Rt 4 - Kalate Zambe Nnomo a Mfefe Mfefé Nkôñelan

Bôaz a nyoñe Elik Elimélék

¹ Bôaz a nga ke mfa'a ya *mbé bôt ba nyiine wô e tison été, a tabe valé. Nde môte a nga jô nye na a bili ngule ya *nkôtan a nga so a lôte vôme a nga to. Ane Bôaz a nga jô nye na: Wo, tame subu e nné, tabe'e si. Nalé môt ate a nga zu a tabe si.

² Nde Bôaz a nga nyoñe bôt awôm ézezañe bemvendé ya e tison a jô be na: Taba'ane si va, ane be nga tabe si.

³ Eyoñe te Bôaz a nga kobô môt a nga bili ngule ya nkôtane na: Naômi a soya si ya Môab, a a bili ôsimesane ya kuan éfuse si monyañe wongan Elimélék.

⁴ Ajô te ma te yene mvaé ya kate wo jame te me jô'ô wo na: Jeñe na, ô nyoñ éfuse si te betyi'i mejô be too a bemvendé ya ayoñ! Nge wo kômbô kôté je, kôté'é! Nge momo ô kate fe ma me yem: amu môte mfe a nji bi nkañesan ya bo jame te ve wo étam. Ma zu e mvuse jôé. Ane môt ate a nga yalane na: Maa ye kôté éfuse si te.

⁵ Nde Bôaz a nga beta jô na: E môse wo ye nyoñe afub e mo me Naômi, *môs ôte fe wo ye lu'u Rut, ngone ya Môab, e minga Maklôn a nga lik, nde jôé dé da ye bo te jañ éli'i jé été.

⁶ Nde môt a nga bili ngule ya *nkôtan a nga yalane na: Me se ngule ya kôté asu dam, me za tyame éli'i jam; a ntoo ve wo wo kôté asu dôé womien e jôm me ma te yiane kôté amu ma me vaaya mo mam été.

⁷ E melu mvus, éyeme ya Israél é mbe na: Môt a vaa e silifase wé abo a kee nye e môte mbok, ndem ya yemete jam éziñ ya *nkôtan nge mfola'ane jôm.

⁸ Ajô te môt a nga bili ngule ya *nkôtan a nga jô Bôaz naa: nyoñe (si a minga) asu dôé, nalé a nga vaa silifase wé abo.

⁹ Nde Bôaz a nga jô bemvendé a bôte bese na: Mi ne benganyia na ma te kôté biôme Elimélék, kiliôn a Maklôn bise den e mo me Naômi.

¹⁰ A na ma te fe kôté Rut, ngone ya Môab é mbe nga Maklôn, a bo e minga wom, ndemben ma ye bo na jôé môt a nga wu e bo te jañ éli'i jé été a na jôé môt a nga wu e bo te jañ ézezañ bobenyañe bé a e *mbé bôt ba nyiine wô e tison été. Mi ne bengaa ya jame te e môse wu.

¹¹ Ane bôte bese be nga too *mbé a bemvendé be nga jô na: Bi ne bengaa! Nti a kañese'e na e minga a nyiine wo *nda a bo ane Rachél a Léa, mbe bebaé be nga lôñ ayoñ Israél. Bo'o Efrata ngu, bo'o fe jôé Bétléhém na e wô'é.

¹² Ngo'é, nge mvoñe bôte Nti a ye ve wo e be ésoé minga ji é ne bo na *nda jôé é funane ndaa Péré, mone Tamar a nga biaé Yuda.

Bôaz a lu'u Rut; Abialé Obéd

¹³ Nalé ate Bôaz a nga lu'u Rut a bo e minga wé. Eyoñ a yemeya nye, nde Nti a nga kañese na Rut a nyoñ abum, ane a nga biaé mona fam.

¹⁴ Nde binga be nga jô Naômi na: Nti a bo'o ébotan, Nyô a kañeseya na *nkôté a bialé wo e môse wu, jôé dé da ye wum Israél été.

¹⁵ A beteya bo wo na ô nyiñ, a bi ésuka'a ya éto nnôme jôé: amu mbome wôé wo nye'e wo ô biaya mon ate; e mbome wôé te wo dañe bobefam zamgbwa.

¹⁶ Ane Naômi a nga nyoñe mon, a bôé nye tôé jé a yale nye.

¹⁷ E binga be nga too Naômi bebé be nga yôlé mon ate jôé be jô'ô na: Mona fam a bialéya Naômi! Nde be nga loone nye jôé na ôbéd; Ôbéd ate nye a mbe ésaa Izayi; Izayi ki a too ésaa David.

¹⁸ E mvoñe bôte Péré nje nyô: Péré a nga biaé Esroñ;

¹⁹ Esroñ a nga biaé Ram; Ram a nga biaé Aminadab;

²⁰ Aminadab a nga biaé Nachoñ; Nachoñ a nga biaé Salmon.

²¹ Salmon a nga biaé Bôaz; Bôaz a nga biaé Ôbéd;

²² Ôbéd a nga biaé Izayi; Izayi a nga biaé David.