SAMUEL BAA EJÔÉ DAVID 16 - Kalate Zambe Nnomo a Mfefe Mfefé Nkôñelan

Bemvôé a besiñ be David

¹ Eyoñe David a lôteya abôbône nkô abim éziñ, a teme na Siba a nga zu nye ôsu, a mbe mbo ésaé Mefibôsét a bijakase bibaé bi bili *bon, bi be'e fe belet mintete mibaé, mimbom bibuma bi ndi'i woon bi ne nkôt ntet, bibuma ya ésep ntet a nde'e woone jia.

² Nde njô bôt a nga jô Siba na: Wo ye bo biôme bite jé? Siba na: Bijakas bia ye volô mbe'an ya be'e bôte ya *nda njô bôt belet a bibuma ya ésep bia ye bo bidi asu bendôman, a bôt ba ye tek e *nkôte si ba ye nyu woon.

³ Njô bôt a nga jô na: E mon masa wôé a ne vé? Siba a nga yalane njô bôte na: A li'iya Yérusalém amu a te jô na: Den ndaa Israél ja ye bulane ma éjôé ésaa wom.

⁴ Ane njô bôt a nga jô Siba na: Tame yen jôm ése é ne ji Méfibôsét é ne énjôé. Siba na: Ma kute meboñe si! Me tame yene *mvam mise môé, a njô bôt masa wom!

Simeyi a yo'é David

⁵ Njô bôte David a nga ke a kui Bahurim. Môt éziñ a nga so valé a too môte ya abume bôte *nda Saül, jôé na: Siméyi, e mona Géra. Emien a nga so nalé a zu a tote mejô biyo'é anyu dé.

⁶ Nde a nga wua David *mekok a wua fe bebo bisaé be njô bôte David, wôna jama bôt a bôte mewosan be mbe môt ate mbo nnôm a mbo ngal.

⁷ Simeyi a mbe a kobô'ô nalé a yoké'é David a jô'ô na: Kele atan, kele atan, ñwôé bôt, zesé jôm!

⁸ Nti a bo éyoñe jina na metyi mese ya ndaa Saül me sôé wo nyô amu wo jôô éjiane jé; a Nti a keya éjôé e mo me mone wôé Absalom, ô lôô ô ntoo éngôngo avale wo yiane de, amu ô ne ñwôé bôt!

⁹ Eyoñe te Abisayi, e mona Séruya, a nga jô njô bôte na: Amu jé mbime mvu wu wo yo'é njô bôt e masa wom? Tame suu me lôt, a ma ye tyi'i nye nlô.

¹⁰ Ve njô bôt a nga jô na: Me bili za ajôô a wo, mona Seruya? Nge a yo'é ma nalé a ne na Nti a te jô nye na: Yoké'é David! Za ñhe a ye jô nye na: Amu jé wo bo ana'

¹¹ David a nga jô Abisayi a bebo bisaé bé bese na: Mi lôô na, e mone wom a nga kui *miñya miam a jeñ ényiñe jam, kô fé mone Bényaminite nyô! Jôka'ane nye a yo'é, amu Nti a te kobô nye de.

¹² Eko éziñe na Nti a ye fombô nju'u wom a su'ulane bo ma mvaé éjiane biyo'é ya den.

¹³ Ane David ba be bôte bé be nga kee e dulu dab ôsu; Simeyi a mbe a wulu'u ayo nkô bebé a David, a wulu'u a yoké'é nye, a wu'a nye *mekok, a miala'ane mbuluk.

¹⁴ Eyoñe te njô bôt a bôte bese ba be be be mbe nsamba be nga kui abuk é jaéya be *nlem, a valé nye be nga bo ne suu édudu.

Absalom a suane Yérusalém Mefe'e me Ahitôfél ba usayi

¹⁵ Absalom a bôte bese, bôte y'Israél, be nga nyiin e Yérusalém; a Ahitôfél a mbe nsamba wé.

¹⁶ Eyoñe Usayi, mone Arkieñ, mvôé David, a nga kui be Absalom a nga jô nye na: Ényiñe njô bôt é bo'o ayap! Enyiñe njô bôt é bo'o ayap!

¹⁷ Nde Absalom a nga jô Usayi na: Tame ñhe yene nye'an ô bili nyo mvôé! Amu jé mia nyô mvôé mi nji ke'

¹⁸ Usayi a nga yalan Absalom na: Momo! Amu me ne be nyô Nti a jama bôte nyôna ase a bôte bese y'Israél be tobeya, môt ate nye bia nye bia ye tabe.

¹⁹ Jame baa na: Za ma ye saane nye ye sa e mone wé? Avale me nga saan ésoo avale te ma ye saane wo.

²⁰ Ane Absalom a nga jô Ahitôfél na: Bônda'ane fe'e ya jam bia ye bo.

²¹ Nde Ahitôfél a nga jô Absalom na: Kele be bibon ésoo a nga li'i ndaa njô bôt be ba'ale je, éyoñe te Israél ase a ye yeme na ésoo a yeneya wo *abé, éyoñe te mo ya bôte bese be ne mvuse jôé ma ye yeme ngu.

²² Nde be nga lame *nda éndelé andil asu Absalom, éyoñe te Absalom a nga ke bômbô bibon bi ésaa e mise m'Israél ase.

²³ Mefe'e Ahitôfél a ve me mbe me bili ngu melu mete v'ane ba sili nkômbane Zambe Emien. E nne mefe'e me Ahitôfél mese me mbe nalé, to'o asu David nge asu Absalom.