SAMUEL BAA EJÔÉ DAVID 18 - Kalate Zambe Nnomo a Mfefe Mfefé Nkôñelan

Bita e zañe bôte be Absalom a ba be David

¹ Ane David a nga lañe bôt be mbe nsamba wé, a telé be bivete ya betoyini a bi ya mintet.

² Eyoñe te David a nga lôme ngabe lale ya bôt éjôé Yôab si, ngabe lale fok éjôé Abisayi, e mona Séruya, monyañe Yôba, a ngabe lale ja su'ulan éjôé Itayi ya Gat si; ane njô bôt a nga jô bôte na: Bia be mia fe bia zu ke.

³ Ve bôt be nga jô nye na: Woo ye ke kui! Amu nge bia tup, besiñ baa ye ke dañe fombô bia; to'o na éfase bôte jia ya be bia ja wu, besiñ ba ye bo te nyoñe jame te beta jam; v'éyoñe ji, ô ne ane toyina bôte ya be bia; jam afe na, da dañe mvaé ô zu ve bia mvolan ô so'o e tison.

⁴ Njô bôt a nga yalane be na: Ma ye bo jam mia yene mvaé. Ane njô bôt a nga tebe fefele *mbé nté bôt be nga kui minsamba mintet a betoyini.

⁵ Njô bôt a ga bendé Yôab, Abisayi a Itayi na: Amu nye'an mi bili mfa'a wom, bela'an Absalom a évôvoé.

⁶ Eyoñe te bôt be nga so afan a zu tôban Israél, mewosan me nga boban afan Efrayim.

⁷ Vôm ate bôte ya Israél be nga wu ébôm, bebo bisaé be David be nga dañe be, bôte toyini mewôm mebaé be nga ku.

⁸ Mewosan me nga yiane si ése, a afan é nga mine bôt abui *môs ôte a dañ abime nkpwaté mekôn ô nga min.

⁹ Absalom a nga tele e zañe bebo bisaé be David été. Absalom a nga bete mulé yôp, nde mulé a nga nyiine mintyaé mi beta élône si, nde nlô ô nga bili Absalom élôn. Nde Absalom a nga li'i a tyele e zañe yôp a si, ve mulé a nga bete yôp a nga lôt teke fombô.

¹⁰ Eyoñe môt éziñ a yeneya jame te, a nga zu de kate Yôab a jô'ô na: Avale di nde ma te yen; Absalom a tyelé élôn!

¹¹ Ane Yôab a nga jô môt a nga kate nye jame te na: Wo te kôme yene nye! Amu jé ô nji mane nye valé? Ma te ye ve wo bifase bi argent awôm a kandé.

¹² Ve môt ate a nga jô Yôab na: To'o na moné a ku akule wo dam été ane bifase bi argent toyini, me se nguleya same wo wom a nnambe mona njô bôt; amu njô bôt a nga bendé wo jame di melo mangan été, nalé fe e be Abisayi a Itayi a jô'ô na: Môt ase a tabe'e ntyel ajô ésoé ndôman Absalom!

¹³ Nge me too ye bo mboone ya lame mamien ôlam mfa'a ya dimili ényiñe jam, jam éziñ é nji ye sobô be njô bôt, a womien ô nga ye ke ma ngame yat.

¹⁴ Ane Yôab a nga jô na: Me se nguleya jañele éyoñ be wo! Nd'a nga nyoñ mekoñ melaa a jii me Absalom e *nlem valé a ngenan a vee e zañ élôn.

¹⁵ Bendôman awôm be nga be'e biôme mewosan bi Yôab, be nga bômane Absalom, be nga bibi nye a wôé nye.

¹⁶ Eyoñe te Yôab a nga loñe toñ, a bôt be nga bulane mvus, teke beta ke ôsu a tôñ Israél, amu Yôab a nga kamane be na be bo nalé.

¹⁷ Ane be nga nyoñ Absalom a wua nye e beta ébé été ézezañ afan; nde be nga ta'a nye beta avise meko'o nyô. Ane Israél ase a nga tup, môt ase e *nda éndelé jé.

¹⁸ Valé a vee, Absalom a nga telé émiene beta éve'ela e mbi'ili njô bôt, amu a nga jô jô na: Me nji bi monafam ya be ne nguleya ba'ale ôsimesane ya jôé dam, nde a nga yôlé éve'ela'a te jôé dé émien, ba loone je a kui môse wuna na: Ngune Absalom.

David a nyoñe foé awu Absalom

¹⁹ Ahimaas, mona Sadok a nga jô na: Ma zu mate ke kate njô bôte mbamba foé na Nti a tyi'iya ajô dé a kôté nye mo besiñe bé.

²⁰ Yôab a nga jô nye na: Woo ye ke bo mbe'e mbamba mefoé e môse wu; wo ye be'e mbamba mefoé *môs ôfe, ve woo ye ke de bo e môse wu njô bôt a ne ñwuan.

²¹ Nde Yôab a nga jô mone Kusite na: Kelek a kate njô bôt e jam wo te yen. Nde mone Kusite a nga kute meboñe si ôsu Yôab a mate mbi.

²² Ahimaas, e mona Sadok, a nga beta jô Yôab na: To'o jé ja kui, ma zu mate mbi, ma fe, e mvuse mone Kusite. Nde Yôab a nga jô na: Amu jé wo kômbô mate mbi, a mone wom? A nji bo mbamba foé a ne soo wo mvaé.

²³ Jam ése é ne nguleya kui, ma zu mate mbi, nalé Ahimaas a nga beta jô. Yôab a nga jô nye na: Mvo'é a ntoo ve ke mbi! Eyoñe te Ahimaas a nga mate mbi e zene ya nje'ese a kui a nga lôte mone Kusite.

²⁴ David a nga too e zañe mimbé mibaé. Nde mmombô a nga ke andile ya *mbé mfa'a ya mfin; ane a nga bete mis a fombô; ateme na môt a mate'e étam.

²⁵ Nde mmombô a nga yôtan a kate de njô bôt. Ane njô bôt a nga jô na: Nge a ne étam, yeme na a soo mbamba mefoé. Môt ate a nga zu a subu.

²⁶ Mmombô a nga yene môte mfe a mate'e mbi; nde mmombô a nga yôtane mba'ale *mbé na: Tame yene môt a mate mbil étame nyôlé. Njô bôte na: Nye fe a soo mbamba mefoé.

²⁷ Mmombô a nga jô na: Me lôô na: Môte y'ôsu a mate fe v'ane Ahimaas, mona Sadok Njô bôte na: A ne mbamba môt, a zuu mbamba mefoé.

²⁸ Ane Ahimaas a nga bete *tyiñ a jô njô bôte na: Mbôlô! Nd'a nga kute meboñe si ôsu njô bôt, asu é butu si a jô na: Ébotan a Nti e Zambe wôé, Nyô a veya bôt be nga bete wo ya wosane njô bôt masa wom!

²⁹ Njô bôte na: Ye ésoé ndôman Absalom a ne *mvo'é teke mbia jam éziñ be nye? Ahimaas na: Me nga yene fe ndula bôt éyoñe Yôab a nga lôme mbo ésaé njô bôt a ma mbo ésaé wôé; ve me nji yem jam ébien é mbe.

³⁰ Njô bôte na: Kele fefel a tebe valé; nde Ahimaas a nga tebe fefel a yange tetele.

³¹ Eyoñe te Kusite a nga so. Nde Kusite a nga jô na: Njô bôt e masa wom a tame wô'ô mbamba foé nyô! Den Nti a tyi'iya wo ajô a nkôtane ya kôté wo e mo me ba bese be nga tebe wo ngame yat.

³² Ane njô bôt a nga jô mone Kusite na: Ye ésoé ndôman Absalom a ne *mvo'é, teke jam da ndeñele nye? Mone Kusite a nga yalane na: Besiñe be tate wom njô bôt a ba bese ba tebe wo ngame yat a jeñe wo *abé be bo'ok aval'ane ésoé ndômane te!