Rt 2 - Kalate Zambe Nnomo a Mfefe Mfefé Nkôñelan

Rut a jeñe bidi afube Bôaz

¹ Naômi a nga bili môte baa nnôm be mbe abialé. Môt ate a mbe éwôlô a nkukum ya *nda bôt Elimélék, a too jôé na Bôaz.

² Ane Rut, ngone ya Môab, a nga jô Naômi na: Ma ye ke mefub a kôane *mebuka'a me nlisi e mvuse môt ase a ye ko ma éngôngo. Nde Naômi a nga yalane nye na: Kelek a ngo jam.

³ Nalé ate a nga ke kôane bidi afup éziñ été, e mvuse bebo bisaé. A nga yene ma'a na afub a nga kôane bidi e mbe afube Bôaz, môte ya *nda bôte Elimélék.

⁴ Eyoñ é lôteya, ane Bôaz émien a nga so e Bétléhém Yuda a jô bebo bisaé ya afube na: Nti a tabe'e e be mia! Nde be nga yalane na: Nti ke a bota'ane wo.

⁵ Ane Bôaz a nga jô mbo ésaé a mbe a fombô'ô bekôane bidi na: Za a nee ésoé minga ji'

⁶ Nde mbo ésaé ate a nga yalane na: A ne ésoé minga é nga so Môab baa Naômi.

⁷ A te jô na: A zu kôan a to'é bisañ e zañe mimbom mi ne e mvuse bebo bisaé ba kôane nlisi. Ane a soo, ataté mametyé, a ne ve tetele a zu kui éyoñe ji; a te wo'on ve mone nté e *nda.

⁸ Nde Bôaz a nga jô Rut na: Tuka'a vô'ôlô, a ngo jam, te beta ke kôane nlisi afub afe, nalé fe te beta ke ôyap, yemba'ane bebo bisaé bam be ne binga.

⁹ Tuka'a fombô afub ba kôane nlisi, a wo ye ke e mvuse jap. Me veya bebo bisaé bam be ne befam atiñe na, be bo te nambe wo. Eyoñ wo wô'ô évé, wo ye ke e vôm mende'e me né a nyu mendim bebo bisaé be maneya lap.

¹⁰ Ane Rut a nga ku bubutu asu Bôaz a jô nye na: Amu jé me yeneya *mvam e mise môé, e ma me ne ngone ya ayoñ afe'

¹¹ Nde Bôaz a nga yalane nye na: Be nga kañete ma teke li'i to'o jame da ya mam mese ô nga bo nyo ntyi, a taté éyoñe nyo nnôm a wuya, ane ô nga li'i éso, nyua a si jôé ô nga bialé, a zu e be bôt ô nji tame taté yem.

¹² Nti émien a yaka'ane wo mboone wôé. Ma'ane môé me bo'o ngumba, me so'o e be Nti, e Zamba Israél. Nye ate ô zuya sobô e mefabe mé si.

¹³ Nde Rut a nga yalane na: Me yeneya fo'o *mvam e be wo a Nti wom; ô volôya ma *nlem, ô kobôya e nleme mbo ésaé minga wôé, teke na me ne ne ane wua ya bebo bisaé bôé be ne binga.

¹⁴ Eyoñe ndian ô nga kui, Bôaz a nga jô nye na: Subu'u e nné, ja'a belet a dube je e woon été. Nde a nga tabe si e fefele bekôane bidi, a Bôaz a nga ve nye bidi bi too ñyañan; nalé a nga di a jaé, a naane fe bika'é.

¹⁵ Ane a nga ke ôsu a kôane bidi; Bôaz a nga bendé bebo bisaé bé na: Jôka'ane Rut a kôane fe nlisi e zañe mimbom, te ndeñelane nye.

¹⁶ Mi li'i fe mimbom miziñ a kôane mie teke bijô.

¹⁷ Nalé a nga kôane bidi afub afup akekui mamengô'é. Nalé fe a nga tya'a abim a nga kôan tañe biat bi nlisi zamgbwa.

¹⁸ Ane a nga nyoñe biat bi nlisi bite a bulan e tison a liti bie ntyi wé. A nga ve fe nye bika'é a nga naan.

¹⁹ Ajô te ntyi a nga sili nye na: Wo te kôane e vé den a wo te saé e vé den? Ebotan a nyô a te ko wo éngôngo! Ane Rut a nga kañete ntyi wé avale mam me nga lôt, nde a nga jô na: E môt a nee afub ma te bo ésaé a ne jôé na Bôaz.

²⁰ Nalé Naômi a nga jô mbome na: Nti a bota'ane nye, Nyô a ne te vuane liti mvame jé e be bevevee a e be miñwuan! Ajô te Naômi a nga beta jô Rut na: Môt ate a ne évuvumane jañgan, wua ya bôt ba yiane kôté bia.

²¹ Ane Rut, ngone ya Môab a nga beta jô na: Môt ate a te fe jô me na: Yemba'an bebo bisaé bam akekui be maneya nkôane bidi wom ôse.

²² Nde Naômi a nga jô Rut e mbome wé na: A ngo jam, e ne mvaé na mia be bebo bisaé bé be ne binga mi wulu a be bo te beta koone wo afub afe été.

²³ Ajô te Rut a nga lat a bebo bisaé be Bôaz be ne binga, a ane a nga kôane bidi akekui éyoñ nkôane nlisi a fôn ô nga man; baa ntyi wé be nga too vôme wua.