SAMUEL BAA EJÔÉ DAVID 20 - Kalate Zambe Nnomo a Mfefe Mfefé Nkôñelan

Séba a yaa David, Yôab a wôé Amasa

¹ Satane môt a mbe valé, jôé na Séba, e mona Bikri, mone Bényaminite. Ane a nga loñe toñ a jô na: Bi nji beta bi ngap a David, bi nji bi ngab éziñ a mona Izayi! Môt ase a kele menda bindelé mé, a Israél!

² Eyoñe te bôte bese ya Israél be nga ke David ôyap a ke lat a Séba, e mona Bikri. Ve bôte ya Yuda be nga timbi a njô bôte wop a ke li'itane nye ataté Yordan a kui Yérusalém.

³ Ane David a nga bulan e *nda jé Yérusalém. Nde njô bôt a nga nyoñ bibon awôm a nga li'i bi ba'ale nye *nda, nd'a nga futi be vôm be mbe mfetan; a nga ve biôm asu ya ba'ale be, ve ba be be be nji beta ke binoñ, be nga feteban a kui môse ya awu dap, be nyiñik ane minkus.

⁴ Ane njô bôt a nga jô Amasa na: Bañete'e ma bôte ya Yuda be zu den melu mela; ve wo tabe'e va éyoñ ji.

⁵ Nde Amasa a nga ke a bañete Yuda; v'a nga bo te tôé atiñe njô bôt a nga ve be.

⁶ Nde njô bôt a nga jô Abisayi na: Séba e mona Bikri a ye dañe bo bia *abé éyoñe ji a lôte Absalom, womien nyoñe bebo bisaé be Masa wôé ô tôñe nye te na a kui bitison bi bili alem a tup.

⁷ Ane nsamba bita Yôab a Jôô ô nga tôñe nye, nalé fe Bekérétieñ, Bepelétieñ, a biwôlô bi bôte bise; nde be nga kôlô Yérusalém a tôñe Séba e mona Bikri.

⁸ Eyoñe be nga kui bebé e beta ako'o a ne Gabaoñ, ane Amasa a nga suane be ôsu. Yôab a nga tiñeti kandé e biyé a nga be'e, a tyelé nkpwaté mekôn été ô too abam. Nkpwaté mekôn ô nga ku si éyoñe Yôab a nga subu ôsu.

⁹ Yôab a nga jô Amasa na: Ye ô ne *mvo'é a mojañ? Nd'a nga bi Amasa zel a wo ya mbo nnôme na a wubane nye.

¹⁰ V'Amasa a nji tabe ntyel a nkpwaté mekôn Yôab a nga bili wo; Yôab a nga jii nye wô abum a bôé *miñya mié si, teke bak éyoñe baa; ane Amasa a nga wu. Wôna Yôab ba monyañ Abisayi be nga tôñe Séba e mona Bikri.

¹¹ Môte ya bendôman be Yôab a nga tebe bebé a jô'ô na: Za a ne ngame Yôab a za a ne asu David? A ntoo ve tôñe Yôab!

¹² Amasa a mbe a vuñuk metyi été ézezañe njoñ; éyoñe môt ate a nga yene na bôte bese ba tebe, a nga sô'ôlô Amasa afub été a vaa nye njoñ a wua ngômesan e nyôle jé, éyoñ a nga yene na bôte bese ba kui nye bebé ba tebe.

¹³ Eyoñe be vaaya Amasa njoñ, môt ase a nga tôñe Yôab na be titane Séba e mona Bikri.

¹⁴ Ane Séba a nga lôte *meyoñ mese y'Israél a tôñe zene ja ke Abél-Bét-Maaka a Bebérim bese. Nde be nga sulan a tôñe nye.

¹⁵ Nde be nga dilane Séba Abél-Bét-Maaka. Nde be nga bô'ô tyia a kui bebé e mfine ya tison, éyoñe te be nga taté na ba bôé mfine na ô ku.

¹⁶ Eyoñe te mfefe'e minga ô nga taté na wo yôtan e tison ô jô'ô na: Vô'ôla'an! Vô'ôla'an! Ma ye'elane mia mi jô Yôab na: Za'ak a kui va, ma ye kobô wo!

¹⁷ Nde Yôab a nga subu nye bebé; minga nye na: Ye wo ô ne Yôab? Nye na: Ma le! Minga nye na: Vô'ôlô'ô nkobô mbo ésaé wôé a ne minga; Yôab na: Ma wôk.

¹⁸ Minga na: Be mbe be jô'ô melu mvuse na: Bi tame sili Abél-Bét-Maaka, éyoñe te ajô da ye kômban.

¹⁹ Tisone jangan é ne jia ya bitison bia dañe évôvoé bi nyiñe fe *mvo'é a Israél, ve wo wo jeñe na ô jiane tison é ne nyia Israél! Amu jé wo ye tyame ngab éli'i Nti'

²⁰ Yôab a nga yalane na: Ôsimesan ya tyam a jian ô kele ma ôyap!

²¹ A nji bo nalé, ve môte ya nkô Efrayim jôé na Séba e mona Bikri a te bete wo na a wosane njô bôt, na a wosane David. Ke'ane bia ve nye étam wôna ma ye ke tisone nyô ôyap. Ane minga a nga jô Yôab na: Ya! Ba ye wua wo nlô wé e mfine yôp.

²² Nde minga a nga ke be bôte bese a atyeñe dé ése, ane be nga tyi'i Séba nlô e mona Bikri a wua wô Yôab. Ane Yôab a nga loñe toñ; éyoñe te bôt be nga mialan ôyap a tison, môt ase a kele e menda bindelé mé. Wôna Yôab ki a nga bulane Yérusalém, be njô bôt.

²³ Yôab a mbe évete ya nsamba mewosan ôse y'Israél; Benaya, e mona Yehôyada, a mbe évete Bekérétieñ a Bepelétieñ;

²⁴ Adoram a mbe a jô'ô mam bisaé; Yôsafat, e mona Ahilud, a mbe mba'ale mintilan;

²⁵ Séra a mbe ntilimam; Sadok ba Abiatar be mbe betuni;

²⁶ Iraya Yayir, David a nga bili fe nye *ntuni mfa'a wé.