SAMUEL BAA EJÔÉ DAVID 1 - Kalate Zambe Nnomo a Mfefe Mfefé Nkôñelan

David a nyoñe foé awu Saül

¹ Valé Saül a wuya éyoñe David a nga bulan zu tabe Tiklag a so'o mane wôé Beamalésite. Nde a nga bômbô valé melu mebaé.

² E môse lale, môt a nga so minkane mi Saül, mengômesan me too nyaban a fem nlô ôse, nd'a nga ku si a kute fe meboñe si.

³ David a nga jô nye na: Wo so vé? A nga yalane na: Ma te tup minkan mi Israél.

⁴ David na jé ja lôt? Kate me foé! Ane môt a nga yalane na: Bôt ba te tube mewosan a bôt abui y'ayoñ ba te mane ku a wu, Saül émien a mone wé Yônatan be wuya.

⁵ Nde David a nga jô ndôman é nga kañete nye jame dina na: Wo yem aya na Saül a mone wé Yônatan be ne ñwuan'

⁶ Ndôman é nga Kañete nye mam mete é nga yalane na: Me too nkôle Gilbôa: Saül ki a ye'e akoñe dé yôp, nde bevagoñ a bebebe bikabela bi nga bametane nye.

⁷ Eyoñ a Kôñelan, nde a yene ma a loone ma. Me na: Ma nyô!

⁸ Nde a jô ma na: Ô ne za? Nde ma yalane nye na: Me ne mone Amalésite.

⁹ Nde a jô me na: Tebe'e ma fefel a wôé ma; amu bijôñ bi biya ma akôsa bo me ngenan me vee.

¹⁰ Nde ma tebe nye bebé a wôé nye, me tuka'a fe yeme na a nji bo nguleya nyiñe bita bite. Me nyoñ ékate duma ja too nye nlô a akom da too nye wo a me zuya biôm bite e be masa wom.

¹¹ Ane David a nga bi mengômesane mé a nyabe me; bôte bese be nga too nye fefel be nga bo fe avale te.

¹² Be nga bo ékôan awu, be yônôk a tyi bidi a kui mamengô'é ajô Saül, di mone wé Yônatan, di bôte Nti a *nda Israél be nga mane wu a meyo me nkpwaté mekôn.

¹³ Ane David a nga kobô ndôman é nga zu kate nye foé na: Wo so vé? Nye na: Me ne mona *ntabe a so e be Beamalésite.

¹⁴ David Nye nye na: Ô nji ko woñ amu jé ya same wo wôé a wôé nyôa Nti a ne *ñwo'one mbon'

¹⁵ Ajô te David a nga loone wua ya bendômane bé a jô nye na: Subu'u nné a wôé nye! Nde môt ate a nga wôé mone Amalésite ate;

¹⁶ David a nga jô nye na: Metyi môé me tabe'e nlô wôé yôp, amu anyu dôé nde é wôéya wo, amu wo te jô na: Ma te wôé nyôa Nti a ne *ñwo'one mbon.

David a yône Saül a Yônatan

¹⁷ Eyoñe te David a nga yia e jia ñyône ji asu Saül a mone wé Yônatan,

¹⁸ a nga bendé na be ye'ele je bone be Yuda; jia bewua *élaé: é ne ntilan e kalate Nyô a ne *zôsôô, David a nga jô na:

¹⁹ A Israél amu jé biwôlô bi bôte biôé ya mewosan bi maneya wu, biwôlô bi bôte biôé ya mewosan bi jô'ô mimbim e mevôm me n'ôyabe yôp'

²⁰ Te mialane foé nyô e tisone Gat teke mia miase je e minjoñ ya Askalôn. binga Befilisteñ be za bi avak, bengone be bôt be ne te ntyi'ibane metyele bete be za dañé.

²¹ A minkôle ya Gilbôa mfô mendim a mveñ bi bo'o momo be mia. Baa ye fe yen ate'e mefup e meyo menan. Amu nne bibene ya bewosan bi nga tôban ôsame valé, ébene Saül, ba ye bo te beta wo'o je mbon.

²² Elaé Yônatan é nji bulane mvus ôsu besiñ a yiane wôé. A nkpwaté mekône Saül, O nga bo ésaé ja yiane wô éyoñ ése.

²³ Saül a Yônatan be nga nye'esan nté y'ényiñe jap ése To'o éyoñ y'awu dap, be nji ke kandan. Bôte be mbe avôle mebo a dañe bendôé. Ayok a dañe bengbwengbwem.

²⁴ A binga ya Israél, yônane Saül! A mbe a jalé'é mia abeñe mengômesan é n'édima. Nyô a nga futi biôm bi or e bizingi bienane yôp.

²⁵ Amu jé mimben mi nga wu ézezañe mewosan' Amu jé Yônatan a nga wu e mevôm me ne mbetane yôp'

²⁶ Nleme wom wo tat amu wo, a Yônatan! Mojañ, e mvôé jam ja dañ! Nye'ane wôé, mfa'a wom, ô mbe jam ya semé, a dañe nye'an ya nye'e binga.

²⁷ Amu jé biwôlô bezimbi bite bi nga wu'