SAMUEL BAA EJÔÉ DAVID 12 - Kalate Zambe Nnomo a Mfefe Mfefé Nkôñelan

Natan a kate David ayaa Zambe

¹ Ane Nti a nga lôme Natan be David. Nde Natan a nga zu be nye a jô nye na: Bôte bebaé be nga too tisone jia, wua a too nkukum, nyô mbo'o ki *nzôzoé.

² Nkukum ô nga bili étua abui bikela, mintômba a benyak.

³ Nzôzoé ô nji bi jôm veñgeveñge ve mone ngale ntômba wua, nyô a nga kus; a nga ve nye bidi, a nga yaé be nye ba be bone bé. A nga di di belet jé, a nyu mendim *élaé jé, a mbe a kele ôyo e tôé jé. A mbe nye ane ngo jé.

⁴ Nneñ éziñ a nga suane be nkukum. Nkukum ô nga ye'ele mone mbam a beta mbame biyem wé asu ya yame nneñ a nga kui be nye jôme ya di. Nde a nga bi ngale ntômbaa *nzôzoé môte wu a yame wô môt a nga suane be nye.

⁵ Eyoñe te David a nga yaa môt ate a jô Natan na: Ane Nti a vee! Môt a nga bo jame te a yiane wu.

⁶ A a ye bulane ngale ntômba biyoñ binyin, amu jam a nga bo a amu a nga bo te k'éngôngo.

⁷ Nde Natan a nga jô David na: Wo ô ne môt ate! Avale di Nde Nti, Zambe y'Israél a jô na: Ma me nga wo'o wo mbon ô bo njô bôte ya Israél, a ma me nga kôté wo e mo me Saül;

⁸ me veya wo e ndaa masa wôé, me teléya binga be masa wôé abume dôé, nge abime te é ne tyôtyoé, ma ye beté jam afe!

⁹ Amu jé ñhe wo te biasé nkobô Nti a mboone jam é ne *abé e mise mé? O wôéya Urie mone Hitite a nkpwaté mekôn; ô nyoñeya nga a bo minga wôé, ve nye, ô wôéya nye a nkpwaté mekône Beamônite.

¹⁰ Eyoñe ji, nkpwaté mekôn wo ye bo te kôlô *nda jôé, amu wo te biasé ma, a amu wo te nyoñe nga Urie, mone Hitite, a bo minga wôé.

¹¹ Nti a kobô na: Ma zuu bidim be wo bi so'o e *nda bôte jôé été, a ma ye nyoñe binga bôé womien a ve be wua ya bôt be ne wo bebé mise môé me lôô, a ye bômbô be éfufube jôp.

¹² Amu wo te bo asoé; ve ma ma ye bo jame te Israél ase a lôô, jôbe fe é lôô.

¹³ Ane David a nga jô Natan na: Me boya Nti *abé! Nde Natan a nga jô David na: Nti a jaméya *abé dôé woo ye ke wu.

¹⁴ V'amu wo te bo na besiñ be Nti be kobô mejô meta éyoñ wo te bo jame te, ajô te monafam a bialéya be wo a ye wu.

¹⁵ Ane Natan a nga ke e *nda jé. Nti a nga bibi mone minga Urie a nga biaé David, nd'a nga taté na a *duk.

¹⁶ Ane David a nga ye'elane Zambe asu monafam ate a a nga taté na a tyi bidi. Eyoñ a nga nyiine *nda jé a nga lôt alu a bôô tyia.

¹⁷ Benya bôtô ya *nda jé be nga yemete nye na a kôlô si; ve a nji kômbô a a nji di bidi ba be be.

¹⁸ E môse zamgbwale, ñwô be nga kate nye na mon a wuya; amu be nga jô jô na: Éyoñe mon a mbe a vee, bi nga kobô nye, ve a nji wô'ô bia; bia ye bo ayo'o ya jô nye aya na: Mon a wuya? Ke a ye bo ébubua!

¹⁹ David a nga yene na bebo bisaé bé ba kobô ôfôfoé e zañe jap, éyoñe te a nga yeme na mon a wuya. Nde a sili bebo bisaé bé na: Ye mon a wuya? Be nga yalane na: A wuya.

²⁰ Eyoñe te David a nga kôlô si, a mane wobane mendim a ôlobinda, a tyendé fe mengômesan; Eyoñe te a nga ke *nda Zambe a kañ. Mvuse valé, a nga ke *nda jé a sili na be ve nye bidi, nde a nga di.

²¹ Eyoñe te bebo bisaé bé be nga jô nye na: Jam wo te bo di da tinan aya? Eyoñe mon a vee, wo te tyi bidi a yôn; éyoñe mon a wuya nje wo kôlô si a di bidi!

²² A nga yalane na: Éyoñe mon a be vevee ma te tyi bidi a yôn me jô'ô na: Za *a yem nge Nti a ye mvamane ma a bo na mon a bo te wu'

²³ V'éyoñe ji a wuya, amu jé me beta tyi bidi, ye me ne nguleya beta bulane nye? Ma ma ye ke be nye, ve nye aa ye ke beta zu be ma.

²⁴ Ane David a nga volô minga wé Bet-Séba *nlem, nde a nga ke be nye a bômbô nye. Nde a nga biaé monafam a yôlé nye jôé na salomon, Nti a nga nye'e nye.

²⁵ Ane David a nga kalane nye e mo me *nkulu mejô Natan a be nga yôlé nye jôé na Yedidia, amu Nti a nga nye'e nye.

Nyoñane tisone Raba

²⁶ Yôab, nyô a nga dili Raba Beamônite bita, a nga nyoñe tisone njô bôt.

²⁷ Ane a nga lôme minlôman be David be jô nye na: Me diliya Raba bita a me nyoñeya tisone mendim;

²⁸ Ajô te sula'ane bôte bevo'o y'ayoñ éyoñe ji a zu vule minkan asu tison a nyoñe je, mamien me za nyoñe je a yôtane jôé dam été.

²⁹ Ane David a nga sulane bôte bese a ke wosane Raba; nde a nga dili nye bita a nyoñe nye.

³⁰ A nga nyoñ ékate duma é nga too e njô bôte y'été nlô; ékate te é mbe adit tañe talañ or jia, ako'o é n'édima é too f'été. Be nga beté je nlô David, nyô a nga kôlô tison a bili abui akume ya nsa.

³¹ Mfa'a bôt be nga too été, a nga kuli be atan a lôme be be ke bo ésaé ya si'i so, ji ya senane si a biba'a bityé, a ji ya ba'é bilé a ôvôn étyé, be mbe fe be bili fonos ya bibi brik; avale te a nga bo bitisone bise ya Beômônite. Eyoñe te David a nga bulane Yérusalém a bôte bese.