Rt 1 - Kalate Zambe Nnomo a Mfefe Mfefé Nkôñelan

Nda bôt Elimélék ja tôban minju'u abui

¹ Melu betyi'i mejô be nga jôô, mfumbale zaé a nga kui Israél. Nde môt éziñ ya Bétléhém, si ya Yuda, a nga kôlô baa ngal a bobefam bé bebaé; nalé be nga ke tabe nté éziñ mebôta me si me ne nte'an e si ya Môab.

² Môt ate a mbe jôé na, Elimélék, minga wé ke jôé na Naômi; môé me bobefam bé bebaé ke na: Maklôn a Kiliôn. Be mbe bôte ya *nda bôte Yuda é mbe é too Bétléhém be lo'one je na Efrata. Be ngenan be too e Môab,

³ nde Elimélék a wu, Naômi ve li'i étam a bobefam bé bebaé.

⁴ Ane be nga lu'u bengone ya Môab: ngone jia jôé na Orpa, nyô fo'o ke jôé na Rut. Mimbu awôm mi lôteya, nde

⁵ Maklôn a Kiliôn be nga wu. Ane Naômi a nga li'i étam étam teke fe nnôm nge bobefam bé bebaé.

Naômi a Rut ba bulan e Bétléhém si ya Yuda

⁶ A ngenan e si ya Môab, nde Naômi a nga nyoñe foé na Nti a maneya botane bôte ya si jé a ve be bidi. Ajô te a nga bo ngômesan ya bulan e si ya Yuda baa be mimbom mié mibaé.

⁷ Ane be nga ke nsamba. Be ngenan e *zen,

⁸ nde Naômi a nga jô mimbom mié mibaé na: Bula'an éyoñe ji, môt ase e *nda nyia wé, Nti a bo'o mia mvaé avale fe mi nga bo ma a bôt be nga mane wu.

⁹ Nti a bo'o na mi bi awo'on, môt ase e *nda be nnôme wé: ane a nga wubane be. Nde mimbom mi nga bete metyiñe yôp a yôn.

¹⁰ Ane mi nga jô Naômi na: Bi nji ke kômbô li'i wo, bia be wo bia ye ke e be bôte ya ayoñe dôé.

¹¹ Ve Naômi a nga yalane na: Bula'an, a bengo bam! Amu jé bia be mia bia ye ke? Ye me ngenane bobefam be ne bo benyo beyôm abume dam été'

¹² Bula'an, a bengo bam! Kelan, amu me ntoo étua nnôm ya beta lu'u fam. Ja'ana me too ndi ya bi nnôm alu di a biaé fe bobefam,

¹³ mi se ngule ya yange be na be yaé a toé miabebien te beyôm! Momo a bengo bam! Amu asu'ulane dam e nembaneya ayô a dañe éndenan; nalé fe na me lôô wo Nti ô keya ma e ngame yat.

¹⁴ Ane be nga beta taté na ba yôn; Orpa a nga wubane ntyi a kandane nye, ve Rut a nga lat a nye.

¹⁵ Nalé Naômi a nga jô Rut na: Ô lôô nyo mvan a bulaneya e be bôte bé a e be *zambe wé: mia nye bula'an!

¹⁶ Ve Rut a nga yalane ntyi na: Te tindi me na me li'i wo a bo te tôñe wo: amu vôm ase wo ke, ma fe ma ye ke; vôm ase ô too, ma fe ma ye tabe; e bôte bôé be ne émbam a e Zambe wôé a ne éñwom.

¹⁷ Ma ye wu a jambe e vôm wo ye wu. Zambe Emien a bo'o ma e jam da dañ *abé, amu ma jô bebela na, awu étam nde da ye kandé bia wo.

¹⁸ Eyoñ Naômi a nga yene na Rut a tyi'iya fo'o na baa nye ba ke, a nji ke fe beta jô jam afe.

¹⁹ Nalé be nga ke bebaane a kui anyiine tison Bétléhém ya Yuda. Eyoñ be nga nyiin e Bétléhém, tison ése é nga ngamelan, a binga be nga sili na: Ye Naômi fo'o nyô'

²⁰ Nde a nga yalane na: Te mia beta loone me na Naômi, nyô a ne njalan a mevak. Ve lo'one me na ayôlô, nyô a ne njalan a ôlun, amu Zambe a ne Ngul ése a litiya ma atyil a ayô.

²¹ Eyoñ me nga kôlô va me too njalan a afok, ve Nti a boya na me bulan teke jôme mo: amu jé mia beta loone me na Naômi? Nti a kuliya ma ôsame, a Nyô a ne Ngul ése a litiya ma bidim.

²² Avale di nde Naômi a nga bulan e si ya Môab baa Rut, mbome wé. Be nga suane Bétléhém ya Yuda melu ba taté nkôane nlisi.