SAMUEL BAA EJÔÉ DAVID 17 - Kalate Zambe Nnomo a Mfefe Mfefé Nkôñelan

¹ Ane Ahitôfél a nga jô Absalom na: Jôké'é ma me tobe befam toyini awôm a ébaé! Ma ye kôlô si a tôñe David alu ébiene di.

² Ma ye suane nye yôp éyoñ a te'eya, a éyoñe mo mé fe me ntoo nte'an, ma ye futi woñ e vôm a né, a bôte bese ba be nye be né ba ye tup. Njô bôt étam nye ma ye wôé.

³ Nalé ma ye dutu bôte bese be wo; mbulane mvus ya bese ô tii be môt wo jeñ, éyoñe te bôte bese ba ye tabe *mvo'é.

⁴ Ane Absalom a nga yene nkobô te mvaé nalé fe bemvendé bese y'Israél.

⁵ Ve Absalom a nga jô na: Tame fe loon Usayi, mone Arkieñ, bia ye fe wôk jam a ye jô.

⁶ Ane Usayi a nga zu be Absalom, a Absalom a nga jô nye na: Avale di nde Ahitôfél a te kobô; ye bia yiane bo aval a te jô, ye momo? Wo fe kobô'ô!

⁷ Usayi a nga yalan Absalom na, éyoñe ji fe'e Ahitôfél a te ve é nji bo mvaé.

⁸ Nde Usayi a nga jô na: Wo yem ésoo a bôte bé! Be ne biwôlô bi bôt, ayok ane zo'o ya afan ba te wôlé *bon. Esoo a ne môta mewosan a a ye lôt alu ézezañe bôt;

⁹ tame yen, éyoñe ji, a solô ébé éziñ nge vôm éziñe mfe. Nge ataté éyoñe ji, ba wôé bôte b'éziñ, foé ja ye mialan a bôt ba ye jô na: Be dañeya bôt be nga lat a Absalom bita!

¹⁰ Eyoñe te môt a dañ éwôlô, to'o na a be'e nleme ngbwegbwem, a ye bili atek; amu Israél ase a yeme na ésoo a ne mben a na ba be biwôlô bi bôt be ne nsamba.

¹¹ Ajô te ma ve fe'e na Israél ase a sulan e vôm ô né, ataté Dañ a kui Birséba, be too abui ane nselek ô né e nsa'a mañ; éyoñe te womien wo ye ke wosane be.

¹² Bia ye kui be nye avale vôm ése a né a bia ye ku nye yôp aval'ane mfô a ku si. Teke wua a ye li'i, to'o nye, to'o môte wua ya bôte ba be be be né.

¹³ Nge a wondé e tison éziñ, Israél ase a ye kee minkol e tison éte, a dutu je ôtôñ, akekui ba ye bo teke fe koon to'o ve ôyôm ôkôk.

¹⁴ Eyoñe te Absalom a bôte bese y'Israél be nga jô na: E fe'e Usayi, mone Arkieñ, é n'abeñ a dañe nyô Ahitôfél. V'é ne na Nti a nga tyi'i na a kpwé e mbamba fe'e Ahitôfél, éyoñe te a ye zuu bidim be Absalom.

David a Lôt e Yordan

¹⁵ Ane Usayi a nga jô betuni Sadok a Abiatar na: Ahitôfél a te ve Absalom fe'e nyô a nalé fe e be bemvendé ya Israél; ve ma ma te liti jame di a di.

¹⁶ Eyoñe ji jika'a lômane foé be David a jô nye na: Te tabe alu di minje'ese ya *nkôte si, ve kele ôyap, njô bôt a bôte bese be ne nsamba wé be za bôé bebien vôme ya wu.

¹⁷ Yônatan a Ahimaas be mbe be tele En-Rôgel. Eyoñe te mbo ésaé minga a nga zu jô be na be ke kate njô bôte David foé, amu be nji bo ayo'o ya yené nge nyiin e tison.

¹⁸ Ndôman éziñ é nga yene be a ke kate Absalom. Ve Bebaane bese be nga ke avôl a kui Bahurim, e *nda môt éziñ a mbe a bili mfa'an anjeñ e nseñ, nde be nga sis été.

¹⁹ Eyoñe te minga a nga nyoñ éyé a buti je anyu anjeñ a miase ntya'ane nlisi été yôp na môt a bo te yeme jam éziñ.

²⁰ Eyoñe te bebo bisaé be Absalom be nga nyiine *nda be minga ate a jô na: Ahimaas a Yônatan be ne vé? Minga a nga yalane be na: Be dañeya mon ôsôé. Be nga jeñ, v'éyoñ be boya te yene be be nga bulane Yérusalém.

²¹ Eyoñ be keya, Ahimaas a Yônatan be nga jô David na: Kôla'ane si bo'on avôle ya dañ ôsôé, amu Ahitôfél, a te ve fe'e ja wosane mia ana.

²² Eyoñe te David a bôte bese be mbe nsamba wé be nga kôlô si a dañe Yordañ; melenda me tyé, teke môte wua a nga li'i fefel, teke môte wua a nga bo te dañe Yordan.

²³ Eyoñe Ahitôfél a nga yene na be nji ke belane fe'e jé, a nga dañ éjakase jé a ke *nda jé ya tisone jé. Nd'a nga ve mebendé e *nda jé a wôé émien. Avale te nde a nga wu, be nga jame nye e soñ ésaa.

David a kui Mahanayim

²⁴ Ane David a nga kui e Mahanayim. Absalom a nga dañe yordan éyoñe te émien a bôte bese y'Israél nsamba wé.

²⁵ Nde Absalom a nga telé Amasa nlô ya nsamba mewosan éjiane Yôab; Amasa a mbe mona môt a too jôé na: Yitra, mon Israélite, nyô a nga ke be Abigayil, ngone Nahas, kale Séruya, nyia Yôab.

²⁶ Israél a Absalom be nga vule minkan e si ya Galad.

²⁷ Eyoñe David a nga kui Mahanayim, Koni, e mona Nahas ya Raba Beamônite, Makir, e mona Amiél ya Lôdebar, a Barsilayi mone Galadite ya Regelim,

²⁸ be nga soo binoñ, befandé, mende'e m'ékon, blé, fôn, avut, ñyañan mefes, mefese mefe, mefese me fôfo'o, a ñyañan mefes,

²⁹ wôé, avoñ, bikela a mintômba, a befrômage be nyak. Be nga zuu biôm bite bise be David a bôt be mbe nsamba wé na be di; amu be nga jô na: Bôte ba be yianeya tôbane njuk a zaé, a nte'an a évé, e *nkôte si.