mia bia ye bo te beta kui a ke wosan a wo ye bo te dime lambe y'Israél.

¹⁸ Mam mete me maneya, mewosan a Befilisteñ me nga beta taté e Gôb. Ane Sibekayi, mone Ukatite a nga wôé Saf, wua ya bone be Rafa.

¹⁹ Bita a Befilisteñ bi nga beta taté e Gôb, ane Elhanañ, mona Yaaré-Oregim ya Bétléhém, a nga wôé Gôliat ya Gat a nga bili akoñ, ntyen y'été ô mbe anen ane nko'o élé.

²⁰ Bita bi nga beta boban e Gat. Beta ayabe môt a mbe été akule wo a akul abo ése é bili nye anyu asaman, ése anyu mewôm mebaé a anyiin, a mbe fe môte ya Rafa.

²¹ Ane a nga soñe Israél; Yônatan e mona Siméa, monyañe David, a nga wôé nye.

²² Bôte bete benyin be mbe bôte ya Rafa ya Gat. Be nga ku e mo me David a mo bebo bisaé bé.