SAMUEL BAA EJÔÉ DAVID 14 - Kalate Zambe Nnomo a Mfefe Mfefé Nkôñelan

Absalom a bulan e Yérusalém

¹ Yôab, e mona Seruya, a nga yeme na nleme njô bôt ô nga nye'e Absalom.

² Nde a nga lôm be ke nyoñe ntyetyeñe minga e Tékôa a jô nye na: Tabe'e ôlun été a jaé biôm meyep; te wobane mbon a yené ane minga a ne meyep été melu abui den.

³ Eyoñe te wo ye ke be njô bôt a kobô nye avale di. Ane Yôab a nga futi nye mejô a yiane kobô anyu.

⁴ Nde minga ya Tekôa a nga ke kobô njô bôt. A nga ku asu é butu si, a kute meboñ a jô na: A njô bôt, nyi'i ma!

⁵ Njô bôt a nga jô nye na: Jé? Nye na: Mbia jam! Me ne nkus, nnôme wom a wuya!

⁶ Mbo ésaé wôé a ne minga a nga bili bobefam bebaé, bebaane be nga bo mintañete afan teke môt a kandé be; wua a nga bibi nyô mbok a wôé nye.

⁷ Eyoñe ji ayoñ ése é tebeya na da wosane mbo ésaé wôé a ne minga be jô'ô na: Ke'e bia nyô a nga wôé monyañ! Bia kômbô wôé nye, asu ényiñ monyañ a nga wôé; bia kômbô jian to'o na nyoñ élik! Nalé ba ye dim atye'e nduan é li'iya ma, a li'i nnôme wom te jôé nge *mebuka'a e *si nyô été.

⁸ Nde njô bôt a nga jô minga na: Kele *nda jôé. Ma ye ve mebendé ajô dôé.

⁹ Ane minga ya Tékôa a nga jô njô bôte na: Ekob é ne énjam, a njô bôt tate wom, a njô ya ndaa ésaa wom! Njô bôt a éto njôane jé bi bo'o te bijô.

¹⁰ Njô bôt a nga jô na: Nge môt a kobô wo *abé, za'a me nye a a ye bo te beta taté na a nnambe wo.

¹¹ Nde minga a nga jô na: Njô bôt a simesa'an tote jôé Nti, e Zambe wôé, nalé nkune metyi a ye bo te kô'ôlane njañ, e mone wom a za wu! Njô bôte na: Ane Nti a vee! Kongo ésile jia ya nlô nyô mon jaa ye ku si.

¹² Ane minga a nga jô na: Kañese'e na mbo ésaé wôé a ne minga a jô njô bôt e tate wom v'éfia jia. Njô bôte na: Kobô'ô!

¹³ Minga na: Amu jé ô ne avale di e b'ayoñ é ne di Zambe, amu da yené e nkobô njô bôt été na, njô bôt a ne mekua amu a nji bo na nyô a nga lôme mekaban a beta so'

¹⁴ Bia yiane fo'o wu. Avale mendim ba te sôé si me se nguleya beta kôane vôme wua, avale te Zambe a ne te beta bete nyô a wuya si, ve a nji kañese na nyô a ne mekaban a tabe nye ôyap.

¹⁵ Eyoñe ji, nge ma te zu kobô njô bôt, e tate wom mam ma, é ne amu ayoñ da te bo me na me ko woñ. Nde mbo ésaé wôé a ne minga a te jô na: Ma zu ke kobô njô bôt, ndô'ôtô na njô bôt a ye bo e jame mbo ésaé wé a ne minga a sili émiene si a ye jô.

¹⁶ Ya, njô bôt a ye vô'ôlô mbo ésaé wé a ne minga a sili émiene si a kôté nye e mo me môt a yiane bo na me jañ éli'i Zambe été bia mone wom.

¹⁷ Mbo ésaé wôé a ne minga a te jô na: Ngo'o nge nkobô tate wom njô bôt wo ve ma awo'on. Amu tate wom njô bôt a ne ane éngele Zambe, nkôman ya wô'ô mvaé a *abé. Nti, e Zambe wôé, a tabe'e be wo!

¹⁸ Ane njô bôt a nga yalan a jô minga na: Te ma solé jam éziñe ya ajô ma zu sili wo. Minga na: E tate wome njô bôt a kobô'ô!

¹⁹ Njô bôt nye na: Ye wo Yôab ô nji bo be wo e jam ése di? Minga na: Avale é ne bebela na ô vee a njô bôt tate wom, me vo'o ke mbo nnôm nge mbo ngale ya jame tate wome njô bôt a jô. E ne fo'o bebela na mbo ésaé wôé Yôab nye a nga ve ma mebendé nye fe a nga futi nkobô ôse wu anyu mbo ésaé wôé a ne minga.

²⁰ Mbo ésaé wôé Yôab a bo jame te asu ya kôñelane jame te é bo aval'afe. Ve tate wom a ne fek v'ane éngele Zambe, mfa'a ya yem e jam ése da lôtane si.

Elat e zañe David a Absalom

²¹ Ane njô bôt a nga jô Yôab na: Yene na ma zu fo'o bo jame te; kele bo na Absalom mongô a zu.

²² Nde Yôab a nga ku asu é butu si, a kute meboñe si a botane njô bôt. Ane a nga jô na: Môse wu mbo ésaé wôé a yemeya na me yeneya *mvam e mise môé, a njô bôt masa wom, amu njô bôt a bo aval'ane nkobô mbo ésaé wé ô né.

²³ Eyoñe te Yôab a nga kôlô si a ke e Gésur a zuu Absalom e Yérusalém.

²⁴ Ve njô bôt a nga jô na: A kelek e *nda jé a a bo'o te yen asu dam. Ane Absalom a nga ke *nda jé teke yen asu njô bôt.

²⁵ Môte mfe a nji bo abeñ Israél ase ane Absalom, a nga nyoñ meseka'abui amu nalé; ataté abo si a kui abôbône nlô, teke jam éziñ é ne *abé é mbe be nye.

²⁶ Eyoñ a tyembane nlô, a mbe a bo'o de amané mbu ése, amu ésile jé é mbe nye adit, adite ésile ya nlô wé é mbe besikel mintete mibaé avale njô bôt a vek.

²⁷ Absalom a nga biaé bobefam belaa a monaminga wua jôé na Tamar; Tamar ate a mbe étua abeñ.

²⁸ Absalom a nga tabe mimbu mibaé te yen asu njô bôt.

²⁹ Nd'a nga sili Yôab na a lôme nye be njô bôt; ve Yôab a nji kômbô zu be nye. A nga beta sili nye éyoñe baa; ve Yôab a nji kômbô zu.

³⁰ Eyoñe te Absalom a nga jô bebo bisaé bé na: Mi lôô afube Yôab é ne fefel éndam; fôn é n'été, kela futane nduan été. Ane bebo bisaé be Absalom be nga di'i afup.

³¹ Eyoñe te Yôab a nga kôlô a ke be Absalom a sili nye na: Amu jé bebo bisaé bôé ba te di'i afube dam'

³² Absalom nye Yôab na: Ô lôô ma te lôme wo tyiñe na: Za'a va a ma ye lôme wo be njô bôt ô jô nye na: Amu jé me nga so Gésur? Da dañe mvaé mfa'a wome na me tabe wé. Eyoñe ji ma kômbô yen asu njô bôt; a nge ékob éziñ é ne be ma, a jibi'i bo na me wu.

³³ Nde Yôab a nga ke be njô bôt a ve nye nkañete te ôse; ane njô bôt a nga loon Absalom, nd'a nga zu be nye a kute meboñ asu é butu si ôsu njô bôt. Nde njô bôt a nga wuban Absalom.