SAMUEL BAA EJÔÉ DAVID 15 - Kalate Zambe Nnomo a Mfefe Mfefé Nkôñelan

Absalom a kômbô wôlé éjôé

¹ Eyoñe mam mete me maneya, Absalom a nga jeñe mezene ya bi vagoñ bita, bikabela a bôte mewôm metan ba mate ôsu vié.

² A nga kôlô si ndibe tyé a tebe fefele zene ja ke mbé; éyoñ ése môt a nga bili ajô a kele be njô bôte na a tyi'i nye ajô te, Absalom a nga loone nye a jô nye na: Wo so tisone fé? Nge a yalane na: Mbo ésaé wôé a ne môte ya ayoñ Israél si ayoñ Israél ka,

³ Absalom a nga jô nye na: Tame yen jam wo soman é ne *mvo'é a zôsôô; ve teke môte ya be njô bôt a ye vô'ôlô wo.

⁴ Absalom a nga ke ôsu a jô na: Za a ye telé ma *ntyi'i mejô ya si jangan? Eyoñe te môt ase a bili ajô ya soman, nge jôm éziñ é ne énjé a kamane je, a ye zu be ma a ma ye tyi'i ny'ajô *zôsôô.

⁵ Eyoñe môt a zu nye bebé a kute meboñe si ôsu vié, a nga same nye wo, a bi nye a wubane nye.

⁶ Avale te Absalom a nga bo bôte bese be nga ke be njô bôt asu ntyi'ane mejô, a Absalom a nga dutu minleme mi bôte ya Israél.

⁷ Mvuse mimbu mewôm menyin, Absalom a nga jô njô bôte na: Kañese'e na me ke Ebroñ, me jalé ntiñetan me nga tiñeti Nti.

⁸ Amu mbo ésaé wôé a nga tiñeti *atiñ, éyoñ me nga too Gésur e Siri; me nga jô na: Nge Nti a bulane soo ma e Yérusalém, ma ye kañe Nti.

⁹ Nde njô bôt a nga jô nye na: Kele *mvo'é Ane Absalom a nga kôlô si a ke Ebroñ.

¹⁰ Absalom a nga lôme belooé e *meyoñ mese y'Israél a jô'ô na: Éyoñ mia ye wô'ô tyiñe toñ, mia ye jô na: Absalom a jôô Ebroñ.

¹¹ Bôte mintete mibaé ya Yérusalém be mbe nloon, ba be Absalom be nga ke; be nga ke teke yeme jam éziñ.

¹² Nté Absalom a nga bo mimvean, a nga lôm be ke nyoñ Ahitôfél, e tisone Gilô, mvee melebe David. Eyoñe te ékôane ja kômbô kpwé njô bôt é nga dañe bo ngu, a bôt be nga dañe dañe bo abui e ngame Absalom.

David a tup a kôlô Yérusalém

¹³ Ane môt éziñ a nga zu kate David foé a jô na: Bôte y'Israél be maneya bo élat a minleme miap be Absalom.

¹⁴ Nde David a nga jô bebo bisaé bé bese ba be be be mbe Yérusalém na: Kôla'ane si, ntuban, amu *zen bi ne tube Absalom é nji bo. Bo'on avôle ya ke; nalé momo, nye a ye bo avôle ya koone bia, a dutu bidim be bia éyoñ a ye tyame tison a meyo me nkpwaté mekôn.

¹⁵ Ane bebo bisaé be njô bôt be nga jô nye na: E jam ése masa wongan, njô bôt, a ye tyik, bi ne ve bebo bisaé bôé!

¹⁶ Nde njô bôt a nga kui atan, a *nda jé ése é nga tôñe nye; a nga li'i bibon awôm bi ba'ale *nda njô bôt.

¹⁷ Njô bôt a nga kui, a bôte bese be nga tôñe nye; be nga tebe e susu'a *nda.

¹⁸ Bebo bisaé bé bese, Bekérétieñ a Bepelétieñ bese, be nga ke ngame jé; nalé fe Begatieñ bese bôte mintete misaman, be so'o Gat, nsamba njô bôt, be nga tebe njô bôt ôsu.

¹⁹ Ane njô bôt a nga jô Itayi ya Gat na: Amu jé wo fe wo ye zu nsamba wongan? Bula'an, mia njô bôt mi tabe, amu ô ne nneñ, nalé fe na ô ne nkôm.

²⁰ Ô nga so a angô'é, den me nga ke ma ndeñe wo nsamba wongan, éyoñe mamien me nji yem vôm ma ke! Bula'an mia be bobenyoñ nsamba; ve Nti a bo'o ngaa ya nye'ane wôé a mvame jôé!

²¹ Nde Itayi a nga yalane njô bôte na: Ane Nti a vee a ane masa wome njô bôt a vee, to'o na awu nge ényiñ, nne fe mbo ésaé wôé a ye tabe valé.

²² Ane David a nga jô Itayi na: Kele lôt! Eyoñe te Itayi ya Gat, a nga lôt a bôte bé bese, a bone bé bese ba be nye be mbe.

²³ Si ése é nga yôn a beta zô'é a nga bo éyoñe bôte bese be nga lôt. Njô bôt a nga tulane mbi'ili Sédroñ, a bôte bese be nga lôte bebé a zene ya *nkôte si.

²⁴ Sadok a mbe fe valé, ba be Belévit bese, be be'e éwolo élate Zambe; be nga bôé éwolo Zambe si a Abiatar a nga bet asu mimvean nté bôt be nga sondô mane kôlô e tison.

²⁵ Ane njô bôt a nga jô Sadok na: Bula'an éwolo Zambe e tison. Nge Zambe a mvamane ma, a ye beta soo ma a bo na me yen éwolo a vôm é bôô.

²⁶ Ve nge a jô na: Me nji fe kañese wo! Ma nyô, a bo'o ma jam ese a ye yene mvaé.

²⁷ Njô bôt a nga beta jô *ntuni Sadok na: Ye ô lôô, bula'ane *mvo'é e tison, nalé fe mone wôé Ahimaas a Yônatan, e mona Abiatar mia be bone benan bebaé.

²⁸ Mi lôô na éyoñ ja ye lôte ma abui e minje'ese ya *nkôte si akekui foé éziñ é soya ma be mia.

²⁹ Nde Sadok a Abiatar be nga bulan éwolo Zambe e Yérusalém a tabe wé.

³⁰ David a nga bete nkôle beôlivié. A betek a kele a yi, nlô mbutan, a wulu'u minsoé mebo, ba bese be mbe nsamba wé fe be nga buti minlô miap be nga bet be kele ba yôn.

³¹ Be nga zu kate David na: Ahitôfél ba Absalom be ne nsamba wua ya bôt ba kômbô kpwé éjôé. Nde David a nga jô na: A Nti, bo'o na meleb m'Ahitôfél me bo ma môt a vo'o vô'ôlô!

³² Eyoñe David a nga kui abôbône nkô, e vôm a nga kute meboñe si asu Nti, ateme na Usayi a nga zu tôbane nye a too mone Arkieñ, alô'ô nyaban a nlô ñwo'on étek.

³³ Ane David a nga jô nye na: Te zu nsamba wom, ô za bo ma adite mbe'e;

³⁴ V'é ne mvaé na ô bulane tison a jô Absalom na: A njô bôt, ma ye bo mbo ésaé wôé; melu mvus, me mbe mbo ésaé ésoo, ve me ne mbo ésaé wôé éyoñe ji; *zen éte nje ô ne volô ma éyoñ wo ye tonekan mefe'e me Ahitôfél.

³⁵ Betuni ba: Sadok a Abiatar mia be be mi ne wé. Jam ése wo ye wô'ô e *nda njô bôt, wo ye kate de betuni Sadok a Abiatar.

³⁶ A amu be bili bobefame babe bebaé fefele jap, Ahimaas asu Sadok, a Yônatan asu Abiatar, mia ye lôme ma tyiñe ya jam ése mia kômbô na me yem a be.

³⁷ Ane Usayi, mvôé David a nga bulan e tison. A Absalom a nga nyiin e Yérusalém.