Oz 9 - Kalate Zambe Nnomo a Mfefe Mfefé Nkôñelan

Ayoñe bôte Zambe da ye mane dimili biôm bise

¹ A Israél, te vak, nge fôn ane *meyoñ me ne te yeme Zambe, e too na ô nga bo ébamba, éyoñ ô nga li'i Zambe wôé, a nyoñe ma'an me ne mvin e minseñ mise ba tya'a bidi.

² Ve fôn ba tya'a nseñ, a mbon ba miat, bia ye bo te bo asu dôé. A mfefé woon wo yange, wo ye bo te dañe wo anyu.

³ Ba ye bo te tabe e sii Nti; Efrayim a ye bulan Ejipte, a ba ye di bidi bi ne mvin Asiri.

⁴ Ba ye bo te sôé Nti mimvean mi woon; mimveane miap a ye bo te yene mie mvaé. Ma ye bo mfa'a wop ane belet ôlun, ba bese ba ye di mimveane mite ba ye bo te mfuban; amu belet jap ja ye volô ve zaé jap, ve be se nguleya zuu je e *nda Nti.

⁵ Mia ye bo aya asu ya kômesane môse mia be Nti mia ye tôban, môse abô'ô Nti'

⁶ Tame yen ane ba mane tup, amu si jap é maneya tyamban; Ejipte ja ye nyoñe be, a Mañfis a ye ve be mesoñ; biôme biap bi n'édima, mboon a argent, sas ja ye bi bie, a biyo bia ye bo e menda bindelé mab été.

⁷ Melu *melep me kpwaneya, Israél a yiane yeme de. Akôsa bo mia jô na: *nkulu mejô a so'o étyi, môta Nsisim ate, befôta'amfô be bili nye. Ve mia vuane na, jama mbia mimboone wônan, a nkwala mia bo nye, mbie bia bo nye nalé.

⁸ Nyô a bômbô évévé ajô Israél, *nkulu mejô, ba Zambe be ne nsamba. Ve ba lame nye melam e vôm ase a ke. Ja'ane si é ne nyô Zambe wé, a tôbane fe ve bita.

⁹ Mi keya kui édo'o *abé, aval'ane melu mvus e Gibéa. Ve Nti a nji vuane mbia mimboone mienan. A ye yaa bikobe bienan.

Atek e ntoo Nti nyô

¹⁰ Me nga som Israél ane bibuma bi ndi'i woon e fé été. Me nga yene b'ésoo benan ane bibuma bi ôsu ya figié. Ve be nga viane ke be Bal-Péor. A ve bebiene ngume mvean e be mbia *ngunemelan ate, a bo bebien mbia be biôm, ane jôme jap ba nye'e te.

¹¹ Duma Efrayim da ye yele an'ônon: abialé momo, abum momo, nyoñan abum momo.

¹² Nge ba yale *bon, ma ye vaa be te na be bo bôt, a bidim a be éyoñ ma ye ke be ôyap!

¹³ Eyoñ ma fombô mfa'a Tir, Efrayim a tele mbamba vôm. V'asu'ulane dé e ne na a kee bone bé e be nyô a ye wôé be.

¹⁴ A Nti, za melebe wo ye ve be' Va'a be mebume *bon ba bialé minsolekan, a mebé ma mane kôt teke menyañ!

¹⁵ Mboon *abé wob ôse ô nga yené e Gilgal: nne me nga taté be ñwô'an ôlune valé. Ma ye titane be *nda jam, amu mbia mimboone miap; ma ye bo tek'ôsu *a nye'e be; bivete biabe bise bi ne bi bia bene njôan.

¹⁶ Efrayim a bibaneya, nkañe wé ô maneya kôt; ba ye bo te beta be'e bibuma. Nge be bili *bon, ma ye bo ébuma y'abume dap ba nye'e na é wu.

¹⁷ Zambe wom a ye bene be, amu be nji ke wô'ô nye. Ba ye taté na ba ndeñendeñ *meyoñ me bôt été.