SAMUEL BAA EJÔÉ DAVID 2 - Kalate Zambe Nnomo a Mfefe Mfefé Nkôñelan

Ba telé David Njôô Ebroñ

¹ A nga bo na éyoñe mam mete me maneya, David a nga sili nkômbane Nti a jô'ô na: Ye ma ye bet e tisone jia ya bitisone ya Yuda? Ane Nti a nga yalane nye na; betek. David na: Me bete vé? Nti na: Ebroñ.

² Ane David a nga bet a binga bé bebaé: Ahinôam ya Yizrél a Abigayil, nga Nabal ya Karmel.

³ David a nga kee fe bôt be nga too fefele jé, môt ase a *nda bôte jé; nde be nga tabe bitisone ya Ebroñ.

⁴ Eyoñe te bôte ya Yuda be nga zu valé a wo'o David mbon ya bo njô bôte ya Yuda. Be nga kate David foé na bôte ya Yabés e Galad be nga jame Saül.

⁵ Nde David a nga lôme minlôman e be bôte ya Yabés e Galad be Kate be na: Nti a bota'ane mia, amu mbamba jam mi maneya bo Saül, masa wônan, vôm mi maneya jame nye.

⁶ Eyoñe ji, Nti a mvama'ane mia a liti *zôsôô wé be mia! Ma fe ma ye bo mia mvaé, amu avale mboon mi maneya bo.

⁷ Mo menan me bo'o ngu, a bo'one biwôlô bi bôt; amu Masa wônan Saül a wuya a ma Yuda a maneya wo'o mbon ya bo njô bôte wop.

⁸ Ve Abnér, e mona Ner, évete mewosane Saül, a nga nyoñe Isbôsét, e mona Saül, a Kee nye Mahanayim.

⁹ Ane a nga telé nye njô bôte ya Galad, nyôa Beakunite, nyô ya Yizrél, Efrayim, Bényamin a Israél ase.

¹⁰ Isbôsét, e mona Saül a mbe mimbu mewôm menyin éyoñ a nga teléban njô bôt y'Israél; a nga jôô mimbu mibaé; ve *nda bôte Yuda é nga kabetane David.

¹¹ David a nga jôô ndaa Yuda mimbu zamgbwa a ngon ésaman.

Bita e zañe Yuda a Israél e Gabaoñ

¹² Abnér, e mona Nér, a bebo bisaé be Isbôsét, e mona Saül, be nga kôlô Mahanayim a ke Gabaoñ.

¹³ Yôab, e mona Séruya, a bebo bisaé be David, be fe be nga taté dulu. Nde bese be nga tôban bebé étame mendim ya Gabaoñ a tabe bana étame yat a ba bevok ôyab ôsu.

¹⁴ Ane Abnér a nga jô Yôab na: Ma yi na bisoé bezimbi biangane bi tame wosan bi lôô. Ane Yôab a nga Kañese.

¹⁵ Nde be nga kôlô si minsamba abime da: bôt awôm a bebaé mfa'a Bényamin a Isbôsét, e mona Saül a awôm a bebaé mfa'a bebo bisaé be David.

¹⁶ Môt ase a nga bi môt a ne nye ngame yat e nlô a jii nye nkpwaté mekôn avel abum, a bese be nga ku éyoñe jia. Nde be nga yôlé vôm ate na Elkat-Asurim.

¹⁷ Angônda mbia bita bi nga bobane *môs ôte, e bita bite, Abnér a bôte y'Israél be nga dañe bômban amu bebo bisaé be David be nga liti be njuk.

¹⁸ Bobefam belaa be Séruya be mbe valé: Yôab, Abisayi a Asaél. Asaél a mbe avevese mebo ane nko'o mefan;

¹⁹ a nga tôñe Abnér teke selane nye mbo nnôm nge mbo ngal.

²⁰ Nde Abnér a nga kôñelan a jô na: Ye wo le Asaél? Nye na: Ma le.

²¹ Abnér a nga jô nye na: Kele mbo nnôm nge mbo ngal; biik jia ya bisoé bendômane bi a nyoñe mbime wé.

²² Abnér a nga beta fe jô Asaél na: Kele ma ôyap; amu jé ma yiane wôé wo, a ma ye bo nguleya fombô monyoñ Yôab asu aya'

²³ Ve Asaél a nga bene ke nye ôyap. Eyoñe te Abnér a nga jii nye nsoñ akoñ abum ô tulane yat. Nde a nga ku si a wu valé. Bôte bese be nga lôte vôm Asaél a nga wu be nga tebe.

²⁴ Nde Yôab a Abisayi be nga ke ôsu a tôñe Abnér, be nga kui abete nkôle Amna valé jôp é nga dim. Amna a ne bebé a Gia, e zene ja ke *nkôte si ya Gabaoñ.

²⁵ Ane bone be Bényamin be nga ke mvuse Abnér be bo ngume nsamba a tebe abôbône nkôle éziñ.

²⁶ Eyoñe te Abnér a nga loone Yôab a jô na: Ye nkpwaté mekôn wo ye ke ôsu a wôé éyoñ ése? Ye ô nji yeme na jame te da ye man a beta ôlun? Wo ye tabe a kui éyoñ évé te jô bôte na be bo te beta tôñe bobenyañ'

²⁷ Nde Yôab a nga yalane na: Ane Zambe a vee! Nge ô nji ye Kobô, bôt be nga ye telé mewosane mametyé, môt ase a jôké'é monyañ.

²⁸ Ane Yôab a nga loñe toñ a bôte bese be nga tebe; be nji fe beta tôñe Israél a be nji fe ke ôsu a wosan e zañe jap.

²⁹ Abnér a bôte bé be nga wulu ngum alu *nkôte si ya Araba; a be nga dañe Yordan, a jômôsô Bitron ase a kui Mahanayim.

³⁰ Eyoñe te Yôab a nga bulane mvus ntôñan a nga tôñ Abnér a sulane bôte bese; bôt awôm a ébule ya bebo bisaé be David a Asaél.

³¹ Ve bôte be David be nga wôé bôte ya Bényamin a Abnér mintete mila a mewôm mesaman.

³² Be nga Kee Asaél a jame nye e Soñ ésaa e Bétléhém. Yôab a bôte bé be nga wulu ngum alu, éyoñe te be nga kui Ebroñ éyoñ éfufube tyé ja taté bo.